ىڭعايلى ءارى ءقاۋىپسىز سيفرلىق ورتانى قالىپتاستىرۋ ماقساتىندا قازاقستاندىق مەملەكەتتىك ورگاندار مەن ولاردىڭ ۆەدومستۆولىق باعىنىستى ۇيىمدارىنا جەكە ءموبيلدى قوسىمشالار ازىرلەۋگە تىيىم سالىنادى. قوسىمشالاردى ەنگىزۋ تەك eGov جانە Aitu پلاتفورمالارى ارقىلى جۇزەگە اسىرىلادى، دەپ حابارلايدىDalanews.kz. ۇكىمەتتىڭ باسپا ءسوز قىزمەتىنە سىلتەمە جاساپ.
بۇعان قوسا، ىڭعايلى ءارى ءقاۋىپسىز سيفرلىق ورتانى قالىپتاستىرۋ ماقساتىندا بارلىق مەملەكەتتىك ءموبيلدى سەرۆيستەر كەزەڭ- كەزەڭىمەن eGov جانە Aitu ەكوجۇيەلەرىنە SuperApp قاعيداتى بويىنشا بىرىكتىرىلەدى. بۇل باستاما ءموبيلدى قوسىمشالاردىڭ بىتىراڭقىلىعىن جويىپ، پروسەستەردى جەدەلدەتۋگە جانە حالىققا كورسەتىلەتىن مەملەكەتتىك قىزمەتتەردىڭ ساپاسىن ارتتىرۋعا مۇمكىندىك بەرەدى. اتالعان جانە وزگە دە شەشىمدەر پرەمەر- مينيستر ولجاس بەكتەنوۆتىڭ توراعالىعىمەن وتكەن سيفرلىق شتاب وتىرىسىنىڭ قورىتىندىسى بويىنشا قابىلداندى.
«سيفرلىق شتابتىڭ شەشىمىمەن مەملەكەتتىك ورگاندارعا Astana Hub IT – ستارتاپتار تەحنوپاركىنىڭ باسىم قىزمەت تۇرلەرىنىڭ تىزىمىنە مۋلتيمەديا، ديزاين جانە ويىنداردى باسىپ شىعارۋ، باعدارلامالىق قامتاماسىز ەتۋدى ەنگىزۋ، سۇيەمەلدەۋ جانە تۇرلەندىرۋ، سونداي- اق كيبەرسپورت سالاسىنداعى قىزمەتتەر سەكىلدى تانىمال باعىتتاردى قوسۋ تاپسىرىلدى. بۇعان قوسا، ءتىزىم قازاقستان رەزيدەنتى ەمەس تۇلعالارعا باعدارلامالىق قامتاماسىز ەتۋ ارقىلى بيزنەس- پروسەستەردى اۋتسورينگ نەگىزىندە كورسەتۋ جانە اعىلشىن ءتىلىن وقىتۋ قىزمەتتەرىمەن تولىقتىرىلدى. قىزمەت اياسىن كەڭەيتۋ Astana Hub-تىڭ جاھاندىق تەحنولوگيالىق قاۋىمداستىقتى تارتۋ ورتالىعى رەتىندەگى ورنىن كۇشەيتەدى»،- دەپ حابارلادى ۇكىمەتتىڭ باسپا ءسوز قىزمەتى.
