«قازاقستاندا ايەلدەر ەرلەرگە قاراعاندا 33% از جالاقى الادى، بۇل كورسەتكىش جاھاندىق نورمادان جوعارى. بۇل ەلدە ايەلدەر جوعارى لاۋازىم يەلەنىپ، عىلىم، ينجەنەريا سەكىلدى اقشاسى كوپ قىزمەتتەردە ىستەي المايدى، جەكە كاسىبىن باسقارۋ مۇمكىندىگى دە جوق. قازاقستاندا، جالپى ورتا ازيادا نازىك جاندار ءۇي تىرلىگى مەن بالا كۇتىمىنە ەرلەرگە قاراعاندا 2،6 ەسە كوپ ۋاقىتىن جۇمسايدى. ەگەر ەر ادامدار وسى مىندەتتەرگە كوبىرەك ۋاقىت بولسە، جۇبايلارىندا دا تابىستى جۇمىس ىستەۋگە مۇمكىندىك بولاتىن ەدى»، — دەدى بۇۇ وكىلى.
ول ەڭبەكاقى ايىرماسى قازاقستاننىڭ ەكونوميكالىق ىنتىماقتاستىق جانە دامۋ ۇيىمى (ەىدۇ) مەن الەمنىڭ 30 دامىعان ەلىنىڭ قاتارىنا كىرۋ جولىندا وتە ماڭىزدى ماسەلە ەكەنىن اتاپ ءوتتى.
«بۇل كورسەتكىشتەرگە قول جەتكىزۋ ءۇشىن قازاقستان ايەلدەردىڭ جاعدايىن جاقسارتۋى كەرەك. جاھاندىق رەيتينگتە قازاقستان 52-ورىندا، بۇل ەىدۇ-نىڭ كەيبىر ەلىنەن جوعارى. ءبىراق تەندەنسيا سونشالىقتى جاقسى ەمەس. سوڭعى ەكى جىلدا قازاقستان ءۇش ورىن، كەيىن تاعى ءبىر ورىن جوعالتتى. قازاقستان ەكونوميكالىق جانە ساياسي سالالاردا ايەلدەر ءۇشىن مۇمكىندىكتەردى ۇلعايتقانى دۇرىس. باسقا ەلدەرمەن سالىستىرعاندا (ەىدۇ)، بۇل ەكى ينديكاتور قازاقستاندا ناشار»، — دەپ ءتۇسىندىردى كونكييەۆيچ.
بۇۇ وكىلى جاھاندىق سىن-قاتەرلەرگە توتەپ بەرۋ ءۇشىن اتالعان كورسەتكىشتەر ماڭىزدى ەكەنىن مالىمدەدى. ايتۋىنشا، ەڭبەك نارىعىندا ايەلدەردىڭ كوبەيۋى جاھاندىق دەڭگەيدە ءجىو مولشەرىن 2025 جىلعا دەيىن 28 تريلليون دوللارعا ۇلعايتۋعا مۇمكىندىك بەرەدى.
«قازاقستاندا ايەلدەردىڭ شەشىم قابىلداۋعا قاتىسۋ ينديكاتورى جامان ەمەس. ماجىلىستە – 27،1% ايەلدەر، بۇل جاھاندىق نورمادان دا (23%) جوعارى. دەسەك تە، قازاقستان عالامدىق دەڭگەيدە نەبارى 58-ورىندا تۇر. باسا نازار اۋداراتىن تاعى ءبىر ينديكاتور مىناۋ: 18 ءمينيستردىڭ اراسىندا – ءبىر عانا ايەل. وكىنىشكە قاراي، بۇل قازاقستاندى تەك 158-ورىنعا قويادى. بۇل وتە تومەن كورسەتكىش»، — دەدى ول.
جالپى، بۇۇ قازاقستاننىڭ دۇرىس باعىتتا كەلە جاتقانىن، وتباسىلىق جانە گەندەرلىك ساياساتتا جاڭا تۇجىرىمدامالار قابىلدانعانىن تىلگە تيەك ەتتى.
