Almatyda qala qurylysyna qatysty ótken qoǵamdyq talqylaý barysynda belsendi Abai Erekenov sharanyń zań talaptaryna sai ótkizilmegenin aityp, qarsylyq bildirdi, dep habarlaidy Dalanews.kz
Erekenovtiń aitýynsha, is-sharanyń reglamenti men uiymdastyrý tártibi zańsyz.
«Bul sharanyń reglamenti de, qol jinaý úderisi de zańǵa sáikes emes. Almaty qoǵamy atynan aitamyn: bul – qoǵamdyq tyńdaý emes. Sebebi Bas jospardyń materialdary zań boiynsha tyńdaýlardan 30 kún buryn ashyq jariialanýy tiis, alaida eshteńe jariialanǵan joq. Sonymen qatar usynylǵan materialdar tómen sapaly prezentatsiiadan aspaidy. QR zańy, Ekologiialyq kodeks, Sáýlet-qurylys kodeksi, Azamattyq jáne Densaýlyq saqtaý kodeksi buzylyp otyr», – dedi belsendi.
Belsendi bul áreketti sybailas jemqorlyq kórinisi bar alaiaqtyq dep baǵalady.
"Antikordyń anyqtamasyna sáikes, Qazaqstan Respýblikasynyń zańdaryna sai qoǵamdyq tyńdaýlar men talqylaýlardyń ótkizilmeýi – sybailas jemqorlyqtyń kórinisi bolyp sanalady. Atalǵan is-shara ótkennen keiin úsh kún ishinde ákimdik qoǵammen birlesip, hattama jobasyn kelisýi tiis. Sol hattamada qoǵamdyq tyńdaýlar ótkizý týraly talap naqty kórsetilýi kerek. Eger bul talap hattamaǵa engizilmese, qoǵam ókilderi sotqa júginý quqyǵyn ózinde qaldyrady", - dedi Erekenov.
Oqiǵa barysynda Erekenov sóz sóilep, qoǵamdyq tyńdaýdy toqtatýǵa áreket jasaǵannan keiin politsiia ony zaldan shyǵaryp, biraz ýaqyttan soń belsendi qaita oraldy.
Al Almaty ákimdigi qoǵamdyq talqylaýlardyń zańǵa sáikes júrgizilip jatqanyn habarlady. Qala sáýlet jáne qala qurylysy basqarmasynyń basshysy Almas Jańbyrshynyń aitýynsha, talqylaýlar Qazaqstan Respýblikasy Indýstriia jáne infraqurylymdyq damý ministriniń 2020 jylǵy №505 buiryǵymen bekitilgen qaǵidalarǵa sáikes ótkiziledi. Habarlandyrý jariialanǵannan keiin talqylaýlar belgilengen merzimde ótýde, al barlyq qajetti aqparat pen qujattarǵa qatysý múmkindigi qarastyrylǵan.
