ەلىمىزدەگى ءبىلىم سالاسى جىل وتكەن سايىن زامان تالابىنا ساي جاڭارىپ، جاڭعىرىپ كەلەدى. بۇل ءۇشىن ارنايى جوبا-باعدارلامالار قابىلدانىپ، كوپتەگەن جۇمىستار اتقارىلۋدا. ادەتتە بىزدەر «ءبىلىم بەرۋ سالاسىندا وزگەرىستەر ءجيى ورىن الادى» دەپ سىن كوزبەن قارايتىنىمىز جاسىرىن ەمەس. شىندىعىندا قازىرگى تاڭدا الەمدەگى ءبىلىم بەرۋ سالاسى ءسات سايىن وزگەرىستى باستان كەشۋدە. سوندىقتان ءبىلىم سالاسى بويىنشا قابىلدانعان مەملەكەتتىك جوبالاردى قۋانى قابىلداۋىمىز كەرەك. بۇگىندە ەلىمىزدىڭ ءبىلىم بەرۋ سالاسىن دامىتۋ ماقساتىندا «ءبىلىمدى ۇلت» ساپالى ءبىلىم» ۇلتتىق جوباسى جۇزەگە اسۋدا. بىلىكتى ماماندار بۇل جوبانى قازاقستاندا ءبىلىم بەرۋ جۇيەسىنىڭ ساپاسىن ارتتىرۋعا باعىتتالعان اۋقىمدى باعدارلاما ەكەنىن العا تارتۋدا.
«ءبىلىمدى ۇلت» ساپالى ءبىلىم» ۇلتتىق جوباسى ءبىلىم بەرۋ سالاسىنىڭ ءار دەڭگەيىن قامتيتىن ستراتەگيالىق قۇجات دەسەك ارتىق ايتقاندىق بولماس ەدى. جوبا ساپالى ءبىلىم الۋعا قولجەتىمدىلىكتى كەڭەيتۋ، وقۋ پروسەسىنىڭ تيىمدىلىگىن ارتتىرۋ، مۇعالىمدەردىڭ كاسىبي دامۋى، وقۋشىلاردىڭ ءبىلىم ساپاسىن جاقسارتۋ سياقتى نەگىزگى ماسەلەلەردى شەشۋگە باعىتتالعان.
وسى رەتتە Dalanews.kz اقپاراتتىق اگەنتتىگىنىڭ وقىرمانادارىنا «ءبىلىمدى ۇلت» ۇلتتىق جوباسى ءۇش نەگىزگى باعىتتان ايتا كەتەيىك. بۇل جوبا ءبىرىنشى كەزەكتە ەلىمىزدەگى باستاۋىش، ورتا، كاسىپتىك جانە جوعارى ءبىلىم بەرۋ ساپاسىن ارتتىرۋ، سونداي-اق قالا مەن اۋىل اراسىنداعى ءبىلىم بەرۋ دەڭگەيىندەگى الشاقتىقتى قىسقارتۋدى كوزدەيدى.
ەكىنشىدەن، ورتا مەكتەپتەر مەن جوو-لاردى زاماناۋي جابدىقتارمەن قامتاماسىز ەتۋ، ءبىلىم بەرۋ پروسەسىنە سيفرلىق تەحنولوگيالاردى ەنگىزۋ جوبادا تايعا تاڭبا باسقانداي انىق جازىلعان.
ال جوبانىڭ ءۇشىنشى باعىتىندا ۇستازدار قاۋىمى مەن ءبىلىم بەرۋ قىزمەتكەرلەرىنىڭ كاسىبي تۇرعىدان دامۋىنا جاعداي جاساۋ ماسەلەلەرى قامتىلعان. مۇعالىمدەردىڭ بىلىكتىلىگىن ارتتىرۋ، ولاردىڭ مارتەبەسىن كوتەرۋ، جاس مامانداردى قولداۋ بۇگىندە ماڭىزدى مىندەتكە اينالعانى انىق.
جوبانىڭ باستى ماقساتى 2025 جىلعا دەيىن قازاقستانداعى بالالاردىڭ 100%-ىن مەكتەپكە دەيىنگى بىلىممەن قامتۋ جوسپارلانىپ وتىر. بۇل ماقساتقا جەتۋ ءۇشىن جاڭا بالاباقشالار سالۋ جانە ءبىلىم بەرۋدەگى جاڭاشىلدىقتاردى ەنگىزۋ جۇمىستارى جۇرگىزىلۋدە.
2025 جىلعا قاراي PISA حالىقارالىق زەرتتەۋىندە قازاقستاندى الەمنىڭ العاشقى 40 ەلى قاتارىنا ەنگىزۋ كوزدەلگەن. بۇل مەجەگە جەتۋ ءۇشىن وقىتۋ ادىستەمەلەرىن جەتىلدىرۋ، ءبىلىم بەرۋ مازمۇنىن جاڭارتۋ، اۋىلدىق جانە قالالىق مەكتەپتەر اراسىنداعى الشاقتىقتى جويۋ شارالارىن قولعا الۋدىڭ ماڭىزى زور.
