قازاقستاننىڭ سوت جۇيەسىن دامىتۋ بويىنشا ايقىندالعان جەتى باسىم باعىتتىڭ  ءبىرى «ە-سوت» جوباسى شەڭبەرىندە «ۆيرتۋالدى سوت» پيلوتتىق جوباسى ىسكە قوسىلعان بولاتىن.

اتالعان جوبا اياسىندا تاراپتار سمارتفوندارىنا ورناتىلعان «TrueConf» قوسىمشاسى ارقىلى سوت پروسەسىنە بەينەبايلانىس ارقىلى ونلاين رەجيمدە تىكەلەي قوسىلا الادى. بۇگىن بۇل تۋرالى تۇركىستان وبلىسىنىڭ وڭىرلىك كوممۋنيكاسيالار قىزمەتىندە وتكەن بريفينگتە تۇركىستان وبلىستىق سوتىنىڭ سۋدياسى بۇركىت بايدۋللايەۆ مالىمدەدى.

ونىڭ ايتۋىنشا، سوت پروسەستەرىن ۆيرتۋالدى وتكىزۋ سوت تورەلىگىن جۇزەگە اسىرۋداعى اۋماقتىق كەدەرگىلەردى جويىپ، ۋاقىت جانە ماتەريالدىق رەسۋرستاردى ۇنەمدەپ، سوت تورەلىگىنە شەكسىز جانە ىڭعايلى قول جەتكىزۋدى قامتاماسىز ەتەدى.

– اعىمداعى جىلدىڭ 9 ايىنىڭ قورىتىندىسى بويىنشا دىبىس-بەينە جازبا قۇرىلعىلارىمەن وبلىس بويىنشا 14 650 ءىس قارالسا، وتكەن جىلدىڭ ءتيىستى كەزەڭىندە 12 033 ءىس شەشىمىن تاپقان. سونداي-اق، جىل باسىنان وبلىستىڭ اۋداندىق جانە وعان تەڭەستىرىلگەن سوتتارعا بارلىعى 29 368 تالاپ قويۋ ارىزى ءتۇسىپ، وتكەن جىلدىڭ وسى كەزەڭىمەن سالىستىرعاندا 10،4 پايىزعا كەمىگەن. ال تاتۋلاستىرۋ راسىمدەرى قولدانىلىپ جالپى سانى - 1045 ءىس اياقتالدى. بۇل بارلىق قاراۋمەن اياقتالعان ىستەردىڭ 3،8 پايىزىن قۇرايدى، – دەدى بۇركىت جۇماباي ۇلى.

باسپا ءسوز ءماسليحاتىنا قاتىسقان تۇركىستان وبلىستىق سوتىنىڭ سۋدياسى ايانبەك توقسانبايەۆتىڭ ايتۋىنشا، سوت قىزمەتىن وڭتايلاندىرۋ، حالىققا ىڭعايلى، اشىق، قولجەتىمدى ەتۋگە باعىتتالعان «سوت تورەلىگىنىڭ 7 ءتۇيىنى» باعدارلاماسى اياسىنداعى پيلوتتىق جوبالاردى وڭىردە قولدانىسقا كەڭىنەن ەنگىزۋ ءۇشىن ايتارلىقتاي جۇمىستار اتقارىلعان.

– تۇركىستان وبلىسى بويىنشا مامانداندىرىلعان سوتتاردىڭ عيماراتتارىندا مەدياسيا كابينەتى، فرونت-وفيستەر اشىلدى. ورتالىق ارنايى تەحنيكامەن جابدىقتالعان جانە ازاماتتارعا سوتقا بەرەتىن ارىزداردىڭ ءتارتىبى تۋرالى اقپارات الۋعا، مەدياتورمەن نەمەسە ادۆوكاتپەن كەڭەسە وتىرىپ، قۇقىقتىق ماسەلەلەردىڭ شەشىمىن تابۋعا، سونداي-اق، سوتتا قارالىپ جاتقان وتىنىشتەردىڭ ءمان-جايى تۋرالى بىلۋگە مۇمكىندىكتەر جاسالعان. سونىمەن قاتار، مەدياتورلار مەن ادۆوكاتتارعا جانە ازاماتتارعا ىسپەن تانىسۋعا ارنالعان كابينەتتەر قاراستىرىلدى. ورتالىققا كەلۋشىلەر قاجەتتى اقپارات الىپ، سوتقا قاجەتتى قۇجاتتارىن تاپسىرا الادى. بۇدان بولەك، تىركەۋ تالونى بويىنشا «سوت كابينەتى» سەرۆيسى ارقىلى ءىستىڭ بارلىق قوزعالىسىن باقىلاپ وتىرۋعا مۇمكىندىگى بار، – دەدى ايانبەك بەكەجان ۇلى.

ايتا كەتەرلىگى، «ۇلگىلى سوت» باعدارلاماسىن ىسكە اسىرۋ شەڭبەرىندە وڭىردە «سۋديا كومەكشىسى» پيلوتتىق جوباسى ىسكە قوسىلعان. جوبانىڭ نەگىزگى ماقساتى – سوتتار جۇمىسىنىڭ تيىمدىلىگىن ارتتىرۋ، سوت تورەلىگىنىڭ ساپاسىن جاقسارتىپ، سۋديالار مەن سوت قىزمەتكەرلەرىنىڭ جۇمىستارىن وڭتايلاندىرۋ.

 

تۇركىستان وبلىسى اكىمىنىڭ باسپا ءسوز قىزمەتى