الماتىدا قالا قۇرىلىسىنا قاتىستى وتكەن قوعامدىق تالقىلاۋ بارىسىندا بەلسەندى اباي ەرەكەنوۆ شارانىڭ زاڭ تالاپتارىنا ساي وتكىزىلمەگەنىن ايتىپ، قارسىلىق ءبىلدىردى، دەپ حابارلايدى Dalanews.kz
ەرەكەنوۆتىڭ ايتۋىنشا، ءىس-شارانىڭ رەگلامەنتى مەن ۇيىمداستىرۋ ءتارتىبى زاڭسىز.
«بۇل شارانىڭ رەگلامەنتى دە، قول جيناۋ ۇدەرىسى دە زاڭعا سايكەس ەمەس. الماتى قوعامى اتىنان ايتامىن: بۇل – قوعامدىق تىڭداۋ ەمەس. سەبەبى باس جوسپاردىڭ ماتەريالدارى زاڭ بويىنشا تىڭداۋلاردان 30 كۇن بۇرىن اشىق جاريالانۋى ءتيىس، الايدا ەشتەڭە جاريالانعان جوق. سونىمەن قاتار ۇسىنىلعان ماتەريالدار تومەن ساپالى پرەزەنتاسيادان اسپايدى. ق ر زاڭى، ەكولوگيالىق كودەكس، ساۋلەت-قۇرىلىس كودەكسى، ازاماتتىق جانە دەنساۋلىق ساقتاۋ كودەكسى بۇزىلىپ وتىر»، – دەدى بەلسەندى.
بەلسەندى بۇل ارەكەتتى سىبايلاس جەمقورلىق كورىنىسى بار الاياقتىق دەپ باعالادى.
"انتيكوردىڭ انىقتاماسىنا سايكەس، قازاقستان رەسپۋبليكاسىنىڭ زاڭدارىنا ساي قوعامدىق تىڭداۋلار مەن تالقىلاۋلاردىڭ وتكىزىلمەۋى – سىبايلاس جەمقورلىقتىڭ كورىنىسى بولىپ سانالادى. اتالعان ءىس-شارا وتكەننەن كەيىن ءۇش كۇن ىشىندە اكىمدىك قوعاممەن بىرلەسىپ، حاتتاما جوباسىن كەلىسۋى ءتيىس. سول حاتتامادا قوعامدىق تىڭداۋلار وتكىزۋ تۋرالى تالاپ ناقتى كورسەتىلۋى كەرەك. ەگەر بۇل تالاپ حاتتاماعا ەنگىزىلمەسە، قوعام وكىلدەرى سوتقا جۇگىنۋ قۇقىعىن وزىندە قالدىرادى"، - دەدى ەرەكەنوۆ.
وقيعا بارىسىندا ەرەكەنوۆ ءسوز سويلەپ، قوعامدىق تىڭداۋدى توقتاتۋعا ارەكەت جاساعاننان كەيىن پوليسيا ونى زالدان شىعارىپ، ءبىراز ۋاقىتتان سوڭ بەلسەندى قايتا ورالدى.
ال الماتى اكىمدىگى قوعامدىق تالقىلاۋلاردىڭ زاڭعا سايكەس جۇرگىزىلىپ جاتقانىن حابارلادى. قالا ساۋلەت جانە قالا قۇرىلىسى باسقارماسىنىڭ باسشىسى الماس جاڭبىرشىنىڭ ايتۋىنشا، تالقىلاۋلار قازاقستان رەسپۋبليكاسى يندۋستريا جانە ينفراقۇرىلىمدىق دامۋ ءمينيسترىنىڭ 2020 جىلعى №505 بۇيرىعىمەن بەكىتىلگەن قاعيدالارعا سايكەس وتكىزىلەدى. حابارلاندىرۋ جاريالانعاننان كەيىن تالقىلاۋلار بەلگىلەنگەن مەرزىمدە وتۋدە، ال بارلىق قاجەتتى اقپارات پەن قۇجاتتارعا قاتىسۋ مۇمكىندىگى قاراستىرىلعان.
