قارجىلىق مونيتورينگ اگەنتتىگى پروكۋراتۋرانىڭ ۇيلەستىرۋىمەن اتىراۋ وبلىسىندا اۋقىمدى جەدەل-تەرگەۋ ءىس-شارالارىن جۇرگىزۋدە، دەپ حابارلايدى Dalanews.kz.
اتاپ ايتقاندا، «ءبىرىڭعاي جيناقتاۋشى زەينەتاقى قورىنان» قاراجاتتى زاڭسىز شەشىپ الۋعا جاردەم كورسەتكەن 5 قىلمىستىق توپتىڭ ارەكەتى اشكەرلەندى.
ول ءۇشىن ۇيىمداستىرۋشىلار جالعان قۇجاتتاردى راسىمدەۋ ارقىلى ەلدىڭ ءار وڭىرىندە (اتىراۋ، استانا، الماتى، شىمكەنت، اقتاۋ جانە باسقا قالالاردا) ورنالاسقانداي ەتىپ 30-دان استام ستوماتولوگيالىق كلينيكالاردى پايدالانعان.
شىن مانىندە، بۇل مەديسينا ۇيىمدارى تەك قاعاز جۇزىندە بولعان، حالىققا ەشقانداي قىزمەت كورسەتپەگەن. ولاردىڭ عيماراتتارى دا، جابدىقتارى دا، بىلىكتى قىزمەتكەرلەرى دە بولماعان. كلينيكالاردىڭ باسشىلارى مەن قۇرىلتايشىلارىنىڭ مەديسينالىق ءبىلىمى دە جوق.
جالعان مەديسينالىق قۇجاتتاردى راسىمدەگەنى ءۇشىن كۇدىكتىلەر ازاماتتاردىڭ العان قاراجاتىنان 10%-دان 20%-عا دەيىن زاڭسىز سىياقى ۇستاپ وتىرعان.
جينالعان اقشانى قولما-قول اقشاعا اينالدىرۋ ءۇشىن قىلمىستىق توپتار 226 «دروپپەردى» پايدالانعان. جالپى، 200 ملرد تەڭگەدەن استام قارجى اينالىمنان شىعارىلعان.
زەينەتاقى سالىمشىلارىنىڭ اقشاسىنا كۇدىكتىلەر 15 قىمبات اۆتوكولىك (Mercedes-Benz G-class، GLE، BMW X7، Porsche Taycan، Cadillac Escalade) – جالپى قۇنى 600 ملن تەڭگەدەن استام – سونداي-اق زەرگەرلىك بۇيىمدار، كوممەرسيالىق نىساندار، پاتەرلەر مەن جەر تەلىمدەرىن ساتىپ العان.
قىلمىستىق جولمەن تابىلعان مۇلىكتى ىزدەستىرۋ جالعاسۋدا.
قازىرگى ۋاقىتتا 59 ءتىنتۋ جۇمىسى جۇرگىزىلدى. 10 ادامعا قاتىستى بۇلتارتپاۋ شاراسى قولدانىلادى.
سونىمەن بىرگە قاتار، تەرگەۋ بارىسىندا تەك زەينەتاقى اكتيۆتەرىن زاڭسىز شىعارۋ سحەماسىن ۇيىمداستىرۋشىلاردىڭ ارەكەتتەرىنە قۇقىقتىق باعا بەرىلەدى.
ءوزىنىڭ جيناقتالعان زەينەتاقى قاراجاتىن العان ازاماتتار قىلمىستىق جاۋاپكەرشىلىككە تارتىلمايدى.
ق ر قپك-نىڭ 201-بابىنا سايكەس وزگە اقپارات جاريالاۋعا جاتپايدى.
سونداي-اق، ۇستالعانداردىڭ قورعانۋ قۇقىعى بۇزىلىپ جاتىر دەگەن مالىمەتتەر شىندىققا جاناسپايدى. بارلىق پروسەسسۋالدىق ارەكەتتەر قولدانىستاعى زاڭناماعا سايكەس جۇرگىزىلۋدە. ءار كۇدىكتىنىڭ ادۆوكاتتارىمەن بايلانىسى شەكتەلمەگەن.
