ول – ساياساتتانۋشى. تاۋەلسىز مامان. اتى بار، زاتى جوق جيىنداردا توبە كورسەتپەيدى. جوعارىدان الدەبىرەۋ تەلەفون سوقسا، استاناعا جەتىپ بارمايتىنىن، مەملەكەتتىك تاپسىرىسقا جۇمىس ىستەمەيتىنىن ايتادى. ونىسى راس. جالتاقتىقتى جەك كورەدى. وتكىر. تىككە ايتاتىن مىنەزى بار. بۇقارالىق اقپارات قۇرالدارىنا اشىق. ەشكىمدى ءبولىپ-جارمايدى. قوعامداعى ساياسي-ەكونوميكالىق، الەۋمەتتىك وزەكتى ماسەلەلەرگە قاتىستى ۇدايى پىكىر ءبىلدىرىپ وتىرادى. ورىسشا دا، قازاقشا دا. شىنىن ايتادى. بيپازداپ، مايموڭكەلەمەيدى.
باز ءبىر ارىپتەستەرى سەكىلدى اقشاسىن تولەسە بولدى، كەز كەلگەن جوبانىڭ تۇتقاسىن ۇستاپ، شاپقىلاي بەرمەيدى. ۇستانعان وزىندىك پوزيسياسى بار، سوعان ادال. سودان كەيىن دە ول بارىنە ۇنامدى. ويتكەنى مامان تۇگىلى، بىزدە ونداي ادامداردىڭ ءوزى وتە قات.
ول جوعارى سۇرانىسقا يە مامان. ءبارى ونى پايدالانعىسى كەلەدى. ءبىراق ول ءوزىن پايدالاندىرمايدى، كەرىسىنشە ول ءوزىن جاقسى پايدالانادى، ويتكەنى نارىق ءتىلىن جاقسى مەڭگەرگەن. ءوتىمدى ءونىم جاسايدى. قالاي دەيسىز عوي؟..
زامانا اعىمىنان قالىسپايدى. ترەندتەردى جىبەرمەيدى. الەۋمەتتىك جەلىدە بەلسەندى، بەدەلدى. سودان سوڭ دا تاۋەلسىز ءتۇرلى اتاق پەن سىيلىقتارعا يە. مىسالى، ول «ەل تۇلعاسى» جوباسىنىڭ تۇراقتى يەگەرى.
2012 جىلى «جىل مەسەناتى» اتاعىن جەڭىپ السا، ال 2016 جىلى «قوعامدىق قىزمەت» نومينيناسياسىن قانجىعىلادى.
ءبىراق سوڭعىسىندا دوسىمنىڭ ءوزى: «نەگىزى، بۇل ماراپاتقا اتىراۋداعى ماكس بوقايەۆ لايىق ەدى»، – دەدى. ونىسى دا دۇرىس. كەرەك كەزدە كەرەك ءسوزدى تابا بىلەدى.
ول
ءتىلى ورىسشا. ءبىراق باز بىرەۋلەر سەكىلدى «ورىسشامىن، ال قايتەسىڭ» دەپ بەتپاقتانىپ، بولىنبەيدى. اقتالىپ تا جاتپايدى. ايتەۋىر قازاققا كەلگەندە نيەتى ءتۇزۋ، پيعىلى جاقسى.
«قازاق ءتىلى ۇستەمدىك قۇرادى، شالاقازاق ماسەلەسى جويىلادى، 2025 جىلى مەملەكەتتىك ءتىل قولدانىسى 90 پروسەنت بولادى دەپ بولجايدى ول. باستىسى، بالالارىن قازاقشاعا بەرىپتى. ءوزى سولاي ايتقان ءبىر سۇقباتىندا. دەموكراتيا جارشىسى.
2002 جىلى «تاۋەكەلدەردى باعالاۋ توبى» ساراپتامالىق ۇيىمىن قۇرعان. سونىڭ باسشىسى. ساياسي جانە ينۆەستيسيالىق تاۋەكەلدەردىڭ قاۋىپ-قاتەرىن باعالاۋعا ماماندانعان. ونىڭ جارىق كورگەن 300-گە جۋىق عىلىمي ەڭبەگىنىڭ كوپ بولىگى وسى باعىتقا ارنالادى. دەمەك، ساياسي جانە ەكونوميكالىق دەرەكتەردىڭ تەرەڭىنە بويلاي بىلەتىن ادام.
