استاناداعى مەكتەپتەر اراسىندا ۇيىمداستىرىلعان «زاڭ مەن بالا: قاتەسىز بولاشاق» قالالىق تەاترلاندىرىلعان قويىلىمدار بايقاۋىنىڭ فينالدىق كەزەڭى ءوتتى، دەپ حابارلايدى Dalanews.kz
«زاڭ مەن ءتارتىپ» قاعيداتى اياسىندا استانا قالاسىنىڭ پروكۋراتۋراسى مەن ەلوردا اكىمدىگى بىرلەسىپ وتكىزگەن اقتىق بايقاۋعا اۋداندىق كەزەڭدەردىڭ جەڭىمپازدارى، ياعني التى اۋداننان بۇعان دەيىن ىرىكتەلىپ شىققان 6 مەكتەپتىڭ ۇزدىك تەاتر توپتارى قاتىسىپ، قۇقىقتىق سالاداعى وزەكتى تاقىرىپتاردى كوتەرگەن قويىلىمدارىن كورەرمەندەر نازارىنا ۇسىندى.
ءا.مامبەتوۆ اتىنداعى مەملەكەتتىك دراما جانە كومەديا تەاترىندا وتكەن بايقاۋ وقۋشىلار اراسىندا قۇقىقتىق مادەنيەتتى قالىپتاستىرۋعا، ادامي قۇندىلىقتاردى دارىپتەۋگە، قۇقىقتىق سانانى دامىتۋعا، سونداي-اق ومىردە كەزدەسەتىن ءتۇرلى جاعدايلاردى شىعارماشىلىق تۇرعىدان ءتۇسىنۋ ارقىلى جاسوسپىرىمدەر ورتاسىندا قۇقىق بۇزۋشىلىقتاردىڭ الدىن الۋعا باعىتتالعان. بايقاۋدىڭ ەرەكشەلىگى – جاس ۇرپاقتىڭ زاڭ، ادىلدىك جانە ازاماتتىق جاۋاپكەرشىلىك تۋرالى كوزقاراسىن ونەر ارقىلى كورسەتۋىنە مۇمكىندىك بەرۋىندە.
بالالاردىڭ ونەر بايقاۋىن تاماشالاۋعا ءارى باعا بەرۋگە قالا اكىمىنىڭ ورىنباسارى ەسەت بايكەن، ق ر بالا قۇقىقتارى جونىندەگى ۋاكىلى دينارا زاكييەۆا، استانا قالالىق ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا ءتوراعاسىنىڭ ورىنباسارى نازگۇل ماقجان، قالا پروكۋرورىنىڭ ورىنباسارى بۋلات ميزانبايەۆ، استانا قالالىق ءبىلىم باسقارماسىنىڭ باسشىسى قاسىمحان سەنعازىيەۆ، تانىمال تەلەجۇرگىزۋشى ايگۇل مۇكەي، باس پروكۋراتۋرانىڭ، ءبىلىم مينيسترلىگىنىڭ وكىلدەرى، اۋداندىق پروكۋرورلار جانە استانا اۋداندارىنىڭ اكىمدەرى دە كەلدى.
«بۇگىنگى اقتىق قالالىق سايىسقا بۇعان دەيىن ءار اۋداندا وتكەن بايقاۋدىڭ جەڭىمپازدارى كەلىپ وتىر. قوعامدا ءار بالانىڭ قۇقىعى قورعالىپ، قاۋىپسىزدىگى قامتاماسىز ەتىلۋى كەرەك. ولار ءوز قۇقىعىمەن قاتار زاڭ بۇزعانداعى جاۋاپكەرشىلىكتىڭ قانداي بولاتىنىن دا ءبىلىپ ءوسۋى ءتيىس. سوندىقتان وسىنداي اۋقىمدى پروفيلاكتيكالىق ءىس-شارا وتكىزىلىپ وتىر. بارشا قاتىسۋشىلارعا ساتتىلىك!» – دەدى ءبىلىم باسقارماسىنىڭ باسشىسى.
