الايدا ءبىر بالى عانا جەتپەي، جولى بولماعان ول ءسابيت مۇقانوۆ اتىنداعى سولتۇستىك قازاقستان وبلىستىق قازاق دراما تەاترى جانىنان اشىلعان اكتەرلىك شەبەرلىك كۋرستارىنا امالدىڭ جوعىنان بارا سالعان.
ەندى مىنە، ونىڭ سومداعان باستى رولىنە كانن فەستيۆالىندە الەمدىك كينو مايتالماندارىنىڭ وزدەرى اياقتارىنان تىك تۇرىپ قول شاپالاقتادى.
شىمكەنتتىڭ تۋماسى، رەجيسسەر سەرگەي دۆورسيەۆوي مەن سامال ەسلاموۆانىڭ بۇل كاننداعى ەكىنشى جەڭىسى.
وسىدان ون جىل بۇرىن سامال باستى ءرولدى ويناعان «تيۋلپان» ءفيلمى دە ءبىر اتالىم بويىنشا جەڭىمپاز اتانعان ەدى. اراعا ون جىل سالىپ مۇنداي قۇرمەتكە ونىڭ «ايكا» اتتى تۋىندىسى دا لايىق دەپ تانىلدى.
سامال وندا ماسكەۋگە كەلگەن گاستوربايتەر قىرعىز قىزىن سومدايدى. جات ەلدە بالاسىن بوسانعان كەيىپكەردىڭ تاعدىرى قازىلار القاسىن بەيجاي قالدىرمادى.
بىردەن «ەڭ ۇزدىك ايەل ءرولى» اتالىمى بويىنشا باس جۇلدەنى بەردى. 34 جاستاعى سامال ەسلاموۆا سولتۇستىك قازاقستانداعى ارالاعاش اۋىلىندا تۋىپ وسكەن. مەكتەپ بىتىرگەن سوڭ اكەسى ونى قالاعا جۋرناليستيكا فاكۋلتەتىنە تۇسىرۋگە اكەلىپتى.
جولى بولماي، جەرگىلىكتى تەاترعا باس سۇققان. كەيىن سامال ماسكەۋدەگى گيتيس-تى ءتامامداپ، رەجيسسەر سەرگەي دۆورسيەۆويمەن جۇمىس ىستەي باستايدى. ونىڭ اتا- اناسى پەتروپاۆل قالاسىنا ءبىر بولمەلى پاتەرگە اۋىلدان جۋىردا كوشىپ كەلگەن. باقىتتان باسى اينالعان ءىلياس پەن گۇلمايرانى كورشى-قولاڭمەن بىرگە وبلىس اتقامىنەرلەرى دە قۇتتىقتادى.
– ەل-جۇرتىمىز قۋانىپ جاتقاندا، بۇكىل حالقىمىزعا ريزامىن. ءبىزدىڭ عانا قىزىمىز ەمەس، وسى وبلىستىڭ اۋداننىڭ، ارالاعاشتىڭ قىزى. سوندىقتان ءبىز قۋانىشتىمىز. بۇكىل جۇرتقا ريزامىز، – دەيدى سامال ەسلاموۆانىڭ اكەسى ءىلياس ەسلاموۆ.
اۆتور: گۇلميرا تاسبولات قىزى
