ءماجىلىس دەپۋتاتى داۋلەت تۇرلىحانوۆ پروباسيالىق ءتارتىپتى بۇزىپ، تويدا كورىنگەن ۇلى نۇراسىل بولاتتى قورعاپ سويلەدى،- دەپ حابارلايدى Dalanews.kz Qaz365.kz-كە سىلتەپ.
«قاي اكە بالاسى جامان بولسىن دەپ تاربيەلەيدى. قولدان كەلگەنشە تاربيە بەردىك. بالا ءبىراق جاقسى. ءبىراق نە ءۇشىن قالاي بولىپ جاتقانىن بىلمەيمىن. ءبىر بالانىڭ ارتىنان اڭدۋ بار. 21 جاستاعى بالا. ەرتەڭ جۇيكەسى توزىپ، اۋرۋ بولىپ قالسا وعان كىم جاۋاپ بەرەدى؟ سوندىقتان، بالام وتە جاقسى، تاربيەلى. بۇگىنگى كۇنى ءوزىنىڭ جولداستارىمەن ارالاسۋعا بولماي ما؟ تۋعان كۇنگە بارۋعا بولماي ما؟ سول جاعى، دەنساۋلىعى مەنى قاتتى ويلاندىرادى»، - دەدى دەپۋتات پارلامەنتتە جۋرناليستەرگە.
دەپۋتات بالانىڭ ارتىنان اڭدۋ بار دەپ كۇدىكتەنەدى. وتستاۆكاسى تۋرالى سۇراقتى ءوز سايلاۋشىلارى شەشەتىنىن مالىمدەدى. ءوز جۇمىسىنا جوعارى باعا بەردى.
«ۇلىم 21 جاستا. ونى باس بوستاندىعىنان نە ءۇشىن ايىرۋ ايىرۋ كەرەك؟ ساعات كەشكى 20.30-دا ارىپتەستەرىمەن وتىرعان. ىشپەگەن. بىردەن تۇرمەگە قامايتىن بولساق، ول تاربيە ەمەس. ءبارى بولۋى مۇمكىن (وز-وزىنە قول سالۋى مۇمكىن بە دەگەن سۇراققا). كۇن سايىن جازادى. تەلەفوندا ءبارى جازىپ جاتىر. بىرەۋ جاقسى ايتسا، بىرەۋ جامان ايتىپ جاتىر. ول بالا دا ويلانادى. ول بالاعا جانىم اشىپ ءجۇر. ۇيقىسى جوعالدى. ءقازىر بالاما ۇرىسپايمىن. دەنساۋلىعىن ويلاپ وتىرمىن»، - دەدى داۋلەت تۇرلىحانوۆ.
ەسكە سالايىق، بۇعان دەيىن ءماجىلىس دەپۋتاتى داۋلەت تۇرلىحانوۆتىڭ ۇلى نۇراسىل بولات تاعى "قىدىرىپ جۇرگەنىن" جازعان ەدىك.
الەۋمەتتىك جەلىدە نۇراسىلدىڭ تۋعان كۇندە وتىرعان ۆيدەوسى تارادى. ال سوت شەشىمى بويىنشا تۇرلىحانوۆتىڭ ۇلى پروباسيالىق باقىلاۋدا (ۋاكىلەتتى ورگانداردىڭ سوتتالعاندارعا سوت جۇكتەگەن مىندەتتەردى ورىنداۋىن جانە ولاردىڭ مىنەز-قۇلقىن باقىلاۋ).
قىلمىستىق-اتقارۋ جۇيەسى كوميتەتىندەگىلەردىڭ مالىمەتىنشە، نۇراسىل بولات باس بوستاندىعىن شەكتەۋ تۇرىندەگى جازاسىن وتەپ ءجۇر جانە الماتى قالاسىنىڭ پروباسيا قىزمەتىندە ەسەپتە تۇردى.
"پروباسيالىق باقىلاۋدى بۇزۋ فاكتىسى بويىنشا سوتتالعان ادامعا (نۇراسىل بولاتقا) ەسكەرتۋ جاسالدى، جازانى باس بوستاندىعىنان ايىرۋعا اۋىستىرۋ تۋرالى ماسەلەنى شەشۋ ءۇشىن سوتقا ماتەريال دايىندالىپ جاتىر"، - دەلىنگەن كوميتەتتىڭ رەسمي جاۋابىندا.
تامىزدا جەلىدە نۇراسىل بولاتتىڭ ۇيىندە پروباسيالىق باقىلاۋدا بولۋى كەرەك ۋاقىتىندا قالانى ارالاپ جۇرگەنى تۇسىرىلگەن ۆيدەو پايدا بولدى. قاجك ىشكى تەكسەرىستى باستاعانى تۋرالى ايتىلعان بولاتىن.
ايتا كەتەيىك، بۇعان دەيىن الماتىدا اسكەري قىزمەتكەر بەلگىلى ادۆوكاتتى سوققىعا جىققانى حابارلانعان. بۇل وقيعا 11 اقپانعا قاراعان ءتۇنى الماتىنىڭ ساۋدا ورتالىقتارىنىڭ ءبىرىنىڭ ماڭىنداعى پاركينگتە بولعان. ءىس قوعامدىق داۋ تۋدىردى.
بۇل وقيعا تۋرالى ادۆوكات ولەگ چەرنوۆتىڭ ايەلى اننا دميترييەۆيچ Facebook-پاراقشاسىندا جازعان. ولار تاكسيگە وتىرا بەرگەندە ءبىر جىگىت جۇگىرىپ كەلىپ، سوققىعا جىعىلعان قىزعا كومەكتەسۋىن سۇراعان.
ال كەيىن ادۆوكاتتى سوققىعا جىققان اسكەري قىزمەتكەر گرەك-ريم كۇرەسىنەن قازاقستاندىق جانە بۇرىنعى كەڭەس وداعىنىڭ پالۋانى داۋلەت تۇرلىحانوۆتىڭ ۇلى بولىپ شىقتى. بۇل اقپاراتتى تۇرلىحانوۆتىڭ ءوزى راستاعان بولاتىن. ول ۇلىنا قاتىستى داۋعا كوزقاراسىن ءبىلدىرىپ، كەشىرىم سۇرادى.
9 قازاندا سوت نۇراسىل بولاتتى وزىنە تاعىلعان قىلمىستى جاساعانى ءۇشىن كىنالى دەپ تاۋىپ، 1 700 000 تەڭگە كولەمىندە ايىپپۇل سالدى. 2024 جىلعى 14 مامىردا جوعارعى سوت ءىستى كاسساسيالىق تارتىپتە قاراپ، ۇكىمدى وزگەرتتى. تۇرلىحانوۆتىڭ ۇلىنا ەكى جىل باس بوستاندىعىنان شەكتەۋ جازاسى تاعايىندالىپ، وتەماقى مولشەرى ۇلعايتىلدى.
