بولاشاق ماماننىڭ كاسىبي قۇزىرەتتىلىكتەرىن قالىپتاستىرۋدا كىتاپحانا جۇمىسى نەگىزگى ورىن الادى. ەلىمىزدەگى العاشقى وقۋ ورنى اباي اتىنداعى قازۇپۋ عىلىمي كىتاپحاناسىنىڭ نەگىزى 1928 جىلى قالانعان، قازاقستانداعى ءىرى جوعارى وقۋ ورنى كىتاپحانالارىنىڭ ءبىرى. عىلىمي كىتاپحانا ينستيتۋتپەن بىرگە ۇيىمداستىرىلعان. العاشقى قۇرىلعان جىلىندا كىتاپحانادا ءبىر عانا كىتاپحاناشى – كەللەر سوفيا رومانوۆنا جۇمىس ىستەگەن، ال كىتاپ قورى نەبارى 40 مىڭ تومدى قۇراعان.
كىتاپحانا جۇمىسىنىڭ، كىتاپ قورىنىڭ دامۋ تاريحىنا توقتالساق، كىتاپ قورىن نەگىزىنەن، ۆەرنىيلىق گيمنازيالاردان جانە جەكە كىتاپ قورلارىنان جيناقتالعان ادەبيەتتەردەن قۇرالدى.
1972 جىلى كىتاپحانالىق بيبليوگرافيالىق فاكۋلتەت اشىلىپ، وندا كىتاپحانا قىزمەتكەرلەرى ساباق جۇرگىزە باستادى. فاكۋلتەت ەكى مارتە بىتىرۋشىلەرىن شىعارىپ، 65 ستۋدەنتكە جاڭا ماماندىقتى ۇيرەتتى.
1998 جىلى كىتاپحانا TEMپۋس-TACيس جوباسى بويىنشا گرانتتى جەڭىپ الدى. كىتاپحانا پروسەستەرىن كومپيۋتەرلەندىرۋ جۇرگىزىلىپ، «رابيس-اباي» كىتاپحانالىق باعدارلاماسى ازىرلەندى، كىتاپحانا قىزمەتكەرلەرى تاجىريبە الماسۋ ماقساتىندا ەۋروپا (يتاليا، گوللانديا) ەلدەرىنىڭ جەتەكشى عىلىمي كىتاپحانالارىنا ىسساپارمەن بارىپ قايتتى. كىتاپحانا قورىنداعى قۇجاتتار سانى 740 000 داناعا، قىزمەتكەرلەر سانى 50 ادامعا دەيىن وسسە، وقىرماندار سانى 20 000-نان، ال كىتاپحاناعا كەلۋشىلەر سانى 3 ميلليوننان استى.
«ادامعا اۋا قانداي قاجەت بولسا، كىتاپحانا دا سونداي قاجەت» دەگەن كورنەكتى جازۋشى ورالحان بوكەيدىڭ ءسوزى كىتاپحانانىڭ ومىردەگى ورنىن ءدال ايقىنداپ تۇرعان جوق پا؟ بۇگىندە عىلىمي-تەحنيكالىق پروگرەسس پەن ادامزات وركەنيەتى قانشالىقتى جەدەل قارقىنمەن دامىپ، الەمدى اقپارتتىق تەحنولوگيالار بيلەپ، كەز كەلگەن كىتاپتىڭ ءماتىنىن اپ-ساتتە ينتەرنەتتەن تاۋىپ الاتىن جاعدايعا جەتسەك تە، ءبارىبىر كىتاپحانانىڭ ورنى بولەك. قالاعان كىتابىڭدى قولىڭا ۇستاپ، پاراقتاپ وقىپ، كەرەكتى ويلارىڭدى بەلگىلەپ، جازىپ الىپ، ەركىن پايدالانعانعا نە جەتسىن؟!
ەلىمىزدەگى تاريحى تەرەڭنەن باستاۋ الاتىن، ابىروي-بەدەلى جوعارى، كىتاپ قورى باي كىتاپحانالاردىڭ ءبىرى – اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ عىلىمي كىتاپحاناسى. بۇگىندە كىتاپ قورى 2 ملن دانادان اسىپ، الماتى وبلىسىنداعى 12 جوعارى، 13 ورتا ارناۋلى وقۋ ورىندارى كىتاپحانالارىنىڭ عىلىمي-ادىستەمەلىك ورتالىعىنا اينالىپ وتىر.
