اقمولا وبلىسىنىڭ مامانداندىرىلعان اۋدانارالىق قىلمىستىق ىستەر جونىندەگى سوتى اتباسار تۇرمەسىندە ونداعان تۇتقىندى ۇرىپ-سوعىپ، ازاپتادى دەپ ايىپتالعان 12 قىزمەتكەردى اقتادى. ءىستى سوت القاسى قاراعان، دەپ حابارلايدى Dalanews.kz
"القابيلەر ءىستى قاراۋ قورىتىندىسى بويىنشا سوتتالۋشىلاردىڭ كىناسىزدىگى تۋرالى شەشىم شىعاردى. قىلمىس وقيعاسىنىڭ بولماۋى جانە سوتتالۋشىلاردىڭ كىناسىزدىگى تۋرالى شەشىم كەڭەسۋ بولمەسىندە داۋىس بەرۋ ارقىلى قابىلداندى"، - دەلىنگەن سوت حابارلاماسىندا.
داۋىس بەرۋگە 10 القابي جانە 1 سۋديا قاتىسىپ، ءارقايسىسى ءبىر داۋىستان يە بولعان. ناتيجەسىندە، سوت ۇكىمىمەن كاجك-نىڭ 12 قىزمەتكەرى كىناسىز دەپ تانىلدى. اقتالعاندارعا وڭالتۋ قۇقىعى تانىلدى.
سوت ۇكىمى زاڭدى كۇشىنە ەنگەن جوق.
ەسكە سالايىق، 2023 جىلعى قىركۇيەكتە الەۋمەتتىك جەلىدە اتباسار قالاسىنداعى كولونيادا وتىرعان تيمۋر دانەبايەۆ پەن باسقا دا سوتتالعان ادامداردىڭ سوققىعا جىعىلعانى كورىنەتىن ۆيدەو تارادى. بۇل وقيعاعا بايلانىستى تۇرمەنىڭ 12 قىزمەتكەرىنە ايىپ تاعىلىپ، سوت پروسەسى 2024 جىلعى شىلدەدە باستالعان بولاتىن.
ايىپتالۋشىلار تۇرمەنىڭ ىشكى ەرەجەسىنە ساي، ءتارتىپ ساقتاپ، قارسىلىق كورسەتكەندەرگە ارنايى قۇرالدار قولدانۋعا ءماجبۇر بولعانىن، زاڭ بۇزباعانىن ايتىپ، وزدەرىن اقتاۋدى سۇرادى.
بيىل اقپاندا ءبىرىنشى ينستانسياداعى سوت تۇرمە قىزمەتكەرلەرىن اقتادى.
جابىرلەنۋشىلەردىڭ اراسىندا "ۇلتارالىق ارازدىق قوزدىرعان" دەگەن ايىپپەن ءۇش جىلعا سوتتالعان ازاماتتىق بەلسەندى تيمۋر دانەبايەۆ تا بار. بىلتىر كۇزدە دانەبايەۆ سوتتا كۋالىك ەتىپ، ونى اجەتحاناداعى ەدەندى جۋۋعا ماجبۇرلەگەنىن، باس تارتقاننان كەيىن قاتتى سوققىعا جىققانىن ايتتى. ونىڭ ايتۋىنشا، ونى اجەتحانانى جۋۋعا ماجبۇرلەپ، باسىن ۋنيتازعا تىققان.
