Saiasatker, jýrnalist Ámirjan Qosan Jańa Qazaqstannyń ornaýyna qandai sharttar kedergi jasap otyrǵanyn aitty, - dep habarlaidy Dalanews.kz.
Onyń sózinshe, buǵan úsh másele áser etip otyr. Sondai-aq, Ámirjan Qosan Jańa Qazaqstan ideiasy tolyqqandy júzege asyp jatyr dep aita almaitynyn jetkizdi.
"Onyń úsh sebebi bar. Birinshiden, Nazarbaevtyń faktory bar. Qalaisyz, qalamaisyz ba, Qazaqstanda ómir súrip jatyrmyz. 2019 jyly Nazarbaev Toqaevty tańdaǵanda ózara kelisimsharttary boldy. Biz ony joqqa shyǵara almaimyz. Ekinshi faktor, ol - bizdiń kadrlar. Eski kadrlarmen jumys istep jatyrmyz. Jaqynda Saǵyntaevty esep-aýditorlyq palatanyń tóraǵasy qyldy. Al aýditorlyq palata - Úkimettiń biýdjetti qalai jumsaǵanyn tekseretin uiym. Sonda qalai Saǵyntaev óziniń jumsaǵan aqshasyna durys pa, burys pa dep baǵa bere alady?! Óitkeni ózi premer-ministr boldy ǵoi. Sondyqtan palataǵa táýelsiz tulǵalar barýy kerek. Kadrlyq sheshimder Eski Qazaqstandy áli ustap turǵan siiaqty.
Úshinshi - biliktiń, sonyń ishinde Prezident Toqaevtyń saiasi erik pen jigerine bailanysty. Saiasi erik pen jiger degen - Eski Qazaqstanmen at quiryǵyn kesisý. Birinshi sebepte aitqan, Nazarbaevpen bolǵan ýádelerdi halyqqa aitý. ...Nazarbaevqa, onyń otbasyna, bala-shaǵasyna, nemerelerine, ainalasyna aitylǵan ýádelerin joiý kerek siiaqty. Sonyń ýaqyty keldi. Áitpese erteń kesh bolady", - dedi ol "Soiqan suhbatqa".
Sonymen qatar, saiasatker Nazarbaevty "qubyjyq qubylys" dep atady.
"Nursultan Nazarbaev degen jarlyqpen, úkimmen jumystan shyǵyp qalatyn tulǵa emes qoi. Nursultan Nazarbaev degen qubylys, bul - protsess. Onyń 30 jylda qalyptastyrǵan salt-dástúri bar. Qudalyqtan bastap bite qainasqan adami qarym-qatynastary bar. Sol qubyjyq qubylys áli bilep otyr. Qalaimyz ba, qalamaimyz ba?! Sondyqtan eski kadrlardan arylý kerek. ...Tragediialyq tulǵa (Nazarbaev - esk.). Óitkeni onyń qolynda múmkindik boldy. Bir kúnniń ishinde ol Memleket basshysy bolyp shyǵa keldi. Memlekettiń jer qoinaýynda Mendeleevtiń kestesi bar. Bai memlekettiń basshysy bolyp shyǵa keldi. Eger ol 30 jyldyń ishinde demokratiialyq, ádiletti saiasat júrgizgen kezde áli de otyrar ma edi?" - dedi Ámirjan Qosan.
Aita keteiik, buǵan deiin Ámirjan Qosan eks-ministr Turǵymbaevtyń isine qatysty pikir bildirdi.
"Bári de bolýy múmkin! Saiasi astar da, klanalaryq tartys ta, qyzmetinde jibergen kemshilikteri ne jemqorlyq áreketteri sebep bolýy múmkin. Tipti ol prezidentke ne onyń mańaiyn jaqpai qalýy da múmkin. Sol sebepti resmi aqparatty kúteiik", - degen edi ol.