قازاقتىڭ العاشقى جوعارى وقۋ ورنى ومىرگە كەلگەن سوڭ، وعان وقۋلىقتار مەن وقۋ قۇرالدارىنىڭ، ادىستەمەلىكتەردىڭ كوپشىلىگى ماسكەۋ مەن لەنينگرادتان اكەلىنگەنى بەلگىلى. ا.بايتۇرسىن ۇلى، و.جاندوسوۆ، م.جۇمابايەۆ، م.دۋلاتوۆ، ج.ايماۋىتوۆ، م.اۋەزوۆ، س.سەيفۋللين سياقتى ۇلت زيالىلارى دا ۋنيۆەرسيتەت كىتاپحاناسىن كىتاپ قورىمەن تولىقتىرۋعا ولشەۋسىز ۇلەس قوستى.
ولار وزدەرىنىڭ ادەبي كوركەم شىعارمالارىمەن بىرگە وقۋ قۇرالدارىن دا جازىپ، ستۋدەنتتەردى ءبىلىم نارىمەن سۋسىنداتۋعا ايانباي ەڭبەك ءسىڭىردى. ۋنيۆەرسيتەت عالىمدارى دا ءوز ەڭبەكتەرىن كىتاپحاناعا تەگىن وتكىزگەن. ءسويتىپ العاشقى ون شاقتى جىلدىڭ ىشىندە-اق كىتاپ قورى 20 مىڭ داناعا جەتكەن.
ۇلت زيالىلارى وتكەن عاسىرلاردا جارىق كورگەن كىتاپتاردى ىزدەپ تاۋىپ، تاريح پەن عىلىم ءۇشىن ۇلكەن قۇندىلىقتار كەلگەنىن بۇگىندە كىتاپحانانىڭ سيرەك كىتاپتار مەن قولجازبالار قورىندا تۇرعان كونە باسىلىمداردان كورۋگە بولادى. بۇل قوردا ءقازىر تۇڭعىش قازاق مەملەكەتتىك ۋنيۆەرسيتەتىنە (قازىرگى اباي اتىنداعى قازاق ۇلتتىق پەداگوگيكالىق ۋنيۆەرسيتەتىنە) ۆەرنىي گيمنازياسىنان بەرىلگەن ادەبيەتتەر، سونىمەن قاتار حVIII-XIX عاسىرلاردا شىققان ورىس جانە شەتەل تىلدەرىندەگى اسا قۇندى عىلىمي، مادەني جانە تاريحي ءمانى بار باسىلىمدار كوپتەپ جيناقتالعان.
سونداي كونە كىتاپتاردىڭ ءبىرى – قازان ءدىن اكادەمياسىنىڭ VI كۋرس ستۋدەنتى يۆان تيحوۆتىڭ الەكساندروۆسكييدىڭ 1877 جىلى قازان قالاسىنداعى ۋنيۆەرسيتەتتىك باسپاحانادا باسىلىپ شىققان «وبوزرەنيە مۋسۋلمانسكيح موليتۆ» (پو يزۋچەنيۋ سەكتي حانافيتسكوي) دەپ اتالاتىن كىتابى ساقتالعان. يسلام ءدىنىن تەرەڭ زەرتتەگەن اۆتور كىتاپتىڭ ءبىرىنشى بولىمىندە ناماز وقۋدىڭ شارتتارىن جان-جاقتى تالداپ تۇسىندىرەدى. اسىرەسە، نامازداعى نەگىزگى شارتتار، ونىڭ پارىزى، ءۋاجىبى، سۇننەتى تۋرالى شىنايى باياندالادى. كىتاپتىڭ ەكىنشى بولىمىندە قۇراننىڭ نەگىزگى تەرميندەرىنە، سۇرەلەرىنە تۇسىنىك بەرىلەدى. مەككە مەن مەدينەگە قاجىلىققا بارعاندا وقىلاتىن نامازداردىڭ ەرەكشەلىكتەرىن تۇسىندىرەدى.
