Tarazdaǵy oblystyq perinataldyq ortalyqta kesar tiligi arqyly bosanǵan 37 jastaǵy áiel kóz jumdy. Marqumnyń týystary onyń ólimine meditsina qyzmetkerleriniń salǵyrttyǵy sebep bolýy múmkin dep otyr, dep habarlaidy dalanews.kz.
KTK telearnasynyń habarlaýynsha, áiel otadan keiin eki kún ótken soń qyzýy kóterilip, jaǵdaiy kúrt nasharlaǵan. Keiin onyń qanǵa túsken qaýipti infektsiiadan zardap shekkeni aitylǵan. On kúnnen astam ýaqyt jansaqtaý bóliminde jatqan kelinshekti dárigerler aman alyp qala almaǵan.
Marqumnyń jaqyndarynyń sózinshe, ol perzenthanaǵa deni saý kúiinde óz aiaǵymen barǵan. Olar dárigerler ota jasaý úshin aqsha talap etti dep te aiyptap otyr.
Týystary áieldiń sóilei almai qalǵan kezde kúieýine jazyp qaldyrǵan hatyn jariialady.
"Meni bul jerden tezirek basqa jaqqa alyp ketshi. Úsh kúnnen beri sýsyz jatyrmyn. Alyp ketshi, óletin boldym", – dep jazǵan ol.
Otbasynyń aitýynsha, áieldi perzenthanaǵa aldyn ala aparǵanda dárigerler onyń ózdiginen bosana alatynyn aityp, úiine qaitarǵan. Keiin júktilik merzimi 40 aptadan asqanda balanyń salmaǵy úlken degen sebeppen kesar tiligine jiberilgen.
Marqumnyń kúieýi Eldos Eseev áieliniń buǵan deiin tórt balasyn ózdiginen bosanǵanyn aitty.
"Ony óz kóligimmen, deni saý kúiinde alyp keldim. Buǵan deiin tórt balasyn osy perzenthanada ózi bosanǵan. Besinshisinde kesar tiligin jasap, osyndai jaǵdaiǵa tústi", – dedi ol.
Jaqyndary infektsiia áielge perzenthanada juqqan bolýy múmkin dep kúmán keltiredi. Olardyń aitýynsha, dúniege kelgen sábidiń densaýlyǵy jaqsy.
Jambyl oblysynyń densaýlyq saqtaý basqarmasy ana ólimine bailanysty arnaiy jumys toby qurylǵanyn habarlady. Sondai-aq Meditsinalyq jáne farmatsevtikalyq baqylaý komiteti tekserý júrgizbek.
"Ana óliminiń naqty sebebi sot-meditsinalyq saraptama qorytyndysynan keiin belgili bolady", – dedi basqarma ókili Aijan Terlikbaeva.
Marqumnyń artynda bes balasy qaldy. Bul – biyl oblystyq perinataldyq ortalyqta tirkelgen ekinshi ana ólimi.
