قارجى ساراپشىسى ولجاس ءبايدىلدينوۆ الەۋمەتتىك جەلىدە تاعى دا سىنعا ۇشىرادى. اسقار باتالوۆتىڭ جارىنا بەرگەن سۇحباتىندا ول رەسەيدىڭ ۋكرايناعا جاساعان شابۋىلىن اقتاپ الۋعا تىرىسقان، دەپ حابارلايدى Dalanews.kz.
ءبايدىلدينوۆ دەپۋتات ەرمۇرات ءباپيدىڭ ۋكراينا رەسەي اگرەسسياسىنان قورعانۋعا ءماجبۇر ەكەنى جايلى ايتقان سوزدەرىن ەسكە الدى.
“ەرمۇرات ءباپي دەگەن دەپۋتاتىمىز ايتادى: ءبىز ۋكراينادان بىردەڭە تالاپ ەتۋگە قۇقىمىز جوق، ويتكەنى ول ءوز تەرريتورياسىنا باسىپ كىرگەن اگرەسسورعا قارسى قاسيەتتى سوعىس جۇرگىزىپ جاتىر. مەنىڭشە، پارلامەنت اگرەسسوردى سيپاتتاۋ نەمەسە “اگرەسسور ەمەس” دەپ باعالاۋ قۇقىعىنا يە بولا المايدى. قاسيەتتى سوعىس نەمەسە قاسيەتتى ەمەس سوعىس دەگەننىڭ كريتەرييى قانداي؟ لوگيكالىق تۇرعىدان قاراساق، پارلامەنت – زاڭ شىعارۋشى ورگان عوي” – دەپ پىكىر بىلدىرەدى ولجاس.
سۇحبات الۋشى اقمارال باتالوۆا دا ساراپشىنىڭ سوزىنە قوسىلىپ، رەسەيدى قورعاۋعا تىرىسقان. ول بۋچادا بولعان وقيعالار “ويدان شىعارىلعان” دەپ ايتادى.
“قازاقستاندىق دەپۋتات كورشى، ستراتەگيالىق سەرىكتەس مەملەكەتتى "اگرەسسور" دەپ اتاپ وتىر. بۇل وتە وعاش كورىنەدى. سونىمەن قاتار سىزدەر ۋكرايناعا كيىز ۇيلەر جەتكىزدىك دەپ ايتتىڭىزدار. العاشقىسى بۋچادا بەرىلدى، وندا ارنايى وپەراسيا وتكىزىلگەن. بۇل – ۋكراينا ۇقك جۇرگىزگەن وپەراسيا. بۇل فاكتىنى باتىس ەلدەرى مويىندادى. سوندىقتان بۋچا جايلى ماكرون عانا كەزدەيسوق ءسوز ەتتى. بۇگىنگى كۇنگە دەيىن دەرەكتەردەن، بەينەماتەريالداردان، الەۋمەتتىك جەلىدەن كورىنىپ تۇرعانداي، ورىستار ەشكىمدى ولتىرمەگەن. بۋچادا ورتالىق كوشەلەردە شاحمات ءتارىزدى قويىلعان دەنەلەر اسكەريلەر نەمەسە رەسەيدى قولداعان ادامدار، ولاردى جاي عانا اتىپ تاستاعان”، – دەيدى باتالوۆا.
الايدا ول وسى وقيعالارعا كۋا بولعانداردى تىلگە تيەك ەتسە دە، ناقتى فاكتىلەردى كەلتىرمەيدى.
ايتا كەتەيىك، سۇحبات الۋشى اقمارال باتالوۆانىڭ جەكە باعدارلاماسىنا كوپ جاعدايدا رەسەيشىل ساراپشىلار قوناق بولىپ كەلەدى.
ەسكە سالايىق، قارجى ساراپشىسى ولجاس ءبايدىلدينوۆ سىننان كوز اشپاي كەلەدى. بۇعان دەيىن ول قوعامدىق كولىكتەردەگى جولاقىسى 500 تەڭگە بولۋى ءتيىس دەپ پىكىر بىلدىرگەن ەدى. اراعا ۇزاق ۋاقىت سالماي، “قازاقستان انتيرەسەيلىك باعىتقا بەت الدى” دەگەن مالىمدەمەسىمەن تاعى دا قوعامنىڭ اشۋىنا ءتيدى. ال 2022 جىلى قاندى قاڭتار وقيعاسى قارساڭىندا ساراپشى ولجاس ءبايدىلدينوۆ سۇيىتىلعان گاز باعاسىنىڭ قىمباتتاۋىنا بايلانىستى ەل اراسىندا پىكىرتالاس تۋدىردى. ول كەزدە ءبايدىلدينوۆ “گاز باعاسىنىڭ 15–20 تەڭگەگە ءوسۋى ايتارلىقتاي شىعىن ەمەس، ءبىز ينتەرنەتكە ودان دا كوپ تولەيمىز” دەپ مالىمدەپ، حالىقتى “قوعامدىق كولىككە كوشۋگە” شاقىرعان.
