Aqmola oblysynyń Tselinograd aýdanynda sýǵa batyp ketken 9 jáne 12 jastaǵy eki qyzdyń ólimine bailanysty tergeý bastaldy, dep habarlaidy dalanews.kz.
KTK telearnasynyń jazýynsha, qaiǵyly jaǵdai senbi kúni sý basqan karerlerdiń birinde bolǵan. Aldyn ala málimet boiynsha, otbasy sý jaǵasyna demalýǵa barǵan. Apaly-sińlili qyzdar kiimderin aýystyrý úshin jaǵalaýda turǵan kólikke otyrǵan.
Osy kezde avtomobil ózdiginen qozǵalyp, tómen qarai syrǵyp ketken de, sýǵa qulaǵan. Balalardyń ákesi olardy qutqarýǵa áreket jasaǵanymen, qyzdardy kólikten shyǵara almaǵan.
Oqiǵa ornyna kelgen qutqarýshylar arnaiy tehnikanyń kómegimen avtomobildi sýdan alyp shyqty. Kólik ishinen eki balanyń denesi tabyldy.
Qazirgi ýaqytta politsiia oqiǵanyń barlyq mán-jaiyn anyqtap jatyr.
Aqmola oblysy tótenshe jaǵdailar departamentiniń resmi ókili Ersaiyn Qoishybaevtyń aitýynsha, shomylý maýsymy bastalǵaly óńirde 15 adam sýǵa ketken. Olardyń ekeýi – bala.
Tótenshe jaǵdailardyń barlyǵy sýǵa túsýge ruqsat etilmegen aýmaqtarda tirkelgen. Mamandar osy ýaqytqa deiin myńǵa jýyq reid pen profilaktikalyq shara ótkizgen.
Tótenshe jaǵdailar departamenti turǵyndardy sý mańynda qaýipsizdik talaptaryn qatań saqtaýǵa, mas kúide sýǵa túspeýge jáne balalardy qaraýsyz qaldyrmaýǵa shaqyrdy.
