Tarazda bosanǵan áiel qanǵa túsken qaýipti infektsiiadan qaitys boldy. Oblystyq perinataldy ortalyqta ota arqyly bosanǵan áieldiń eki kúnnen keiin qyzýy kóterilip, jaǵdaiy kúrt nasharlaǵan. Teksere kele, onyń qanynan sepsis bolǵany anyqtalǵan, dep habarlaidy dalanews.kz "KTK" telearnasyna siltep.
Telearna málimetinshe, on kúnnen asa es-tússiz jatqan áiel jansaqtaý bóliminde jan tapsyrǵan. Perzenthanaǵa "óz aiaǵymen kelip, aýrý tapty" degen marqumnyń týystary dárigerler otany "salǵyrt jasaǵan" dep otyr. Olardyń sózinshe, aiy kúni jetip turǵan áielge ota jasaýǵa aqsha talap etken. Marqumnyń týystary naýqastyń densaýlyǵyn oilamai, qarajat talap etken perzenthana ujymy "tiisti jazasyn alsyn" deidi.
Marqumnyń týystarynyń aitýynsha, júkti áieldi perzenthanaǵa aldyn ala alyp kelgende, dárigerler óz kúshimen bosanady dep, úiine qaitaryp jibergen. Alaida aiy-kúni jetip, júktiliktiń 40-aptasynan asqan kezde dárigerler balanyń salmaǵy úlken dep, ota jasaýǵa baǵyttaǵan.
Marqumnyń jaqyndary deni saý áielge qaýipti kesel "perzenthanadan juqty" dep otyr. Olar dúnie esigin ashqan náresteniń densaýlyǵy jaqsy ekenin aitady.
Al oblystyq densaýlyq basqarmasynyń mamandary ana ólimine qatysty isti tekserý úshin jumys toby qurylǵanyn málimdedi. 37 jastaǵy kelinshektiń artynda bes balasy qaldy. Mundai qaiǵyly oqiǵa biyl oblystyq perenataldyq ortalyqta ekinshi márte tirkelip otyr.