شىنىن ايتقاندا، ماسەلەن، زەينەتاقى جۇيەسىندەگى بىلىقتى بۇگە-شىگەسىنە دەيىن دەمەي-اق قويالىق، ءبىراق ءبىرازىنىڭ بەتىن اشىپ بەرگەن بۇل – ەلىمىزدەگى ەكىنشى ادام.
ءبىرىنشىسى – ەسەپ كوميتەتىنىڭ بۇرىنعى ءتوراعاسى، قازىرگى كەزدە دەپۋتات ومارحان وكسىكبايەۆ. ودان سوڭ – وسى جىگىت. بولدى!
دوسىم ۇلت، يدەولوگيا، ءتىل، قازاق سىندى جالاڭ ادەمى سوزدەردەن بويىن اۋلاق ۇستايدى. ءويتىپ ۇرانداتپايدى. ۇرانداعاندارعا كوپ ىلەسپەيدى. كوپ كۇشىن سيفرلاردى قاۋزاۋعا جۇمسايدى. سەبەبى ول شيكىزاتقا باي ەلدىڭ حالقى دا باي بولۋ كەرەك دەپ سانايدى. حالىققا جاعداي جاساۋ كەرەك دەگەندى ءجيى ايتادى.
توبە بي
نەگىزىنەن، دوسىم ەل اقشاسىن وڭدى-سولدى جۇمساپ ۇيرەنىپ قالعاندار جەمقور جۋانداردىڭ اراسىنا باسىن سۇعىپ كورگەن بوتەننىڭ بىرەۋى! بىرەگەيى دەسە دە بولادى. ەستەرىڭىزدە بولسا، بىلتىر ءبىرىڭعاي جيناقتاۋشى زەينەتاقى قورىنىڭ ءتوراعاسى رۋسلان ەردانايەۆ ۇستالعان.
5 ملرد تەڭگە كولەمىندە قوماقتى اقشا جىمقىردى دەپ وعان ايىپ تاعىلدى. ارتىنان زەينەتاقى جيناعىنىڭ تاعى ءبىر قوماقتى بولىگى قۇندى قاعازىنا سالىنعان ءازىربايجان بانكى بانكروت بولاتىنى جاريالاندى. ءوستىپ زەينەتاقى جيناعىنا قاتىستى داۋ بۇرق ەتتى.
ۇكىمەت ۇلتتىق بانك جاۋاپ بەرسىن دەپ جالتاردى. باس بانكير دانيار اقىشيەۆ بولسا، ول دا جالت كەتتى. بار ايىپتى الدىنداعى باسشىعا جاپتى. ياعني، قايرات كەلىمبەتوۆكە. ول دا وزىنشە اقتالدى. ەشكىم العانىن مويىندامادى، ءبىراق زەينەتاقى جيناعىنداعى وراسان اقشا جوق. بۇل – ناقتى فاكتى. زەينەتاقى قورىنا قايتارىلماي „تۇرىپ„ قالعان يەسىز اقشا دا بولعان سەكىلدى ول ارادا.
ءسويتىپ ساياسي توپتار اراسىندا تازا تارتىس باستالدى. ءبىر-بىرىن تىڭداعىسى دا، اياعىسى دا جوق. ءبىر پاراسى اقىشيەۆقا جابىلدى، ءبىر پاراسى كەلىمبەتوۆكە جابىلدى. اراسىندا دۇربەلەڭدى پايدالانىپ، بۇعان قاتىسى جوقتار ءوز الدىنا ءبىر ايقاسىپ الدى.
