قازان ايىندا الماتىدا ينكليۋزيۆتى ءبىلىم بەرۋ بويىنشا العاشقى دۇنيەجۇزىلىك كونگرەسس – WorldInclusion Congress 2025 (WIC 2025) وتەدى. بۇل اۋقىمدى حالىقارالىق شارا ينكليۋزيۆتى جانە ارنايى ءبىلىم بەرۋ سالاسىندا تاجىريبە الماسۋدىڭ جانە ستراتەگيالىق شەشىمدەر قابىلداۋدىڭ نەگىزگى الاڭىنا اينالماق. بۇل تۋرالى وقۋ-اعارتۋ ءمينيسترى عاني بەيسەمبايەۆتىڭ الماتىعا جۇمىس ساپارى بارىسىندا بەلگىلى بولدى،- دەپ حابارلايدى Dalanews.kz
كونگرەسكە الەمنىڭ 50 ەلىنەن 400-دەن استام وكىل – ءبىلىم مينيسترلەرى، عالىمدار، ساراپشىلار مەن حالىقارالىق ۇيىمداردىڭ وكىلدەرى قاتىسادى دەپ كۇتىلۋدە.
نەلىكتەن قازاقستان؟
كونگرەستى وتكىزۋ ورنى رەتىندە الماتىنى ينكليۋزيۆتى ءبىلىم بەرۋ جونىندەگى حالىقارالىق وداق (IFIP) تاڭدادى. IFIPء-تىڭ 135 مۇشە مەملەكەتى اراسىنان قازاقستاندى تاڭداۋ – ەلىمىزدىڭ ينكليۋزيۆتى جانە ارنايى ءبىلىم بەرۋدى دامىتۋداعى جۇيەلى قادامدارىنىڭ ناتيجەسى جانە قول جەتكىزگەن پروگرەستىڭ مويىندالۋى.
مەملەكەتتىك دەڭگەيدەگى جۇيەلى شارالار قابىلدانۋدا:
• 2023 جىلدان باستاپ ارنايى ءبىلىم بەرۋ ۇيىمدارىنىڭ جەلىسى ەكى ەسەدەن استام ۇلعايدى – 213-تەن 508-گە دەيىن؛
• مەكتەپتەردىڭ 90%-ىندا ەرەكشە ءبىلىم بەرۋ قاجەتتىلىكتەرى بار بالالارعا ارنالعان جاعدايلار جاسالعان؛
• بالالاردىڭ 85%-ى ارنايى پسيحولوگيالىق-پەداگوگيكالىق قولداۋمەن قامتىلعان؛
• مەكتەپكە دەيىنگى جانە ورتا ءبىلىم بەرۋ جۇيەسىندە جاڭا لاۋازىمدار ەنگىزىلدى – «پەداگوگ-اسسيستەنت»، «ارنايى پەداگوگ»، «جەكە كومەكشى»؛
• پسيحولوگيالىق-مەديسينالىق-پەداگوگيكالىق كەڭەس بەرۋ، تۇزەتۋ كابينەتتەرى، وڭالتۋ ورتالىقتارى مەن اۋتيزم سپەكترىندەگى بالالاردى قولداۋ ورتالىقتارى ءۇشىن جەكە تيپتىك شتاتتار بەكىتىلدى؛
• تەحنيكالىق جانە كاسىپتىك ءبىلىم بەرۋ ۇيىمدارىنا مۇگەدەكتىگى بار ازاماتتاردى قابىلداۋ كۆوتاسى 1%-دان 10%-عا دەيىن ارتتى؛
• ەرەكشە ءبىلىم بەرۋ قاجەتتىلىكتەرى بار بالالاردى كەشەندى قولداۋ تۋرالى زاڭ جوباسى ازىرلەنۋدە.
جاڭا حالىقارالىق الاڭى وقۋ-اعارتۋ ءمينيسترى عاني بەيسەمبايەۆتىڭ ايتۋىنشا، كونگرەستىڭ وتكىزىلۋى جۇيەنىڭ دامۋىنا جاڭا سەرپىن بەرەدى.
«WorldInclusion Congress 2025 – ينكليۋزيۆتى ءبىلىم بەرۋ سالاسىنداعى وسىنداي جوعارى دەڭگەيدەگى العاشقى حالىقارالىق باستاما. كونگرەستىڭ قازاقستاندا وتكىزىلۋى – ءادىل جانە ينكليۋزيۆتى قوعام قۇرۋعا دەگەن ادالدىعىمىزدى، ءبىلىم بەرۋ رەفورمالارىنىڭ جەتىستىگىن جانە يننوۆاسيالاردىڭ ەنگىزىلۋىن كورسەتەدى. حالىقارالىق كورپوراتيۆتىك كوشباسشىلاردىڭ قاتىسۋى ستراتەگيالىق مۇمكىندىكتەرگە جول اشادى، ءبىزدىڭ تاجىريبەمىزگە نازار اۋدارىپ، جاڭا ينۆەستيسيالار تارتادى»، – دەدى مينيستر.
كونگرەستىڭ ەرەكشەلىكتەرى
WIC 2025 پەداگوگيكالىق يننوۆاسيالاردى، زاماناۋي تەحنولوگيالاردى جانە بيزنەستى بىرىكتىرەدى. باعدارلامادا پلەنارلىق وتىرىستار، پانەلدىك پىكىرتالاستار، شەبەرلىك ساباقتار جانە الەمدىك ساراپشىلاردىڭ موتيۆاسيالىق ءسوز سويلەۋلەرى بار. ەرەكشە نازار جاساندى ينتەللەكت پەن سيفرلىق شەشىمدەردى ەرەكشە ءبىلىم بەرۋ قاجەتتىلىكتەرى بار بالالاردى قولداۋ ءۇشىن قولدانۋعا اۋدارىلادى.
الماتى دەكلاراسياسى
كونگرەستىڭ باستى قورىتىندىسى – الماتى دەكلاراسياسى بولادى. وندا ينكليۋزيۆتى ءبىلىم بەرۋدى الەۋمەتتىك ادىلەتتىلىكتىڭ، تەڭ مۇمكىندىكتەردىڭ جانە ورنىقتى دامۋدىڭ نەگىزى رەتىندە دامىتۋ جونىندەگى حالىقارالىق مىندەتتەمەلەر بەكىتىلەدى.
