2024 جىلعى 2 جەلتوقساندا الماتى وبلىسى كەگەن اۋدانىنىڭ ورتالىعىندا مەملەكەت جانە قوعام قايراتكەرى زامانبەك نۇرقادىلوۆكە ارنالعان ەسكەرتكىش-بيۋستتىڭ اشىلۋ سالتاناتى ءوتتى. بۇل شارا مەملەكەت باسشىسى قاسىم-جومارت توقايەۆتىڭ تاپسىرماسى اياسىندا جۇزەگە اسىرىلدى. سونىمەن قاتار، كەگەن اۋىلىنداعى بالالار ونەر مەكتەبىنە زامانبەك ءنۇرقادىلوۆتىڭ ەسىمى بەرىلدى.

ەسكەرتكىشتىڭ اشىلۋ ءراسىمى زامانبەك ءنۇرقادىلوۆ اتىنداعى ونەر مەكتەبىنىڭ الاڭىندا ۇيىمداستىرىلدى. سالتاناتتى شاراعا مەملەكەت جانە قوعام قايراتكەرلەرى، اقىن-جازۋشىلار، تانىمال تۇلعالار مەن قايراتكەردىڭ وتباسى مۇشەلەرى قاتىستى. ەسكەرتكىشتىڭ اشىلۋىن وبلىس اكىمىنىڭ ورىنباسارى نۇرجان قۇدايبەرگەنوۆ، قوعام قايراتكەرلەرى توققوجا ەستەنوۆ پەن بولات نۇرعازييەۆ اشىپ، زامانبەك ءنۇرقادىلوۆتىڭ ۇلى قايرات ءنۇرقادىلوۆ ءبيۋستىڭ اشىلۋ ءراسىمىن ورىندادى.

وبلىس اكىمىنىڭ ورىنباسارى ءوز سوزىندە قايراتكەردىڭ ەل دامۋىنا قوسقان زور ۇلەسىن اتاپ ءوتىپ، ونىڭ ەڭبەگىنىڭ ۇلت تاريحىندا ماڭگى ساقتالاتىنىن جەتكىزدى:

«بۇل ەسكەرتكىش – حالقىمىزدىڭ قايراتكەرگە دەگەن شىنايى قۇرمەتىنىڭ بەلگىسى. ۇلت جاناشىرى رەتىندە زامانبەك ءنۇرقادىلوۆ ەل ەگەمەندىگىنىڭ نىعايۋىنا ەلەۋلى ۇلەس قوستى. وسىنداي تۇلعالاردىڭ ەڭبەگىن ۇرپاققا مۇرا ەتۋ – ءبىزدىڭ ورتاق پارىزىمىز. سونداي-اق، بيىكتىگى 4،5 مەتر بولاتىن بۇل تۋىندىنىڭ اۆتورلارى ايدوس بۇركىتبايەۆ پەن تيمۋر نۇرمۇحامەتوۆكە العىسىمىزدى بىلدىرەمىز».

سالتاناتتى راسىمنەن كەيىن قاتىسۋشىلارعا زامانبەك ءنۇرقادىلوۆتىڭ ءومىرى مەن قىزمەتى تۋرالى «نە تولكو و سەبە» اتتى كىتاپتىڭ 300 داناسى تاراتىلدى.

كەگەندەگى بالالار ونەر مەكتەبى

2015 جىلى قۇرىلعان كەگەن اۋىلىنداعى بالالار ونەر مەكتەبى بالالارعا دومبىرا، قوبىز، بايان، ءداستۇرلى ءان، ەسترادا-ۆوكال، حورەوگرافيا، بەينەلەۋ، ءمۇسىن جانە ساندىك-قولدانبالى ونەر باعىتتارى بويىنشا ءبىلىم بەرەدى. بۇگىنگى تاڭدا مەكتەپتە 44 پەداگوگتىڭ باسشىلىعىمەن 890 وقۋشى ءبىلىم الۋدا.

مەكتەپتىڭ بولىمشەلەرى اۋدانداعى 12 ەلدى مەكەندە ورنالاسقان، بۇل بالالارعا قوسىمشا ءبىلىم الۋعا مۇمكىندىك بەرەدى. وقۋشىلاردىڭ جەتىستىكتەرى ايتارلىقتاي: حالىقارالىق بايقاۋلاردا – 38، رەسپۋبليكالىق دەڭگەيدە – 176، وبلىستىق سايىستاردا – 158، اۋداندىق جارىستاردا – 82 جۇلدەلى ورىندارعا يە بولدى.

مەكتەپتىڭ دامۋى مەن جەتىستىكتەرى ارقىلى كەگەن وڭىرىندە مادەنيەت پەن ونەردى ناسيحاتتاۋ جۇمىستارى جوعارى دەڭگەيدە جۇزەگە اسىرىلۋدا.