نازاربايەۆ بۇل ماسەلەگە ءپۋتيننىڭ ستيلىندە پىكىر ءبىلدىرىپ، رەسەيدىڭ ءسىبىر ايماعىن ءسوز ەتتى.
“مىسالى، باتىس ساياساتكەرلەرى ءسىبىردى اۋزىنان تاستامايدى. "بۇل ايماق رەسەيدىڭ قۇرامىنا زورلىقپەن قوسىلعان. ءسىبىردى كرەملدىڭ قۇرامىنان شىعارىپ الۋ كەرەك” دەگەن سىڭايدا سويلەيدى. بۇل دا سول سەكىلدى. رەسەي قازاقستاننىڭ تەرريتورياسىنا كوز الارتپايدى جانە قانداي دا ءبىر تەرريتوريالىق تالابى جوق. لاۆروۆ بۇل ماسەلەگە الدەقاشان نۇكتە قويعان. بارلىعىن رەسمي دەڭگەيدە قاراستىرۋ كەرەك.
اربىردەن سوڭ مىنا زاماندا كىم نە ايتپاي جاتىر؟ ويىنا كەلگەندى كوكيتىندەر كوپ. ونىڭ ۇستىنە ۋكرايناداعى جاعداي وتقا ماي تامىزا ءتۇستى. شىعىس ۋكراينا بار، قۇرامىنا قايتارىپ العان قىرىم بار…”، – دەدى نازاربايەۆ تۋعان كۇنى قارساڭىندا ازىرلەنگەن “شتريحي ك پورترەتۋ” دەرەكتى فيلمىندە اتالعان جايتقا ارنايى توقتالىپ.
ەلباسى مۇنداي ارانداتۋعا كوڭىل بولمەۋدى، نازار اۋدارماۋدى ۇيرەنۋ قاجەت دەيدى.
ايتسە دە، “رەسەي كسرو شەكپەنىنەن شىققان ەلدەرگە ۇلانعايىر اۋماقتى سىيلاي سالدى” دەگەن كرەمل كوسەمىنىڭ پىكىرىن جاۋاپسىز قالدىرعاندى ءجون كورمەپتى.
“سىيعا تارتىلعان جەر؟ مۇنداي اڭگىمەلەر ايتىلدى. كىمگە، قاي تەرريتوريانى تارتۋ ەتىپپىز؟ ءبىز التىن وردانىڭ مۇراگەرىمىز، ەگەر سول كەزەڭگە دەيىن تەرەڭدەسەك، ماسكەۋ كنيازدىعى كۇن سايىن الىم-سالىق تولەپ تۇرعان. تابانىمىزدىڭ استىنداعى قارا جەر كىمگە تيەسىلى ەكەنىن ءبىلۋ ءۇشىن، مىڭ جىلدىق تاريحىمىزدى ەسكە الۋ كەرەكپىز بە؟! بىزگە سىرتتان ەشكىم ەشتەڭەنى سىيعا تارتقان جوق. سوندىقتان مۇنداي ارانداتۋعا نازار اۋدارۋدىڭ قاجەتى شامالى. ەڭ باستىسى رەسەيدىڭ رەسمي بيلىگى دەيدى، سول ماڭىزدى”، – دەپ قوسىپ قويدى نازاربايەۆ.
