باعاناشىلداعى بالالار ۇيىندەگى داۋدان كەيىن قىزمەتىنەن بوساتىلعان الماتى وبلىسى ءبىلىم باسقارماسىنىڭ بۇرىنعى باسشىسى سالتانات بەسپايەۆا جاڭا قىزمەتكە تاعايىندالدى، دەپ حابارلايدى Dalanews.kz.
وبلىس اكىمدىگىنىڭ باسپا ءسوز قىزمەتىنىڭ مالىمەتىنشە، سالتانات بەسپايەۆا الماتى وبلىسىنىڭ تىلدەردى دامىتۋ باسقارماسىنىڭ باسشىسى قىزمەتىنە تاعايىندالعان.
ەسكە سالايىق، بۇعان دەيىن سالتانات بەسپايەۆانىڭ جاڭا قىزمەتكە تاعايىندالۋى مۇمكىن ەكەنى حابارلانعان ەدى. بۇل تۋرالى DALA INSIDE ارناسى جازعان.
“تاراپتار باعاناشىلداعى بالالار ۇيىندەگى ايقاي-شۋ باسىلعانىن كۇتكەن ەدى. ەندى سول ءسات تۋىنداپ تۇر. الماتى وبلىسى ءبىلىم باسقارماسىنىڭ بۇرىنعى باسشىسى سالتانات بەسپايەۆانى جاڭا قىزمەتكە تاعايىنداۋعا كەدەرگى جوق سياقتى”، – دەپ مالىمدەگەن بولاتىن دەرەككوز.
مالىمەتكە قاراعاندا، سالتانات داۋىسبەك قىزى باسقارما باسشىسى قىزمەتىنەن كەتكەنىمەن، اكىمدىك جۇيەسىندە قالعان. ونىڭ ورنىنا بۇعان دەيىن ەڭبەكشىقازاق، ىلە اۋداندارى مەن قونايەۆ قالالىق ءبىلىم بولىمدەرىن باسقارعان ارايلىم تولەۋبەكوۆا كەلگەن ەدى. سونداي-اق تامىزدىڭ باسىندا بەسپايەۆانىڭ ىلە اۋداندىق ءبىلىم بولىمىنە جەتەكشى بولىپ باراتىنى تۋرالى دا اقپارات تاراعان.
ايتا كەتەيىك، 2025 جىلدىڭ كوكتەمىندە الماتى قالاسىنىڭ بيلىگى "باعاناشىل" بالالار ءۇيىنىڭ تاربيەلەنۋشىلەرىن قونايەۆ قالاسىنا كوشىرۋ تۋرالى شەشىم قابىلداعاندارىن مالىمدەدى. بۇعان عيماراتتىڭ ەسكىرۋى تۇرتكى دەگەن سەبەپتى العا تارتقان. بالالارعا جاڭا ورىن الدىن-الا دايىندالىپ قويىلعانى دا ايتىلدى. الايدا بالالاردىڭ ايتۋىنشا، ايدالاداعى نىساندا، ءتىپتى تازا سۋ دا بولماعان. وقۋشىلاردىڭ وزدەرى كوشۋگە قارسىلىق تانىتقان.
سوعان قاراماستان 21 شىلدەدە "باعاناشىل" بالالار ءۇيىنىڭ تاربيەلەنۋشىلەرىن الماتىدان قونايەۆقا كوشىرۋ باستالدى، ونىڭ ارتى ۇلكەن داۋمەن تىنعانى بەلگىلى. جەلىدە ءماجبۇرلى كوشىرۋ كەزىندە تۇسىرىلگەن ۆيدەو جاريالانعان كەيىن پرەزيدەنت قاسىم-جومارت توقايەۆ بۇل پروسەستى توقتاتىپ، بالالار ءۇيىنىڭ عيماراتىن جوندەۋدى تاپسىردى. ءقازىر پرەزيدەنت اكىمشىلىگى قىزمەتتىك تەرگەۋ شارالارىن جۇرگىزۋدە.
داۋلى وقيعادان كەيىن بىردەن ءۇش شەنەۋنىك قىزمەتىمەن قوش ايتىستى.
ولاردىڭ قاتارىندا الماتى وبلىسى ءبىلىم باسقارماسىنىڭ باسشىسى سالتانات بەسپايەۆا، وبلىس اكىمىنىڭ ورىنباسارى بولات كۇرەنبەكوۆ جانە ىشكى ساياسات باسقارماسىنىڭ جەتەكشىسى ەرىك ءابىتوۆ بار.
بۇعان قوسا، الماتى وبلىسى اكىمىنىڭ ءبىرىنشى ورىنباسارىنا قاتاڭ سوگىس جاريالاندى.