ماقسات – وڭتايلى ساتتە وپىرىپ قالۋ سەكىلدى. ءتۇرلى سىبىس كەتتى. شىنى بار، وتىرىگى بار. قوعام كادىمگىدەي دۇرلىكتى. ءۇشىنشى تاراپسىز بولمادى. قايسىسىنىڭ ساسقانى، بىلمەدىك. اقىرى ءبىرىڭعاي جيناقتاۋشى زەينەتاقى قورى جانىنان قوعامدىق كەڭەس قۇرىلدى. وعان تاۋەلسىز ماماندار تارتىلدى. تارتىلعان ادامدار توبە بي قىپ ارالارىنان دوسىم ساتپايەۆتى سايلادى.
بۇل ارادا ساياسي توپتار وسى كەڭەستى پايدالانىپ، ارام ويىمىزدى جۇزەگە اسىرامىز دەگەن بولۋى كەرەك. ءبىراق دوسىم وڭاي شاعىلاتىن «جاڭعاق» ەمەس. كەرىسىنشە، ناعىز اڭگىمە، وسى كەڭەس قۇرىلعاننان باستالدى. كەڭەستى قۇرعاندار اقىرىندا ونى تاراتا الماي ابدەن الەك بولدى عوي ويتكەنى. نەگە دەيسىز بە؟.. «ترويا اتى» دەگەن اتاۋعا يە بولعان بۇل كەڭەس ءبارىن يت قىلدى. مينيستردەن باستاپ، ۇكىمەت باسىنا دەيىن...
دوسىم ىركىلمەدى، بىردەن قامشىنى باستى. ەشكىمگە قارامادى. كەلە سالدى دا، «حالىقتىڭ اقشاسىنان تارتىڭدار قولدارىڭدى» دەدى. ءبارىن ءبىلىپ تۇر عوي ويتكەنى. ءسويتىپ، ءبىرىڭعاي جيناقتاۋشى زەينەتاقى قورىنداعى اقشاعا ءتۇرلى مەملەكەتتىك جوبالاردى قارجىلاندىرۋعا موراتوريي ەنگىزۋدى ۇسىندى.
«ءوزىنىڭ زەينەتاقى جيناعىن قايدا ينۆەستيسيالاۋ كەرەكتىگىن قاتارداعى سالىمشىنىڭ ءوزى شەشۋى كەرەك، ال شەنەۋنىكتەردىڭ وندا شاتاعى بولماسىن!.. موراتوريي، ەڭ الدىمەن، وسى ءۇشىن كەرەك!».
تۋرا وسىلاي ايتتى. ءبارى توسىلىپ قالدى... ءبىراق بۇل دوسىمنىڭ سالعان «سالەمى» عانا بولاتىن.
داۋ
ودان سوڭ زەينەتاقى جيناعى ينۆەستيسيالانعان مەملەكەتتىك قۇرىلىمداردان جاۋاپ الىندى. تۋرا بىر-بىرلەپ. ولاردىڭ بەرگەن جاۋابى بىردەن ب ا ق بەتتەرىنە جاريالاندى. ءبارى جاريا ءجۇردى. كىم قۇرباندىققا شالىنعىسى كەلەدى دەيسىز؟ جان كەرەك بارىنە. انە، پىشاعىن جالاڭداتىپ وتىرعان ساياسي توپتار اناۋ. مىنا جاقتا، قىدىڭ-قىدىڭ ەتكەن تۇسىنىكسىز بىرەۋ، ساۋال جولداپ، جاۋاپ كۇتىپ وتىر. بەردى ەرىكسىز جاۋاپتارىن. بىرىنەن سوڭ ءبىرى...
ءبىراق، قايدان ءبىلسىن، ۇكىمەت باسىنىڭ، پارلامەنتتىڭ الدىنان ەش ىركىلىسسىز وتە بەرەتىن توم-توم قاعازدىڭ ول ارادان وتپەي قالاتىنىن. ءيا، ءبىر مينيسترلىك ماسقارا بولدى. ونى ايتاسىز، اننان-مىننان مىڭ قۇراپ دايىنداعان باياندامالارى وزدەرىنە بالە بوپ جابىستى. اقىرىندا ءمينيستردىڭ ءوزى اعايىنشىلاپ دوسىمعا زۆانداپ، كەشىرىم سۇراپتى. قويا عوي، ەندى، اكەتاي-كوكەتاي دەسە كەرەك. اۋزىنان قاعىنىپ جۇرگەن ورىنباسارىم – البەرت راۋ دەپتى. زەينەتاقى قورىنان بولىنەتىن 50 ميلليارد تەڭگە تۋرالى قاتەلەسىپ، مالىمدەمە جاساعان سول دەسە كەرەك.