وسىنداي كونە دۇنيەلەردىڭ ءبىرى ا.ۆ. ۆاسيليەۆ دەگەن عالىمنىڭ 1900 جىلى ورىنبورداعى ف.ب. ساچكوۆ دەگەن ازاماتتىڭ جەكە باسپاحاناسىنان باسىلىپ شىققان «وبرازسى كيرگيزسكوي (كازاحسكوي) نارودنوي سلوۆەسنوستي. كيرگيزسكيە (كازاحسكيە) زاگادكي» دەگەن زەرتتەۋ كىتابى. قازاق حالقىنىڭ ماقال-ماتەلدەرىن، دانالىق سوزدەرىن تەرىپ، جيناپ، ونى ورىسشاعا اۋدارىپ تۇسىنىك جازعان ا.ۆ. ۆاسيليەۆتىڭ بۇل ەڭبەگى دە ءوز كەزىندە قۇندى ەڭبەكتەردىڭ ءبىرى بولىپ سانالادى.
1927 جىلى تاشكەنتتە ورىس تىلىندە باسىلىپ شىققان «گرامماتيكا كازاحسكوگو يازىكا» وقۋلىعى دا كىتاپحانا قورىنداعى سيرەك كىتاپتاردىڭ ءبىرى.
احمەت بايتۇرسىن ۇلىنىڭ 1914 جىلى ورىنبوردا باسىلىپ شىققان «قازاقشا ءالىپبيىن» دە ءبىزدىڭ كىتاپحانادان تاباسىزدار. بۇل كىتاپتى قىرعىز ازاماتى كاربوز ديقانوۆ قىرعىز وقۋشىلارى ءۇشىن قايتا ءوز قاراجاتىمەن باستىرىپ شىعارىپتى.
20-جىلدارى بۇل كىتاپتى قىرعىزدار دا پايدالانىپ، ساۋاتىن اشىپتى. بۇل الىپپە ا.بايتۇرسىن ۇلىنىڭ اراب ءالىپبيى ارقىلى قازاق جازۋىن تاڭبالاۋعا ارنالعان توتە جازۋ الىپپەسى بولاتىن. توتە جازۋ ءالىپبيى قازاق ەلى لاتىنشاعا تولىق كوشكەن 1932 جىلعا دەيىن پايدالانىلدى. بۇرىنعى كىتاپتار مەن گازەت ماتەريالدارى بويىنشا زەرتتەۋ جۇرگىزۋشىلەر ءۇشىن توتە جازۋدىڭ ءالى دە پايداسى زور.
سونداي-اق ءمىرجاقىپ دۋلاتوۆتىڭ 1909 جىلى ۋفاداعى كارىموۆ پەن قۇسايىنوۆتىڭ «شارىق» باسپاسىنان باسىلىپ شىققان «ويان، قازاق!» ولەڭدەر جيناعى دا ۋنيۆەرسيتەت كىتاپحاناسىنداعى قۇندى دۇنيەلەردىڭ ءبىرى.
«كوزىڭدى اش، ويان، قازاق، كوتەر باستى،
وتكىزبەي قاراڭعىدا بەكەر جاستى.
جەر كەتتى، ءدىن ناشارلاپ، حال ھارام بوپ،
قازاعىم، ەندى جاتۋ جاراماس-تى»، – دەپ قازاق حالقىنا ءۇن تاستاعان ءمىرجاقىپ دۋلات ۇلىنىڭ بۇل ەڭبەگى ءوز حالقىنا دەگەن جاناشىرلىققا تولى.
سيرەك كىتاپتار قورىنداعى احمەت بايتۇرسىن ۇلىنىڭ «جان ءسوزىمدى كىم تۇسىنەر؟» دەپ اتالاتىن ولەڭدەرى مەن ماعجان جۇمابايەۆتىڭ «شىعارمالار» جيناعى دا ادەبي ەسكەرتكىشتەردىڭ ءبىرى. ورىس عالىمى ا.ف.ەفيروۆتىڭ 1949 جىلى شىققان «يبراي التىنسارين. جيزن ي پەداگوگيچەسكيا دەياتەلنوست» دەپ اتالاتىن زەرتتەۋ ەڭبەگى ىبىرايتانۋ سالاسىنداعى العاشقى جانە پاراساتتى ەڭبەك بولىپ تابىلادى.
