بيىل شىعىس قازاقستان وبلىسىندا بالاباقشالاردا تاعى 1500-گە جۋىق جاڭا ورىن اشۋ جوسپارلانىپ وتىر. وبلىستىق اكىمدىكتە «ءار بالاعا قولجەتىمدى ساپالى ءبىلىم» اتتى ۇلتتىق ەسەپتىڭ وڭىرلىك جول كارتاسىن جۇزەگە اسىرۋ ماسەلەلەرى تالقىلاندى،- دەپ حابارلايدى Dalanews.kz
باستى تاقىرىپتار – بالاباقشالار مەن مەكتەپتەردە جاڭا ورىندار اشۋ، ينكليۋزيۆتى جانە قوسىمشا ءبىلىم بەرۋدى دامىتۋ، سونداي-اق مەكتەپ ينفراقۇرىلىمىن جاڭارتۋ.
شقو ءبىلىم باسقارماسىنىڭ باسشىسى ينەسسا چەرنىشيەۆانىڭ ايتۋىنشا، وتكەن جىلى وڭىردە 1970 جاڭا ورىن اشىلدى، ال 2025 جىلى تاعى 1499 ورىن قوسۋ كوزدەلگەن، ونىڭ 127ء-سى ءقازىردىڭ وزىندە دايىن. الايدا وبلىستا بالاباقشا كەزەگىندە تۇرعان بالالار سانى الدەقايدا كوپ – 2-3 جاس ارالىعىنداعى شامامەن 2000 بالا.
"اتا-انالارعا ىڭعايلى بولۋ ءۇشىن ءبىز «بالاباقشا» سيفرلىق پلاتفورماسىن ەنگىزىپ جاتىرمىز، وندا بالالاردى تىركەپ، كەزەككە قويۋعا بولادى. سونداي-اق ءبىلىم بەرۋ ۇدەرىسىنە بالانىڭ سيفرلىق دامۋ كارتاسى ەنگىزىلدى. پەداگوگتەردى دايارلاۋ ءۇشىن 10 بىلىكتىلىك ورتالىعى اشىلدى. ناۋرىز ايىندا وسكەمەندە ۆاۋچەرلىك قارجىلاندىرۋدىڭ پيلوتتىق جوباسىن ىسكە قوسامىز"، – دەدى ينەسسا الەكساندروۆنا.
وبلىستا بارلىعى 343 مەكتەپ بار، ولاردىڭ باسىم بولىگى شاعىن جيناقتى. اپاتتىق نەمەسە ءۇش اۋىسىمدى مەكتەپتەر جوق، ءبىراق ورىن تاپشىلىعى 6 مىڭنان اسادى. 2024 جىلى وسكەمەندە 600 ورىندىق جاڭا مەكتەپ اشىلدى، بيىل تاعى 500 ورىندىق ەكى مەكتەپ سالىنباق. سونىمەن قاتار 2100 ورىنعا ارنالعان بەس جايلى مەكتەپتىڭ قۇرىلىسى اياقتالدى، ال 900 ورىندىق ەكى مەكتەپتىڭ قۇرىلىسى جالعاسۋدا.
مەكتەپ ينفراقۇرىلىمى دا جاڭارتىلىپ جاتىر. 50 مەكتەپتە اسحانالار، كىتاپحانالار مەن وقۋ كابينەتتەرى جوندەلدى. بارلىق مەكتەپتەر ينتەرنەتكە قوسىلعان، ال 109 مەكتەپ «الەۋمەتتىك ءاميان» جۇيەسىنە ەنگىزىلمەك. بۇل باستاما از قامتىلعان وتباسىلارعا مەكتەپ فورماسى مەن وقۋ قۇرالدارىن ساتىپ الۋعا مەملەكەتتىك قولداۋ الۋعا مۇمكىندىك بەرەدى.
2023-2024 وقۋ جىلىندا ءبىلىم بەرۋ سالاسىنا دەمەۋشىلەردەن 2،6 ملرد تەڭگە تارتىلدى. بيىل وڭىردەگى 21 مەكتەپتە كۇردەلى جوندەۋ جۇمىستارى جۇرگىزىلەدى. جالپى، مەكتەپتەردى جاڭارتۋعا شامامەن 5 ملرد تەڭگە قاجەت.
جۇمىسشى ماماندىقتارى جىلى اياسىندا 2024 جىلدىڭ قىركۇيەگىنەن باستاپ ءوڭىر مەكتەپتەرىندە «بولاشاق ماماندارى» بەيىندى وقىتۋ ورتالىقتارى اشىلا باستايدى. بۇل ورتالىقتار ءار اۋداننىڭ كادرلىق قاجەتتىلىكتەرىنە ساي قۇرىلماق.
وبلىس اكىمى نۇرىمبەت ساقتاعانوۆ وڭىردەگى ءبىلىم بەرۋ سالاسىندا قوردالانعان ماسەلەلەر بار ەكەنىن اتاپ ءوتىپ، باسقارما باسشىلىعىن جۇمىستى ءتيىمدى ۇيىمداستىرۋعا شاقىردى. سونىمەن قاتار، مەكتەپتەردەگى ءتارتىپ ماسەلەسىن دە نازاردان تىس قالدىرماۋ كەرەكتىگىن ايتتى.
"ديرەكتورلاردىڭ جۇمىس تيىمدىلىگى تەك ۇبت ناتيجەلەرى بويىنشا عانا ەمەس، بالالاردىڭ قانشالىقتى ۇيىمشىل جانە ءتارتىپتى ەكەندىگىنە قاراي دا باعالانادى. ەگەر بۇل باعىتتاعى جۇمىستاردى ۇيلەستىرۋگە ءمان بەرمەسەك، لايىقتى ۇرپاق تاربيەلەۋ تۋرالى ايتۋ قيىن"، – دەدى وبلىس اكىمى.
تاعى ءبىر وزەكتى ماسەلە – ينكليۋزيۆتى ءبىلىم بەرۋدى دامىتۋ. وڭىردە ەرەكشە ءبىلىم بەرۋ قاجەتتىلىگى بار 12 مىڭنان استام بالا تۇرادى. ولارعا 4 پسيحولوگيالىق-مەديسينالىق-پەداگوگيكالىق كەڭەس بەرۋ ورتالىعى مەن 5 ارنايى بالاباقشا قىزمەت كورسەتۋدە. سونىمەن قاتار 9 اۋداندا پسيحولوگيالىق-پەداگوگيكالىق تۇزەتۋ كابينەتتەرى اشىلعان. 2025 جىلى كاتونقاراعاي جانە مارقاكول اۋداندارىندا وسىنداي جاڭا كابينەتتەر اشۋ جوسپارلانىپ وتىر.
