Astanada «Energetikalyq jáne kommýnaldyq sektorlardy jańǵyrtý» ulttyq jobasy aiasynda óndiristi damytý jáne otandyq ónim úlesin arttyrý máselelerine arnalǵan seminar-keńes ótti, dep habarlaidy dalanews.kz.
Is-sharaǵa tabiǵi monopoliia sýbektileri, memlekettik organdar, salalyq uiymdar men qazaqstandyq óndirýshiler qatysty. Kezdesý barysynda EKSJ ulttyq jobasy tek infraqurylymdy jańǵyrtý quraly ǵana emes, sonymen qatar otandyq óndiristi damytýǵa arnalǵan mańyzdy tetik ekeni aityldy.
QR Ónerkásip jáne qurylys vitse-ministri Oljas Saparbekov ulttyq joba aiasynda qazaqstandyq kásiporyndardy qoldaý tetikteri qarastyrylǵanyn atap ótti.
«EKSJ ulttyq jobasyn iske asyrý aiasynda otandyq taýar óndirýshilerdi qoldaýdyń qajetti tetikteri qalyptastyryldy. Biz qazaqstandyq biznes jańǵyrtý jobalaryna belsendi qatysyp, lokalizatsiialaý deńgeiin, ónim sapasy men tehnologiialyq quzyretterin odan ári arttyrady dep senemiz», – dedi ol.
Vitse-ministrdiń aitýynsha, jobanyń negizgi baǵyttarynyń biri – el ishindegi qosylǵan qundy arttyrý jáne qazaqstandyq óndirýshilerdi qoldaý.
«Búginde Qazaqstanda mashina jasaý, metall óńdeý, qurylys materialdaryn óndirý, himiia jáne munai-gaz himiiasy salalarynda aitarlyqtai óndiristik áleýet qalyptasty. Bul ónimder sapasy jaǵynan sheteldik taýarlardan kem túspeidi», – dedi Oljas Saparbekov.
Onyń málimetinshe, EKSJ ulttyq jobasy aiasynda jalpy quny 2,2 trln teńgeni quraityn 2700-den astam taýar túrine suranys qalyptasady.
Seminar barysynda satyp alý tetikteri, ofteik-kelisimsharttar, jobalardy tsifrlyq súiemeldeý, óndiristik kooperatsiia, standarttaý jáne tarif qalyptastyrý máseleleri talqylandy. Sondai-aq jańa óndiristerdi lokalizatsiialaý, óndiristik tapshylyq kartasyn ázirleý jáne sapany baqylaý júiesin jetildirý baǵyttary kóterildi.
Is-shara aiasynda qazaqstandyq óndirýshiler ónimderiniń kórmesi uiymdastyrylyp, EKSJ jobalary boiynsha B2B kezdesýler ótti. Qatysýshylar arasynda yntymaqtastyq týraly kelisimderge qol qoiý da josparlanǵan.