ا.س. سيتدىكوۆتىڭ «پەداگوگيچەسكيە يدەي ي پروسۆەتيتەلسكايا دەياتەلنوست ي.التىنسارينا» (الما-اتا، ۋچپەدگيز، 1949 گ.) دەپ اتالاتىن زەرتتەۋ ەڭبەگى كورنەكتى تاريحشى ەرمۇحان بەكماحانوۆتىڭ رەداكسياسىمەن شىققان. بۇل كىتاپتا ى.التىنسارينگە دەيىنگى قازاق ولكەسىندەگى حالىق اعارتۋ ءىسى، ءحىح عاسىردىڭ 60-جىلدارىنداعى پەداگوگيكالىق قوزعالىس جانە ونىڭ ى.التىنسارينگە ىقپالى، ۇلى اعارتۋشىنىڭ قازاق ساحاراسىندا ورىس-قازاق جانە تازا قازاق مەكتەپتەرىن اشۋداعى ءرولى، ونىڭ پەداگوگيكالىق يدەيالارى، ءمۇعالىم مارتەبەسى تۋرالى جانە ادىستەمەلىك كوزقاراستارى جايىندا كەڭىنەن باياندالادى. بۇل كىتاپتىڭ ءالتىنساريندى زەرتتەۋشىلەر ءۇشىن ءالى دە پايداسى زور بولماق.
سيرەك كىتاپتار قورىندا م.اۋەزوۆتىڭ 1948 جىلى ماسكەۋدەگى «سوۆەتسكيي پيساتەل» باسپاسىنان باسىلىپ شىققان «اباي» رومانى، ى.ءالتىنساريننىڭ 1957 جىلى قازاق كسر عىلىم اكادەمياسىنىڭ باسپاسىنان ورىس تىلىندە شىققان تاڭدامالى شىعارمالارى كورنەكتى ورىن الادى. كىتاپحانادا الەمدىك كوركەم ادەبيەتتىڭ باي قورى جانە XVIII-XX عاسىرلاردىڭ باسىندا شەت تىلدەرىندە شىعارىلعان سيرەك باسىلىمدار جيناقتالعان. سيرەك كىتاپتار قورىندا ءتۇرلى ءبىلىم سالالارى بويىنشا كوپتەگەن ەۋروپالىق ەلدەردە جاريالانعان ادەبيەتتەر، سونىڭ ىشىندە چ.ديككەنس، ە.زول كوزى تىرىسىندە جارىق كورگەن باسىلىمدارى جانە باسقا دا كوركەم، عىلىمي-انىقتامالىق باسىلىمدار جيناقتالعان. تاريحي، جاراتىلىستانۋ-عىلىمي جانە گەوگرافيالىق مازمۇنداعى كوپتەگەن باسىلىمدار بار.
قىسقاسى، اباي اتىنداعى قازاق ۇلتتىق پەداگوگيكالىق ۋنيۆەرسيتەتى عىلىمي كىتاپحاناسىنىڭ قورىندا ەكى ءداۋىردىڭ كۋاسى بولعان وسىنداي سيرەك كىتاپتار جەتەرلىك. بۇل باسىلىمدار – ستۋدەنتتەر مەن وقىتۋشىلار ءۇشىن اسا قۇندى دۇنيەلەر.
بۇگىندە عىلىمي كىتاپحانانىڭ باستى قىزمەتى – قوردى تولىقتىرۋ، ساقتاۋ جانە جيناقتالعان اقپارات كوزدەرىن اينالىسقا تۇسىرۋمەن سيپاتتالادى. كىتاپ قورى بۇكىلحالىقتىق مۇرا بولعاندىقتان، ونى تولىق ءبۇتىن قالپىندا ساقتاپ، كەلەر ۇرپاققا تابىس ەتۋ – كىتاپحاناشىلاردىڭ قاسيەتتى بورىشى.
ەلىمىز تاۋەلسىزدىك العان العاش جىلداردان باستاپ جاعداي وزگەردى. ەلىمىزدىڭ جوعارى وقۋ ورىندارىنىڭ فاكۋلتەتتەرى جانىنان قازاق بولىمدەرى اشىلا باستادى. قازاق تىلىندەگى وقۋلىقتارى مەن وقۋ قۇرالدارىنا سۇرانىس كوبەيدى. مۇنداي بەتبۇرىس كىتاپحانا سالاسىنا ءوز قيىندىعىن الا كەلدى. ويتكەنى قانشاما قازاق بولىمدەرى اشىلعانىمەن، وقۋ ۇدەرىسىنە وراي ستۋدەنتتەردى قازاق تىلىندەگى وقۋلىقتارمەن قامتاماسىز ەتۋگە مۇمكىندىك جوق ەدى. مۇنداي قيىن جاعداي، اسىرەسە، ۋنيۆەرسيتەتىمىزدىڭ بيولوگيا، گەوگرافيا، مەحانيكا، ماتەماتيكا، فيزيكا، ەكونوميكا، فيلوسوفيا، زاڭ ماماندىقتارىنا ءتان ەدى. وسى ماسەلەلەردى شەشۋ جولىندا ۋنيۆەرسيتەت ۇستازدارى مەن كىتاپحانا قىزمەتكەرلەرى بىرلەسە وتىرىپ ەڭبەك ەتتى. ورىس تىلىندەگى وقۋلىقتارعا اۆتورلىق قۇقىقتى ساقتاي وتىرىپ، اۋدارما جاسالىندى. وقىتۋشىلار قاۋىمى جىلدار بويى وقىپ كەلە جاتقان ءدارىس-ساباقتارىن قازاقشا وقۋلىق ەتىپ باسىپ شىعارۋ جولىندا ەڭبەك ەتە باستادى.
