2024 jylǵy 2 jeltoqsanda Almaty oblysy Kegen aýdanynyń ortalyǵynda memleket jáne qoǵam qairatkeri Zamanbek Nurqadilovke arnalǵan eskertkish-biýsttiń ashylý saltanaty ótti. Bul shara Memleket basshysy Qasym-Jomart Toqaevtyń tapsyrmasy aiasynda júzege asyryldy. Sonymen qatar, Kegen aýylyndaǵy balalar óner mektebine Zamanbek Nurqadilovtiń esimi berildi.
Eskertkishtiń ashylý rásimi Zamanbek Nurqadilov atyndaǵy óner mektebiniń alańynda uiymdastyryldy. Saltanatty sharaǵa memleket jáne qoǵam qairatkerleri, aqyn-jazýshylar, tanymal tulǵalar men qairatkerdiń otbasy músheleri qatysty. Eskertkishtiń ashylýyn oblys ákiminiń orynbasary Nurjan Qudaibergenov, qoǵam qairatkerleri Toqqoja Estenov pen Bolat Nurǵaziev ashyp, Zamanbek Nurqadilovtiń uly Qairat Nurqadilov biýstiń ashylý rásimin oryndady.
Oblys ákiminiń orynbasary óz sózinde qairatkerdiń el damýyna qosqan zor úlesin atap ótip, onyń eńbeginiń ult tarihynda máńgi saqtalatynyn jetkizdi:
«Bul eskertkish – halqymyzdyń qairatkerge degen shynaiy qurmetiniń belgisi. Ult janashyry retinde Zamanbek Nurqadilov el egemendiginiń nyǵaiýyna eleýli úles qosty. Osyndai tulǵalardyń eńbegin urpaqqa mura etý – bizdiń ortaq paryzymyz. Sondai-aq, biiktigi 4,5 metr bolatyn bul týyndynyń avtorlary Aidos Búrkitbaev pen Timýr Nurmuhametovke alǵysymyzdy bildiremiz».
Saltanatty rásimnen keiin qatysýshylarǵa Zamanbek Nurqadilovtiń ómiri men qyzmeti týraly «Ne tolko o sebe» atty kitaptyń 300 danasy taratyldy.
Kegendegi balalar óner mektebi
2015 jyly qurylǵan Kegen aýylyndaǵy balalar óner mektebi balalarǵa dombyra, qobyz, baian, dástúrli án, estrada-vokal, horeografiia, beineleý, músin jáne sándik-qoldanbaly óner baǵyttary boiynsha bilim beredi. Búgingi tańda mektepte 44 pedagogtyń basshylyǵymen 890 oqýshy bilim alýda.
Mekteptiń bólimsheleri aýdandaǵy 12 eldi mekende ornalasqan, bul balalarǵa qosymsha bilim alýǵa múmkindik beredi. Oqýshylardyń jetistikteri aitarlyqtai: halyqaralyq baiqaýlarda – 38, respýblikalyq deńgeide – 176, oblystyq saiystarda – 158, aýdandyq jarystarda – 82 júldeli oryndarǵa ie boldy.
Mekteptiń damýy men jetistikteri arqyly Kegen óńirinde mádeniet pen ónerdi nasihattaý jumystary joǵary deńgeide júzege asyrylýda.