قۇقىقتىق ءتارتىپ تاقىرىبىن تەاتر تىلىمەن جەتكىزۋگە تىرىسقان 6 مەكتەپتىڭ تالانتتى وقۋشىلارى قازىرگى قوعامداعى ەڭ وزەكتى دەگەن، ياعني سىبايلاس جەمقورلىق، كيبەربۋللينگ، ەسىرتكى ساۋداسى، ۇرلىق، جالعان اقپارات تاراتۋ سياقتى قۇقىقبۇزۋشىلىقتاردى قويىلىمدارىنا ارقاۋ ەتتى.
«بىلتىر باستاۋ العان بايقاۋ بيىل دا جالعاسىن تاۋىپ، بۇعان دەيىنگى ىرىكتەۋ سايىستارىنىڭ بۇگىن جەمىسىن كوردىك. ءار ادام ومىرگە كەلگەن سوڭ اينالاسىن، جان-جاعىن تانۋعا ۇمتىلادى. كوبىنە بىلمەستىكتەن نەمەسە دۇرىس باعىت-باعدار بەرىلمەگەندىكتەن قاتەلىككە ۇرىنىپ جاتادى، قىلمىسقا دا بارادى. سونىڭ الدىن الۋدا وسىنداي ءىس-شارالاردىڭ ماڭىزى زور. بۇگىن ساحناعا شىققان ءار بالا – ەلىمىزدىڭ ادال ازاماتى، ءوز مەملەكەتىنىڭ زاڭىن قادىرلەيتىن بولاشاق تۇلعا بولارىنا سەنىم مول. وسىنداي ونەگەلى جولدى كورسەتۋ – ءبىزدىڭ ورتاق بورىشىمىز. ونەر كورسەتكەن بارلىق كوماندا مىقتى، ءبارىن دە جەڭىمپاز دەپ تانۋعا بولادى، وسى رەتتە قازىلار القاسىنا وڭاي تيگەن جوق. ءبىراق سايىستىڭ اتى سايىس. بارشا جۇلدەگەرلەردى قۇتتىقتايمىن. كەلەسى جىلى بايقاۋدىڭ اۋقىمىن كەڭەيتىپ، رەسپۋبليكالىق دەڭگەيدە وتكىزەمىز دەگەن ويدامىز»، – دەدى ەسەت بايكەن.
بايقاۋ قورىتىندىسىندا «ۇزدىك اكتەر» ەستەلىك سىيلىعىمەن №87 مەكتەپ-گيمنازياسىنىڭ 6-سىنىپ وقۋشىسى نۇراحماتوللاح جاناتقان، «ۇزدىك اكتريسا» اتالىمى بويىنشا قوجا ءرولىن سومداعان، №108 مەكتەپتىڭ 6-سىنىپ وقۋشىسى مەيىرىم سۇلەيمەن، «تاقىرىپقا ەرەكشە كوزقاراس» اتالىمىمەن №28 مەكتەپ-ليسەيى، «ۇزدىك سەناريي» اتالىمىمەن №58 مەكتەپ-ليسەيى، «ۇزدىك ۆيدەو» اتالىمىمەن №17 مەكتەپ-گيمنازياسى، «ەكىنشى فونداعى ۇزدىك ءرول» اتالىمىمەن №93 مەكتەپ وقۋشىسى بەك ساپارحان ماراپاتتالدى.
«زاڭ مەن ءتارتىپ» قاعيداتى اياسىندا الەۋمەتتىك بەينەروليكتەر جاساۋعا قاتىسقانى ءۇشىن №97 جانە №75 مەكتەپتەر دە ماراپاتتارعا يە بولدى. سايىستىڭ جۇلدەلى ورىندارىن بەرگەندە 6-ورىندى №28، 5-ورىندى №93، 4-ورىندى №58، 3-ورىندى №87، 2-ورىندى №108 جانە 1-ورىندى №17 مەكتەپتەر يەلەندى. جۇلدەگەرلەر ديپلومدارعا قوسا 50 مىڭ مەن 300 مىڭ تەڭگەنىڭ ارالىعىندا اقشالاي جانە نوميناسيا يەگەرلەرى باعالى سىيلىقتارعا يە بولدى.