قازاقستاننىڭ 2022 جىلعى PISA ناتيجەلەرىنە نازار اۋدارساق، وقۋ، ماتەماتيكا جانە جاراتىلىستانۋ عىلىمدارى بويىنشا 15 جاسار وقۋشىلاردىڭ ءبىلىم دەڭگەيىن باعالاۋ ەلىمىز 81 مەملەكەتتىڭ اراسىندا 51ء-شى ورىندى يەلەنگەنىن بايقايمىز. ناقتىراق ايتساق، ماتەماتيكادان 47ء-شى، وقۋدان 61ء-شى، جاراتىلىستانۋدان 49-شى ورىنعا ورنالاسقان. بۇل كورسەتكىشتى بۇعان دەيىنگى جىلدارمەن سالىستىرساق، جاعدايدىڭ ءبىرشاما جاقسارعانىن بايقاۋعا بولادى. ويتكەنى، 2018 جىلى قازاقستان 69-شى ورىندى مىسە تۇتقان بولاتىن. مۇنداي ىلگەرىلەۋگە بىزدەر ءبىلىم سالاسىن دامىتۋدى كوزدەيتىن مەملەكەتتىك باعدارلامالاردىڭ ارقاسىندا قول جەتكىزگەنىمىزدى ۇمىتپاۋىمىز كەرەك.
«ءبىلىمدى ۇلت» ساپالى ءبىلىم» ۇلتتىق جوباسى ءبىلىم بەرۋ ساپاسىنىڭ ارتۋى مۇعالىمدەردىڭ مارتەبەسىن كوتەرۋ، وقۋ باعدارلامالارىن جاڭارتۋ جانە ساندىق تەحنولوگيالاردى كەڭىنەن قولدانۋ سىندى ماڭىزدى مىندەتتەردى جۇزەگە اسىرۋعا ىقپال ەتۋدە. سونىمەن قاتار، قالا مەن اۋىل مەكتەپتەرى اراسىنداعى ءبىلىم بەرۋ الشاقتىعى ازايا ءتۇستى، بۇل ءبىلىم بەرۋ ساپاسىنىڭ بىرتىندەپ جاقسارۋىنا سەبەپشى بولدى.
مەكتەپتەردىڭ ينفراقۇرىلىمىن جاقسارتۋ، قاۋىپسىزدىك جۇيەلەرىن ورناتۋ، سپورتتىق جانە مادەني ءىس-شارالاردى كوبەيتۋ دە جوبادا كەڭ كولەمدى كورىنىس تاپقان.
2023 جىلى ەلىمىزدە مەكتەپ جاسىنا دەيىنگى بالالاردىڭ 94%-ى بالاباقشاعا باراعان. مەكتەپكە دەيىنگى مەكەمەلەردىڭ سانى دا ايتارلىقتاي ءوسىپ، سونىڭ ىشىندە جەكە مەنشىك بالاباقشالاردىڭ سانى ارتىپ وتىر. ەڭ باستىسى قالا مەن اۋىل مەكتەپتەرىنىڭ اراسىنداعى ءبىلىم ساپاسى الشاقتىعىن ازايتۋ ءۇشىن اۋىلدىق مەكتەپتەردىڭ ماتەريالدىق-تەحنيكالىق بازاسىن نىعايتۋ ماقساتىندا مەملەكەتتىك باعدارلامالار جۇزەگە اسىرىلۋدا.
ءقازىر وقۋشىلاردىڭ 75%-ى زاماناۋي كابينەتتەر مەن زەرتحانالاردا ءبىلىم الۋدا. بۇل – كورسەتكىشتى وقۋ اعارتۋ مينيسترلىگى الداعى جىلدارى 100%-عا جەتكىزۋ كوزدەپ وتىر. وسى رەتتە ءبىلىم وشاقتارىن ساپالى ينتەرنەتپەن قامتۋ دەڭگەيى دە ايتارلىقتاي ءوسىپ، ونىڭ دەڭگەيى قازىرگى تاڭدا 99%-دان استى. وسىلايشا «ءبىلىمدى ۇلت» ساپالى ءبىلىم» ۇلتتىق جوباسىنىڭ اياسىندا ەلىمىزدەگى مەكتەپتەر ءۇشىن ينتەرنەت قولجەتىمدى دۇنيەگە اينالدى.
قورىتا ايتقاندا، «ءبىلىمدى ۇلت» ساپالى ءبىلىم» ۇلتتىق جوباسى قازاقستاننىڭ ءبىلىم بەرۋ جۇيەسىن جاڭا دەڭگەيگە كوتەرىپ كەلەدى. جوبا ساپالى بىلىمگە قولجەتىمدىلىكتى ارتتىرىپ، سيفرلىق ساۋاتتىلىقتى دامىتۋعا جانە مۇعالىمدەر مەن وقۋشىلار ءۇشىن قولايلى جاعداي جاساۋعا باعىتتالۋدا. 2025 جىلعا قاراي جوبانىڭ بارلىق ماقساتتارى جۇزەگە اسسا، قازاقستان ءبىلىم بەرۋ ساپاسى جاعىنان ايتارلىقتاي العا جىلجىپ، حالىقارالىق دەڭگەيدە لايىقتى ورىن الا الادى.
