Ulttyq qorǵa qol salyp, biýdjettiń jyrtyq tusyn jamap-jasqaýǵa sheber Úkimet músheleri óz mindetterin osylai op-ońai oryndaýdy jón kóredi. Bul – bizde bolatyn jyl saiynǵy kórinis. Ulttyq bank te, ádette buǵan basyn shulǵi, alda qurdai jorǵalai jóneletin. Alaida bul joly ortalyq bank Úkimetti selt etkizip, kóptep beri alǵash ret bul isten qalys qalǵysy keletinin ashyq bildirdi, dep habarlaidy Dalanews.kz.
"Ulttyq qor aktivteriniń ósimi tek investitsiialyq tabysty ǵana qoldaidy. Transfertterdiń joǵary kólemi baǵalarǵa tikelei qysym jasai otyryp, aqshalai usynystardy arttyrady. Munyń bári bazalyq syiaqy mólsherlemesin tómendetýdegi keńistik aiasyn aitarlyqtai shekteidi", - dedi 2024 jyly 15 qazanda ótken Úkimet otyrysynda Ulttyq bank basshysy Timýr Súleimenov.
Onyń aitýynsha, Ulttyq qorǵa túsken túsimnen alynyp jatqan aqsha kólemi kóp.
"2024 jylǵy transfertterdiń jalpy kólemi 6 trln teńgeden asady, al 2024 jyldyń basynda bul shek 3,6 trln teńgeni quraidy dep josparlanǵan bolatyn", dep eske saldy Súleimenov.
Osylai degen Súleimenov, shyn máninde birneshe jyldan beri "Qazaqstanda biýdjettik daǵdarys bolatyn kún taiap qaldy" dep dabyl qaǵyp júrgen sarapshylardyń pikirlerin qaitalap, naqtylap otyr.
Úkimet táýelsiz sarapshylar pikirlerin, ádette elemeidi. Biraq Ulttyq banktiń bul joly sarapshylar qaýymy jaǵyna shyǵýy óz jaiyn kúitteýden týyndaýda. Óitkeni olar qazir infliatsiiany turaqtandyrý boiynsha negizgi mindetterin oryndaýda qaýqarsyzdyq tanytýda. Al sheneýnikter transferttersiz Toqaevtyń 2029 jylǵa qarai JIÓ-ni eki esege arttyrý týraly tapsyrmasyn oryndai almaidy. Onsyz da OPEK shekteýleri bir jaǵynan qysyp jatqany aian. Osy jaǵynan alǵanda, búgin Úkimette múddeler qaqtyǵysy oryn aldy dese de bolady.
