Aqmola oblysynyń mamandandyrylǵan aýdanaralyq qylmystyq ister jónindegi soty Atbasar túrmesinde ondaǵan tutqyndy uryp-soǵyp, azaptady dep aiyptalǵan 12 qyzmetkerdi aqtady. Isti sot alqasy qaraǵan, dep habarlaidy Dalanews.kz
"Alqabiler isti qaraý qorytyndysy boiynsha sottalýshylardyń kinásizdigi týraly sheshim shyǵardy. Qylmys oqiǵasynyń bolmaýy jáne sottalýshylardyń kinásizdigi týraly sheshim keńesý bólmesinde daýys berý arqyly qabyldandy", - delingen sot habarlamasynda.
Daýys berýge 10 alqabi jáne 1 sýdia qatysyp, árqaisysy bir daýystan ie bolǵan. Nátijesinde, Sot úkimimen KAJK-nyń 12 qyzmetkeri kinásiz dep tanyldy. Aqtalǵandarǵa ońaltý quqyǵy tanyldy.
Sot úkimi zańdy kúshine engen joq.
Eske salaiyq, 2023 jylǵy qyrkúiekte áleýmettik jelide Atbasar qalasyndaǵy koloniiada otyrǵan Timýr Dánebaev pen basqa da sottalǵan adamdardyń soqqyǵa jyǵylǵany kórinetin video tarady. Bul oqiǵaǵa bailanysty túrmeniń 12 qyzmetkerine aiyp taǵylyp, sot protsesi 2024 jylǵy shildede bastalǵan bolatyn.
Aiyptalýshylar túrmeniń ishki erejesine sai, tártip saqtap, qarsylyq kórsetkenderge arnaiy quraldar qoldanýǵa májbúr bolǵanyn, zań buzbaǵanyn aityp, ózderin aqtaýdy surady.
Biyl aqpanda birinshi instantsiiadaǵy sot túrme qyzmetkerlerin aqtady.
Jábirlenýshilerdiń arasynda "ultaralyq arazdyq qozdyrǵan" degen aiyppen úsh jylǵa sottalǵan azamattyq belsendi Timýr Dánebaev ta bar. Byltyr kúzde Dánebaev sotta kýálik etip, ony ájethanadaǵy edendi jýýǵa májbúrlegenin, bas tartqannan keiin qatty soqqyǵa jyqqanyn aitty. Onyń aitýynsha, ony ájethanany jýýǵa májbúrlep, basyn ýnitazǵa tyqqan.