جالتاقتىقتى يت ەتىنەن جەك كورەتىن دوسىم بۇعان كونە مە؟ ەرتەڭىندە بۇل تۋرالى الەۋمەتتىك جەلىدە جازبا جاريالادى. دۇرىس قوي. ەلدىڭ شىندىقتى بىلۋگە تولىقتاي قاقى بار.
سويتسە زەينەتاقى جيناعىنىڭ 50 ملرد (!) تەڭگەسىن ۇلتتىق بانك تەمىرجول سالاسىنا ينۆەستيسيالاعالى وتىر ەكەن. تابىس تابۋ ءۇشىن بولسا، ءبىر ءسارى عوي. «ينۆەستيسيا ماقساتى – وسى سالانى ساۋىقتىرۋ» دەپ تۇر دەيدى مينيسترلىك قۇجاتىندا. بۇل قالاي سوندا؟..
«ساۋىقتىرۋعا ارنالعان مەملەكەتتىك باعدارلامادا زەينەتاقى جيناعى اقشاسىن پايدالانۋ كىمنىڭ ويىنا كەلگەن؟ بۇل اقشا كوبەيتۋ ءۇشىن ينۆەستيسيالاۋعا بەرىلەدى، ساۋىقتىرۋ ءۇشىن ەمەس. سوندىقتان ۇكىمەتتىڭ بۇل شەشىمى زەينەتاقى سالىمشىلارىنىڭ مۇددەسىنە قايشى كەلەدى„ – دەپ جازبا جاريالاعان ساتپايەۆ بۇل شەشىم كىمدىكى دەپ ورتاعا سۇراق تاستايدى.
وسىلايشا كىنالى ىزدەستىرىلە باستايدى عوي. اپالاقتاپ ءجۇرىپ ءمينيستردىڭ دوسىمعا زۆانداپ جۇرگەنى دە سول. اقىرىندا «بۇل اقشا تەمىرجول سالاسىنا تۇككە كەرەك ەمەس» دەپ ۇكىمەت باسىن الا قاشتى. ءسويتىپ، زەينەتاقى جيناعىنىڭ 50 ملرد تەڭگەسى ورنىندا قالدى.
باستىسى، وسىلاي ابىر-دابىر بوپ جاتقاندا MEGA Silk Way «بايتەرەك Development» ارقىلى الىنعان 5 ملرد تەڭگە قارىز مەرزىمىنەن بۇرىن جابىلادى عوي. سويتسە بۇل دا زەينەتاقى جيناعىنىڭ اقشاسى بوپ شىققان. سوعان قاراعاندا ونى جاپقاندار ساتپايەۆقا تۇسىنىكتەمە بەرىپ، اۋرە بولعىسى كەلمەگەن سەكىلدى. قۇرىسىن، بىردەمەمىز شىعىپ قالا ما دەدى مە ەكەن؟ ارتى تازا بولسا، ءبۇيتىپ جانتالاسپاس ەدى عوي...
اقيقات
وسى كەزدە قازاقستان دامۋ بانكى ءوزى ارقىلى ينۆەستيسيالانعان زەينەتاقى جيناعىنىڭ 117،5 ملرد تەڭگەسىنىڭ جاي-كۇيى تۋرالى مالىمەت جاريا بولدى. قوعامدىق كەڭەس سۇراعان سوڭ، ارينە.
وسىلايشا زەينەتاقى جۇيەسىنىڭ تامىرىن باسىپ كورگەن دوسىم ءوزى قويعان «دياگنوزدى» جاريالاي باستادى.
