ۇلتتىق قورعا قول سالىپ، بيۋدجەتتىڭ جىرتىق تۇسىن جاماپ-جاسقاۋعا شەبەر ۇكىمەت مۇشەلەرى ءوز مىندەتتەرىن وسىلاي وپ-وڭاي ورىنداۋدى ءجون كورەدى. بۇل – بىزدە بولاتىن جىل سايىنعى كورىنىس. ۇلتتىق بانك تە، ادەتتە بۇعان باسىن شۇلعي، الدا قۇرداي جورعالاي جونەلەتىن. الايدا بۇل جولى ورتالىق بانك ۇكىمەتتى سەلت ەتكىزىپ، كوپتەپ بەرى العاش رەت بۇل ىستەن قالىس قالعىسى كەلەتىنىن اشىق ءبىلدىردى، دەپ حابارلايدى Dalanews.kz.
"ۇلتتىق قور اكتيۆتەرىنىڭ ءوسىمى تەك ينۆەستيسيالىق تابىستى عانا قولدايدى. ترانسفەرتتەردىڭ جوعارى كولەمى باعالارعا تىكەلەي قىسىم جاساي وتىرىپ، اقشالاي ۇسىنىستاردى ارتتىرادى. مۇنىڭ ءبارى بازالىق سىياقى مولشەرلەمەسىن تومەندەتۋدەگى كەڭىستىك اياسىن ايتارلىقتاي شەكتەيدى"، - دەدى 2024 جىلى 15 قازاندا وتكەن ۇكىمەت وتىرىسىندا ۇلتتىق بانك باسشىسى تيمۋر سۇلەيمەنوۆ.
ونىڭ ايتۋىنشا، ۇلتتىق قورعا تۇسكەن تۇسىمنەن الىنىپ جاتقان اقشا كولەمى كوپ.
"2024 جىلعى ترانسفەرتتەردىڭ جالپى كولەمى 6 ترلن تەڭگەدەن اسادى، ال 2024 جىلدىڭ باسىندا بۇل شەك 3،6 ترلن تەڭگەنى قۇرايدى دەپ جوسپارلانعان بولاتىن"، دەپ ەسكە سالدى سۇلەيمەنوۆ.
وسىلاي دەگەن سۇلەيمەنوۆ، شىن مانىندە بىرنەشە جىلدان بەرى "قازاقستاندا بيۋدجەتتىك داعدارىس بولاتىن كۇن تاياپ قالدى" دەپ دابىل قاعىپ جۇرگەن ساراپشىلاردىڭ پىكىرلەرىن قايتالاپ، ناقتىلاپ وتىر.
ۇكىمەت تاۋەلسىز ساراپشىلار پىكىرلەرىن، ادەتتە ەلەمەيدى. ءبىراق ۇلتتىق بانكتىڭ بۇل جولى ساراپشىلار قاۋىمى جاعىنا شىعۋى ءوز جايىن كۇيتتەۋدەن تۋىنداۋدا. ويتكەنى ولار ءقازىر ينفلياسيانى تۇراقتاندىرۋ بويىنشا نەگىزگى مىندەتتەرىن ورىنداۋدا قاۋقارسىزدىق تانىتۋدا. ال شەنەۋنىكتەر ترانسفەرتتەرسىز توقايەۆتىڭ 2029 جىلعا قاراي ءجىو-نى ەكى ەسەگە ارتتىرۋ تۋرالى تاپسىرماسىن ورىنداي المايدى. ونسىز دا وپەك شەكتەۋلەرى ءبىر جاعىنان قىسىپ جاتقانى ايان. وسى جاعىنان العاندا، بۇگىن ۇكىمەتتە مۇددەلەر قاقتىعىسى ورىن الدى دەسە دە بولادى.