ءقازىر قازاق تىلىندەگى قوردىڭ جاعدايى ەداۋىر جاقساردى. بۇگىن عىلىمي كىتاپحاناداعى قازاق تىلىندەگى قورىمىز جالپى قوردىڭ 70 پايىزىنا جەتتى. ءبىر ستۋدەنتكە 100 كىتاپتان كەلەدى.
كىتاپحانا ۋنيۆەرسيتەتىمىزدىڭ قۇرامداس ءبولىمى بولعاندىقتان، قورلاندىرۋعا بولىنگەن قاراجاتتى ءتيىمدى پايدالانۋعا تىرىسۋدامىز. كىتاپحاناشىلار كافەدرالارمەن تىعىز بايلانىس ورناتىپ، ءپان بويىنشا قازاق بولىمدەرىنە جەتىسپەيتىن وقۋلىقتار ءتىزىمىن باسشىلاردىڭ نازارىنا ۇسىنۋدا. كىتاپ قورىنا بولىنەتىن قاراجاتقا الىناتىن وقۋ-ادەبەتتەر ءتىزىمى كافەدرا مۇعالىمدەرىمەن بىرلەسە وتىرىپ جوسپارلانادى.
مەملەكەتتىك باعدارلامالارمەن شىعىپ، تەگىن الىنىپ وتىرعان وقۋ-ادەبيەتتەرىمىز دە تەك قانا قازاق تىلىندە. جىلىنا 30 مىڭعا جۋىق كىتاپ ءتۇسىپ وتىر. ۋنيۆەرسيتەتىمىزدىڭ «ۇلاعات» باسپاسى كىتاپ قورىن تولىقتىرۋعا ۇلكەن ۇلەس قوسۋدا. ۋنيۆەرسيتەت اكىمشىلىگى وقىتۋشىلاردىڭ ەڭبەكتەرىنە تالداۋ جاساي وتىرىپ، كىتاپتاردى بەلگىلى ءبىر جۇيەمەن، سۇرانىس مولشەرىنە قاراي باسىپ شىعارۋعا بەت بۇردى.
كەيىنگى جىلدارى «مادەني مۇرا» مەملەكەتتىك باعدارلاماسى اياسىندا حالقىمىزدىڭ مىڭداعان جىلدىق مۇراسى جۇيەلەنىپ، زەرتتەلىپ، جۇزدەگەن تومدار جارىق كوردى. كىتاپحانامىز وسى باعدارلاما اياسىندا، قوردى ءوز ەلىمىزدە شىققان جانە قازاق تىلىندەگى ادەبيەتتەرمەن مۇمكىندىگىنشە تولىقتىرۋعا، جيناقتاۋعا، ساقتاۋعا، ناسيحاتتاۋعا قول جەتكىزدى. بۇل ءىس، كىتاپحاناداعى قازاق تىلىندەگى كىتاپ قورىن تولىقتىرۋعا مەملەكەت تاراپىنان كورسەتىلگەن قامقورلىق دەپ تە قابىلداۋىمىز كەرەك
قازىرگى تاڭدا كىتاپحانا قۇرىلىمىندا 7 ءبولىم بار: ادەبيەتتەردى جيناقتاۋ جانە عىلىمي وڭدەۋ، كاتالوگتاندىرۋ جانە جۇيەلەۋ ءبولىمى، قىزمەت كورسەتۋ ءبولىمى، مادەني-بۇقارالىق، اقپاراتتىق-بيبليوگرافيالىق، كىتاپ قورى، اقپاراتتىق تەحنولوگيالار ءبولىمى.
