Atalǵan joba aıasynda taraptar smartfondaryna ornatylǵan «TrueConf» qosymshasy arqyly sot prosesine beınebaılanys arqyly onlaın rejımde tikeleı qosyla alady. Búgin bul týraly Túrkistan oblysynyń Óńirlik komýnıkasıalar qyzmetinde ótken brıfıńte Túrkistan oblystyq sotynyń sýdıasy Búrkit Baıdýllaev málimdedi.
Onyń aıtýynsha, sot prosesterin vırtýaldy ótkizý sot tóreligin júzege asyrýdaǵy aýmaqtyq kedergilerdi joıyp, ýaqyt jáne materıaldyq resýrstardy únemdep, sot tóreligine sheksiz jáne yńǵaıly qol jetkizýdi qamtamasyz etedi.
– Aǵymdaǵy jyldyń 9 aıynyń qorytyndysy boıynsha dybys-beıne jazba qurylǵylarymen oblys boıynsha 14 650 is qaralsa, ótken jyldyń tıisti kezeńinde 12 033 is sheshimin tapqan. Sondaı-aq, jyl basynan oblystyń aýdandyq jáne oǵan teńestirilgen sottarǵa barlyǵy 29 368 talap qoıý aryzy túsip, ótken jyldyń osy kezeńimen salystyrǵanda 10,4 paıyzǵa kemigen. Al tatýlastyrý rásimderi qoldanylyp jalpy sany - 1045 is aıaqtaldy. Bul barlyq qaraýmen aıaqtalǵan isterdiń 3,8 paıyzyn quraıdy, – dedi Búrkit Jumabaıuly.
Baspasóz máslıhatyna qatysqan Túrkistan oblystyq sotynyń sýdıasy Aıanbek Toqsanbaevtyń aıtýynsha, sot qyzmetin ońtaılandyrý, halyqqa yńǵaıly, ashyq, qoljetimdi etýge baǵyttalǵan «Sot tóreliginiń 7 túıini» baǵdarlamasy aıasyndaǵy pılottyq jobalardy óńirde qoldanysqa keńinen engizý úshin aıtarlyqtaı jumystar atqarylǵan.
– Túrkistan oblysy boıynsha mamandandyrylǵan sottardyń ǵımarattarynda medıasıa kabıneti, front-ofıster ashyldy. Ortalyq arnaıy tehnıkamen jabdyqtalǵan jáne azamattarǵa sotqa beretin aryzdardyń tártibi týraly aqparat alýǵa, medıatormen nemese advokatpen keńese otyryp, quqyqtyq máselelerdiń sheshimin tabýǵa, sondaı-aq, sotta qaralyp jatqan ótinishterdiń mán-jaıy týraly bilýge múmkindikter jasalǵan. Sonymen qatar, medıatorlar men advokattarǵa jáne azamattarǵa ispen tanysýǵa arnalǵan kabınetter qarastyryldy. Ortalyqqa kelýshiler qajetti aqparat alyp, sotqa qajetti qujattaryn tapsyra alady. Budan bólek, tirkeý talony boıynsha «Sot kabıneti» servısi arqyly istiń barlyq qozǵalysyn baqylap otyrýǵa múmkindigi bar, – dedi Aıanbek Bekejanuly.
Aıta keterligi, «Úlgili sot» baǵdarlamasyn iske asyrý sheńberinde óńirde «Sýdıa kómekshisi» pılottyq jobasy iske qosylǵan. Jobanyń negizgi maqsaty – sottar jumysynyń tıimdiligin arttyrý, sot tóreliginiń sapasyn jaqsartyp, sýdıalar men sot qyzmetkerleriniń jumystaryn ońtaılandyrý.
Túrkistan oblysy ákiminiń baspasóz qyzmeti