«بىرىنشىدەن، مىنا قۇرعان ءبىرىڭعاي جيناقتاۋشى زەينەتاقى قورى دەگەندەرىڭ دۇرىس ەمەس. بۇل داپ-دايىن «ءاميان»، باسقا ەشتەڭە ەمەس. زەينەتاقى اقشاسىمەن ءبىرىڭعاي قور اينالىسا باستاعان كەزدە-اق «زەينەتاقى قازانىنا» ۇكىمەت، ءتۇرلى مينيسترلىكتەر، كۆازيمەملەكەتتىك قۇرىلىمدار «قاسىقتارىن» الا جۇگىردى. بۇعان زەينەتاقى اقشاسىن دەپوزيت تۇرىندە ساقتاپ، پايدا تاباتىن بانكتەردى دە قوسىڭىز. مۇنى ءبىز بىلمەيدى، اڭعارمايدى دەپ ويلايسىزدار ما؟..
ءبىرىڭعاي جيناقتاۋشى زەينەتاقى قورىنا ءبارىن بىرىكتىرگەن سوڭ، اياق-استىنان 90 ملرد تەڭگە زەينەتاقى جيناعى جويىلاتىنىن (سپيسانياعا كەتەتىنى) ءمالىم ەتتىڭىزدەر. بۇل – قازاقستان حالقىنىڭ ادال ەڭبەگىمەن تاپقان اقشاسىنىڭ 10 پروسەنتى. «تەسىك شەلەكتەن» ازىرگە وسىلاي توناپ جاتىرسىزدار»، – دەپ ءبىر قايىرعاندا ،بىرنەشە شەندىنىڭ جۇرەگى توقتاپ قالا جازدادى.
مىناۋ ءبىر دۇلەي عوي دەستى. ءبىراق وعان توقتاعان دوسىم جوق.
«ۇكىمەت باسى، زەينەت جاسىن ۇلعايتۋعا كەزەڭ-كەزەڭمەن كىرىسىپ كەتىپسىزدەر، ءۇن-تۇنسىز عانا. سىزدەرگە مۇنداي قۇزىردى كىم بەردى؟.. حالىقتان سۇرادىڭىزدار ما، كەلىسەسىزدەر مە بۇعان دەپ. جوق. ال دەموكراتيالىق قوعامدا مۇنداي ارەكەتكە جول جوق» دەپ تاعى ءبىر سالدى.
ونىسى راس ەندى. بيىل، ياعني 2018 جىلى ايەلدەردىڭ زەينەت جاسى التى ايعا كوتەرىلىپ، 58 جاس التى ايدا شىعاتىن بولدى. ال كەلەسى جىلى ايەلدەر 59-دان ەكى اي اسقاندا شىقپاق. بۇعان قوعام تۇبەگەيلى نارازى.
ءبىراق ونىمەن ساناسىپ جاتقان بيلىك جوق. وسىنى شىجعىرىپ بەتتەرىنە باستى. جالقىدان باستالعان سىن جالپىعا وسىلاي كوشكەندە ۇكىمەتتىڭ ءوزى دە ساسا باستادى.
«بولىسىڭدەر اقشانى حالىقپەن! تولىقتاي قاقىسى بار وعان. بارىنە بەر دەمەيمىن، ءبىراق بىرلى-ەكىلى جاعدايدى جاساۋعا بولادى عوي. نە بولدى سونشا؟..». ءوستىپ ۇستەلدى توقپاقتاعان قوعامدىق كەڭەس ءوز ۇسىنىستارىن العا تارتتى.
«مىسالى، ەگەر سالىمشى وتە اۋىر دەرتكە شالدىقسا. ول ءبارىبىر زەينەت جاسىنا جەتە المايدى، وندا ونى نەگە كۇتۋى ءتيىس؟ قازىردەن جيناعىن ءوز ەمىنە پايدالانسىن!
