كۇنىنە ورتا ەسەپپەن ءبىر بريگادا 100-گە جۋىق ادامدى ۆاكسيناسيالايدى، دەپ حابارلايدى ەلوردا اكىمدىگىنىڭ رەسمي سايتى.
بۇگىن ءموبيلدى ۆاكسيناسيا توبى Sine Tempore ساۋدا ۇيىنە شىقتى. مۇندا قىزمەتكەرلەردەن بولەك، ساۋدا ورتالىعىنىڭ جالعا الۋشىلارى دا كەلىپ جاتتى.
«ۆاكسينا العانىما ءبىراز ۋاقىت بولدى، تيىسىنشە قىزمەتكەرلەرىمدى دە ۇگىتتەپ كەلدىم. ءموبيلدى ۆاكسيناسيا توپتارىنىڭ ارقاسىندا يممۋنداۋدان وتتىك. بۇل وتە ىڭعايلى، جۇمىس ۋاقىتىمىز بولىنبەيدى، ەشكىم ەشقايدا كەتپەيدى»، - دەدى «Sine Tempore» اق پرەزيدەنتى تاتيانا سوي.
ۆاكسينا العاندار وزدەرىن جاقسى سەزىنىپ وتىرعانىن ايتتى. ولاردىڭ كوپشىلىگى ەكپە الۋ تۋرالى شەشىمدى ويلانىپ بارىپ قابىلداعان ەكەن.
«سوو-عا ءموبيلدى ۆاكسيناسيا كەلەدى دەپ حابارلادى. ويلانباستان تىركەلدىم. سەبەبى، بۇل ينفەكسيانى ءوزىم جۇقتىرعانمىن، قانشالىقتى ءقاۋىپتى ەكەنىن دە جاقسى بىلەمىن. بۇل قاۋىپتەن قورعانعان ءجون»، - دەدى ەلوردا تۇرعىنى سايرانگۇل.
ايتا كەتەرلىگى، ۆاكسيناسيالاۋعا بەلسەندى تۇردە شاقىراتىندار اراسىندا كوروناۆيرۋسپەن اۋىرعاندار كوپ. سەبەبى ولار ۆيرۋسپەن عانا ەمەس، ونىڭ سالدارىمەن دە كۇرەسۋ قانشالىقتى قيىن ەكەنىن بىلەدى.
«ۆاكسيناسيادان كەيىن ءوزىمدى جاقسى سەزىنەمىن. بۇل ىندەتتى وسىدان ءتورت اي بۇرىن جۇقتىرعانمىن. ەكىنشى رەت جۇقتىرعىم كەلمەيدى. ەلىمىزدىڭ بارلىق ازاماتىن ۆاكسينا الۋعا شاقىرامىن. بۇل ءبىزدى كوروناۆيرۋستان قورعايدى»، - دەدى ساۋدا ءۇيىنىڭ قىزمەتكەرى اربەن دجوري.
«وتباسىمدا ءبارى ەكپە الدى. ال ءوزىم كوپتەن بەرى ۇرەيلەنىپ ءجۇرىپ، ەندى عانا شەشىم قابىلدادىم. ۆاكسينانى ءبارى العانىن قالايمىن»، - دەدى سوو قىزمەتكەرى تاتيانا موروزوۆا.
ۆاكسيناسيا – بۇل ۇجىمدىق يممۋنيتەتتى دامىتۋدىڭ جانە ادەتتەگى ومىرگە ورالۋدىڭ جالعىز ءتاسىلى. ەۋروپا ەلدەرى مەن فۋتبولدان ءوتىپ جاتقان ەۋروپا چەمپيوناتىنىڭ (جارتىلاي جانكۇيەرگە تولعان ستاديوندار) تاجىريبەسى ىندەتتى جەڭۋگە بولاتىنىن كورسەتەدى. ۆاكسيناسيالانعان ازاماتتاردىڭ سانىن كوبەيتۋ كەرەك. مەديسينا قىزمەتكەرلەرى ەلوردا تۇرعىندارىنىڭ ۆاكسيناسياعا دايىن ەكەنىن ايتتى.
«ناۋرىز ايىنان باستاپ ۆاكسيناسيالاۋ ءۇشىن ەڭبەك ۇجىمدارىنا بارىپ ءجۇرمىز. كۇنىنە ەكى رەت باراتىن كەزىمىز بولادى. ورتاشا ەسەپپەن 50-گە جۋىق ادام ۆاكسينا الۋعا كەلەدى. كەيدە ودان دا كوپ بولىپ جاتادى. ءبىزدىڭ ەمحانانىڭ وزىندە ءۇش ءموبيلدى توپ بار. وتىنىمدەر ءىرى زاۋىتتاردان، اۋەجايلاردان جانە ۆوكزالداردان، سونداي-اق شاعىن كومپانيالاردان ءتۇسىپ جاتادى. ۆيرۋستىڭ جاڭا ءقاۋىپتى شتاممى پايدا بولعانىن، ونىڭ مۋتاسيالانعانىن ەسكەرەر بولساق، ۆاكسيناسيادان ءبارى ءوتۋى قاجەت. بۇل حالىقتىڭ ازاماتتىق بورىشى»، - دەدى №14 ەمحانا بولىمشەسىنىڭ مەڭگەرۋشىسى ەسبول وماروۆ.
ونىڭ ايتۋىنشا، ەلوردا اكىمدىگى جۇرگىزگەن جۇمىستىڭ ناتيجەسىندە ۆاكسينا الۋعا كەلەتىن جۇرتتىڭ قاتارى كوبەيە باستادى. قالا تۇرعىندارى ۆاكسيناسيا ماسەلەسىندە وزدەرىنىڭ ازاماتتىق ۇستانىمدارىن بەلسەندى تۇردە كورسەتىپ، يممۋنداۋدان ءوتىپ جاتىر.
ەسكە سالا كەتەيىك، بۇعان دەيىن ەلوردا اكىمى التاي كولگىنوۆ ۆاكسيناسيالانعاندار اراسىندا ەكى بولمەلى پاتەردىڭ ۇتىس ويىنى وتكىزىلەتىنىن حابارلاعان. وعان ۆاكسينانىڭ ءبىرىنشى كومپونەنتىن 25 ماۋسىم مەن 31 تامىز ارالىعىندا العان ازاماتتار عانا قاتىسا الادى.
سونداي-اق، قالا تۇرعىندارىن جاپپاي ۆاكسيناسيالاۋعا ىنتالاندىرۋ ءۇشىن ەلوردا كاسىپكەرلەرى ەكپە العاندار اراسىندا باعالى سىيلىقتار ۇتىسىن وتكىزىپ جاتىر.
مىسالى، «ازيا پارك»، «Mega Silk Way»، «سارىارقا»، «ابۋ-دابي پلازا»، «كەرۋەن»، «ەۋرازيا» سوو-لارىندا تۇرمىستىق جانە كومپيۋتەرلىك تەحنيكا تۇرىندە باعالى سىيلىقتار ويناتىلىپ، جەڭىلدىك كۋپوندارى بەرىلەدى.
ايتا كەتەيىك، بۇگىندە ەلوردادا 230 مىڭعا جۋىق ازامات ۆاكسينانىڭ ءبىرىنشى كومپونەنتىن قابىلداسا، 152 مىڭنان استام ادام تولىق يممۋنداۋدان ءوتتى.
https://youtu.be/IclkMahm-2o