كىتاپحانا قىزمەتكەرلەرى وقىرماندارعا 10 كىتاپ بەرۋ پۋنكتتەرىندە – 3 ابونەمەنتتە جانە 7 وقۋ زالىندا جەكەلەي ءتۇرلى قىزمەت كورسەتەدى.
وقۋ زالدارى ۋنيۆەرسيتەتتىڭ بارلىق عيماراتتارىندا ورنالاسقان.
وقىرماندارعا تولىق ءماتىندى مالىمەتتەر قورى بار ەلەكتروندىق كىتاپحانا ۇسىنىلۋدا. تولىق ءماتىندى مالىمەتتەر قورى – وقۋلىقتار مەن وقۋ قۇرالدارىنان، ءبىلىم الۋشىلارعا ارنالعان وقۋ-ادىستەمەلىك كەشەندەردەن (باواك)، اۆتورەفەراتتار مەن ديسسەرتاسيالاردان، مەرزىمدى باسىلىمدارداعى ماقالالاردان تۇرادى. پايدالانۋشىلار وتاندىق جانە شەتەلدىك تولىق ءماتىندى دەرەكقورلارعا قول جەتكىزە الادى.
كىتاپحانانىڭ كىتاپ قورى مەملەكەتتىك، ورىس جانە شەت تىلدەرىندەگى ۋنيۆەرسيتەتتىڭ ماماندىقتارىنا ساي ءارتۇرلى ءبىلىم سالالارىن قامتيدى.
كىتاپحانا جۇمىسىندا ەلباسى ۇسىنعان سيفرلى قازاقستان باعدارلاماسى جاقسى جولعا قويىلعان. «سيفرلى قازاقستان» باعدارلاماسىنىڭ باستى ماقساتى – قازاقستاندىقتاردىڭ ءومىر ساپاسىن ارتتىرۋ ءارى ۇلتتىق ەكونوميكانى سيفرلاندىرۋ بولىپ تابىلادى. كومپيۋتەر ارقىلى ەلەكتروندى قوردى پايدالانۋشىلاردىڭ جالپى سانى – 65213. 2017 جىلى 1006 كىتاپ جانە 194 جۋرنال، سىرتقى قوردان 875 ەلەكتروندى كىتاپ جۇكتەلگەن، 240 ەلەكتروندى وقۋلىق اۆتورلاردان الىنعان، 225 ەلەكتروندى فايل جۇكتەلگەن. كىتاپحانانىڭ مەدياتەكاسى 3 043 ەلەكتروندى وقۋلىقتى قۇرايدى.
سونىمەن قاتار ۋنيۆەرسيتەتتىڭ كىتاپحاناسى ينتەرنەت جەلىسىندە قوسىلعان ءوزىنىڭ جەكە سايتى بار. وتاندىق جانە شەتەلدىك ءبىلىم بەرۋ ۇيىمدارىمەن جەدەل اقپارات الۋ جانە اقپارات الماسۋ ءۇشىن كىتاپحانالار ەلەكتروندىق پوشتانى، ينتەرنەت جەلىسىن پايدالانادى.
«مەن كىتاپحانانى ءاقىل-بىلىم، ادامگەرشىلىك ورداسى دەپ بىلەمىن. ال كىتاپحاناشىلاردى سول ەشقاشان جوعالماۋعا ءتيىستى اسىل قازىنانىڭ ساقشىلارى دەپ سانايمىن» دەپ جازۋشى، قوعام قايراتكەرى ءا.كەكىلبايەۆ ايتقانداي، يناباتتى دا بىلىكتى، ەڭبەكقور دا تابيعاتىنان زيالى، كەز كەلگەن قيىندىققا توتەپ بەرە الاتىن كىتاپحاناشىلاردىڭ يگىلىكتى ىستەرى قوعامعا ءارقاشان قاجەت. ەندەشە، ءبىلىم بۇلاعىنىڭ قاينار كوزى – كىتاپحانامىز سارقىلماي، ورلەپ، وركەندەي بەرسىن!
نۇرگۇل يمانسىدىقوۆا،
اباي اتىنداعى قازاق ۇلتتىق پەداگوگيكالىق ۋنيۆەرسيتەتى عىلىمي كىتاپحاناسىنىڭ ديرەكتورى، ق ر ءبىلىم بەرۋ ءىسىنىڭ ۇزدىگى.