ارينە، ۇكىمەت دەنساۋلىق ساقتاۋ سالاسىنداعى پاراقورلىققا سىلتەپ، بۇل ۇسىنىستان باسىن الا قاشۋى مۇمكىن. الايدا بالىق باسىنان ءشىريدى ەمەس پە؟ ەگەر شەنەۋنىكتەردىڭ ءوزى جەمقورلىققا جول بەرىپ وتىرسا، وندا ەل ازاماتتارىنا ايىپ تاعۋدىڭ قاجەتى قانشا؟
ۇكىمەت ءوز جۇيەسىنە سەنىمسىزدىكپەن قاراسا، وندا ولار سالىمشىلاردى زەينەتاقى جۇيەسىنە يەك ارتۋعا قالاي شاقىرادى؟
وسىنداي بەلگىلى ءبىر سەبەبى بار توپتارعا زەينەتاقى جيناعىنداعى اقشاسىن مەرزىمىنەن بۇرىن شەشىپ الۋعا مۇمكىندىك بەرسىن. ونسىز دا ءقازىر بۇل اقشا تاجىريبە كەزىندە جوعالىپ، قۇنسىزدانىپ جاتىر. وعان قوسا، ونىڭ بولاشاقتا ساقتالىپ قالاتىنىنا دا ەشكىم كەپىل بەرە المايدى. راس قوي. ەڭ قۇرىعاندا، شوتىندا 5 ملن تەڭگەسى بارلاردان باستاسىن.
سوندا ادامدار زەينەتاقى تولەمى قانداي دا ءبىر قوسىمشا سالىق ەمەس، اۋىرعان كەزدە، باسقا قيىن كۇندەر تۋعاندا پايدالانۋعا بولاتىن ءوز اقشاسى ەكەنىن تۇسىنەدى. وندايدا جۇمىسشىلاردا كوپتەپ ەڭبەك ەتۋگە، جيناق جاساۋعا دەگەن قۇلشىنىسى پايدا بولادى. ال قازىرگى تۇرىمەن الىسقا بارا المايمىز!».
وسىلاي بىلش ەتكىزدى. ءبىراق بۇعان قارسى تاراپ شىدامادى. شىجبالاقتاي باستادى.
ۇرەي
اقىرى بۇل بالەنى سۇڭقىلداتپاي كوزىن قۇرتايىق دەپ شەشكەن سەكىلدى. ارينە، اشىق كەتۋگە ەشكىم بەل بۋمادى. ءبارى جابىلىپ، وعان ءنۇربيبىنى ايتاقتادى. ءنۇربيبى دەگەنىمىز الدىندا جەمقورلىق داۋىنا بايلانىستى تۇرعىن ءۇي قۇرىلىس جيناق بانكىنەن كەتكەن باسشى. سوعان قاراماستان، قالاي ەكەنى بەلگىسىز، وسى ءبىرىڭعاي جيناقتاۋشى زەينەتاقى قورى باسقارماسىنىڭ تىزگىنىن ۇستاپتى. تولىق ءاتى-جونى – ءنۇربيبى ناۋرىزبايەۆا (تومەندە سۋرەتتە).
ارينە، وسى قور جانىنان قۇرىلعان كەڭەس بولعان سوڭ ولار سول باسشىسىمەن تىكەلەي جۇمىس ىستەدى. ارادا ناقتى نە بولعانى بەلگىسىز.
بەلگىلىسى، دوسىم ساتپايەۆ «كەتەم» دەپ شورت كەتتى. كەتتى دە. دوسىم عانا ەمەس، ونىمەن قوسا وسى كەڭەسكە مۇشە، ەكونوميست راحىم وشاقبايەۆ پەن «قارجىلىق ەركىندىك» قامقورلىق كەڭەسىنىڭ باسشىسى بوتا جۇمانوۆا دا كەتتى. ءبىر ايعا جۋىق دوسىمنىڭ «شوكوۆايا تەراپياسىنان» وتكەن جۋاندار، ارينە بۇعان قۋاندى. ارقالارىنان جۇك ءتۇسىپ، كادىمگىدەي كەۋدەلەرىن كەرىپ تىنىستاپ قالدى. كۇدىك تە، قورقىنىشتارى دا اقىرىنداپ سەيىلدى.
ارينە، بۇل جايت ۇكىمەتكە جايسىز بولعانمەن جاقسى جارناما بولدى. ەل قۇلاعىن ءتۇرىپ وتىردى. بىرەۋى دە تىسقارى قالمادى.
