ساياساتكەر، جۋرناليست ءامىرجان قوسان جاڭا قازاقستاننىڭ ورناۋىنا قانداي شارتتار كەدەرگى جاساپ وتىرعانىن ايتتى، - دەپ حابارلايدى Dalanews.kz.

ونىڭ سوزىنشە، بۇعان ءۇش ماسەلە اسەر ەتىپ وتىر. سونداي-اق، ءامىرجان قوسان جاڭا قازاقستان يدەياسى تولىققاندى جۇزەگە اسىپ جاتىر دەپ ايتا المايتىنىن جەتكىزدى.

"ونىڭ ءۇش سەبەبى بار. بىرىنشىدەن، نازاربايەۆتىڭ فاكتورى بار. قالايسىز، قالامايسىز با، قازاقستاندا ءومىر ءسۇرىپ جاتىرمىز. 2019 جىلى نازاربايەۆ توقايەۆتى تاڭداعاندا ءوزارا كەلىسىمشارتتارى بولدى. ءبىز ونى جوققا شىعارا المايمىز. ەكىنشى فاكتور، ول - ءبىزدىڭ كادرلار. ەسكى كادرلارمەن جۇمىس ىستەپ جاتىرمىز. جاقىندا ساعىنتايەۆتى ەسەپ-اۋديتورلىق پالاتانىڭ ءتوراعاسى قىلدى. ال اۋديتورلىق پالاتا - ۇكىمەتتىڭ بيۋدجەتتى قالاي جۇمساعانىن تەكسەرەتىن ۇيىم. سوندا قالاي ساعىنتايەۆ ءوزىنىڭ جۇمساعان اقشاسىنا دۇرىس پا، بۇرىس پا دەپ باعا بەرە الادى؟! ويتكەنى ءوزى پرەمەر-مينيستر بولدى عوي. سوندىقتان پالاتاعا تاۋەلسىز تۇلعالار بارۋى كەرەك. كادرلىق شەشىمدەر ەسكى قازاقستاندى ءالى ۇستاپ تۇرعان سياقتى.

ءۇشىنشى - بيلىكتىڭ، سونىڭ ىشىندە پرەزيدەنت توقايەۆتىڭ ساياسي ەرىك پەن جىگەرىنە بايلانىستى. ساياسي ەرىك پەن جىگەر دەگەن - ەسكى قازاقستانمەن ات قۇيرىعىن كەسىسۋ. ءبىرىنشى سەبەپتە ايتقان، نازاربايەۆپەن بولعان ۋادەلەردى حالىققا ايتۋ. ...نازاربايەۆقا، ونىڭ وتباسىنا، بالا-شاعاسىنا، نەمەرەلەرىنە، اينالاسىنا ايتىلعان ۋادەلەرىن جويۋ كەرەك سياقتى. سونىڭ ۋاقىتى كەلدى. ايتپەسە ەرتەڭ كەش بولادى"، - دەدى ول "سويقان سۇحباتقا". 

سونىمەن قاتار، ساياساتكەر نازاربايەۆتى "قۇبىجىق قۇبىلىس" دەپ اتادى.

"نۇرسۇلتان نازاربايەۆ دەگەن جارلىقپەن، ۇكىممەن جۇمىستان شىعىپ قالاتىن تۇلعا ەمەس قوي. نۇرسۇلتان نازاربايەۆ دەگەن قۇبىلىس، بۇل - پروسەسس. ونىڭ 30 جىلدا قالىپتاستىرعان ءسالت-داستۇرى بار. قۇدالىقتان باستاپ بىتە قايناسقان ادامي قارىم-قاتىناستارى بار. سول قۇبىجىق قۇبىلىس ءالى بيلەپ وتىر. قالايمىز با، قالامايمىز با؟! سوندىقتان ەسكى كادرلاردان ارىلۋ كەرەك. ...تراگەديالىق تۇلعا (نازاربايەۆ - ەسك.). ويتكەنى ونىڭ قولىندا مۇمكىندىك بولدى. ءبىر كۇننىڭ ىشىندە ول مەملەكەت باسشىسى بولىپ شىعا كەلدى. مەملەكەتتىڭ جەر قويناۋىندا مەندەلەيەۆتىڭ كەستەسى بار. باي مەملەكەتتىڭ باسشىسى بولىپ شىعا كەلدى. ەگەر ول 30 جىلدىڭ ىشىندە دەموكراتيالىق، ادىلەتتى ساياسات جۇرگىزگەن كەزدە ءالى دە وتىرار ما ەدى؟" - دەدى ءامىرجان قوسان.

ايتا كەتەيىك، بۇعان دەيىن ءامىرجان قوسان ەكس-مينيستر تۇرعىمبايەۆتىڭ ىسىنە قاتىستى پىكىر ءبىلدىردى.

"ءبارى دە بولۋى مۇمكىن! ساياسي استار دا، كلانالارىق تارتىس تا، قىزمەتىندە جىبەرگەن كەمشىلىكتەرى نە جەمقورلىق ارەكەتتەرى سەبەپ بولۋى مۇمكىن. ءتىپتى ول پرەزيدەنتكە نە ونىڭ ماڭايىن جاقپاي قالۋى دا مۇمكىن. سول سەبەپتى رەسمي اقپاراتتى كۇتەيىك"، - دەگەن ەدى ول.