جەلىدە وسى تاقىرىپ تالقىسىنا تايلى-تاياعى قالماي بار قازاق اتسالىستى. ءبارى ايتتى ءوز ويىن. ورىسشا سويلەيتىنى دە، قازاقشا سويلەيتىنى دە. دامىل بولمادى. دوسىمنىڭ جازباسىن بولىسكەندەردى كورسەڭىزدەر. بارلىق ب ا ق كوشىرىپ باستى ونى. قازاقشالارى مينۋت-سەكۋند سالماي اۋدارىپ بەرىپ وتىردى. بۇيرىق كەلىپ، كۇنى ءتۇسىپ تۇرعاندا گوسزاكازدى وسىنداي قۇلشىنىسپەن ورىنداماعان شىعار ءبىر دە ءبىر ب ا ق. مىنە، بۇل ەشقانداي دا جوبا ەمەس. ساياسي الاڭداعى تازا ويىن، تازا تارتىس...
ءبىر قىزىعى، دوسىم كەتكەن سوڭ بۇل كەڭەستىڭ ءۇنى شىقپادى. زەينەتاقى جيناعىنا قاتىستى ءسوزتارتىس تا ساپ تىيىلدى. ءبىراق ءبىرازعا دەيىن عانا…
مىنە، وتكەن ايدىڭ سوڭىنان باستاپ زەينەتاقى جيناعىنداعى بىلىق تاعى بىقسي باستادى. كەشە عانا زەينەتاقى جيناعىنىڭ ميللياردتارى سالىنعان ابدي كومپانياسى تەحنيكالىق دەفولتقا ۇشىرادى. ال الگى رۋسلان ەردانايەۆ «ۇرلامادىم، بانك شوتىندا سول كۇيى تۇر» دەگەن 5 ملرد تەڭگە سو كۇيى قايتپاعان. ورتادان بىرەۋلەر قارپىپ كەتتى مە، ول جاعى بەلگىسىز. بەلگىلىسى، ءبىرىڭعاي جيناقتاۋشى زەينەتاقى قورى بۇرىنعى باسشى ەردانايەۆتىڭ ۇستىنەن تاعى ارىزدانباق.
سەبەبى قور دەر ۋاقىتىندا قايتپاعان اقشانىڭ كەسىرىنەن 1،7 ملرد تەڭگەگە شىعىنعا ۇشىراعان كورىنەدى. ەندى سونى دا تولەسىن دەپ دىكىڭدەپ جاتىر. ءيا، زەينەتاقى جيناعىنا قاتىستى داۋ قايتادان شيەلەنىسىپ، كۇردەلەنە تۇسۋدە. ءقازىردىڭ وزىندە قور 20 ەميتەنتتەن جالپى سوماسى 41،1 ملرد تەڭگەنى قايتارا الماي، اڭىرىپ وتىر. بۇلار قايدان شىققان اقشا؟ نەگە مۇنشا كوپ سوما؟ ەل ءتۇسىنىپ بولمايدى.
ءبىر دوسىم كەرەك بوپ تۇر بۇل اراعا. ءبارىن جىپكە تىزگەندەي ەتىپ ءتۇسىندىرىپ، ءار شيمايدى ەرىنبەي بىر-بىرلەپ شيىراتىن. بالكىم، الگى قوعامدىق كەڭەسكە دوسىم قايتىپ كەلەر؟ ءبىراق، قايدام؟..
ءقازىر دوسىم نە ىستەپ ءجۇر دەيسىزدەر مە سوندا؟ ول بوسقا جۇرگەن جوق. جەكەمەنشىك مادەني-اعارتۋشىلىق قور قۇرىپ العان. سول قوردىڭ قولداۋىمەن جاقىندا وتاندىق كينوتەاترلاردا «ىستامبۇلدان شىققان قازاق» دەرەكتى ءفيلمىنىڭ تۇساۋى كەسىلدى.
تاعدىر قالاۋىمەن وتانىنان جىراقتاپ قالعان قازاقتار جايىندا. وسى سەكىلدى رۋحانياتقا بەرەتىن ازىقتى ءبىر جەرگە جيناقتاپ، ول ەل مادەنيەتىنە ۇلەس قوسىپ جاتىر...
كامشات ساتييەۆا
ارنايى "قالا مەن دالا" گازەتى ءۇشىن
