اعىمداعى جىلدىڭ 21 قازانىندا استانا قالاسىنداعى №44 مەكتەپتە ەلىمىزدىڭ تاريحىنداعى ۇلى تۇلعالاردىڭ ءبىرى- راقىمجان قوشقاربايەۆتىڭ ەرلىگىنە ارنالعان تاعىلىمدى ءىس- شارا ءوتتى دەپ حابارلايدى Dalanews.kz.
اتالعان شارانى «سارايشىق» اۋدانىنىڭ ارداگەرلەر كەڭەسى ۇيىمداستىرىپ وتىر. ءىس- شارا استانا قالاسىنىڭ «سارايشىق» اۋدانى اكىمدىگىنىڭ اپپاراتى مەن قازاقستان رەسپۋبليكاسى قورعانىس مينيسترلىگىنىڭ قولداۋىمەن ءوتتى.
جاسكەقالي ۇلى تومپييەۆ «سارايشىق اۋداندىق ارداگەرلەر كەڭەسى» ءتوراعاسىنىڭ ورىنباسارى ءوز سەزىمدەرىمەن دە ءبولىسىپ ءوتتى:
«بۇگىن وتە قۋانىشتى كۇن. ءبىز حالىق قاھارمانى راقىمجان قوشقاربايەۆتىڭ بەرليندەگى رەيحستاققا تۋىن تىككەنىنە 80 جىل تولىپ وتىر. ارنايى ءبىز بۇگىن سالتاناتتى جيىن وتكىزدىك. قۇرمەتتى كاراۋل بولدى. ارداگەرلەر، باسقا دا قوناقتار راقىمجان قوشقاربايەۆتىڭ مەموريالدى تاقتاسىنا گۇل شوقتارىن قويدى . ءماجىلىس زالىندا سالتاناتتى جيىن وتەدى. كونسەرتتىك باعدارلاما بولادى. جيىننان كەيىن راقىمجان قوشقاربايەۆقا ارنايى اس بەرەمىز، ياعني كەلگەن قوناقتارعا، ارداگەرلەرگە»،- دەپ ءوز ويىمەن ءبولىسىپ ءوتتى.
ءىس- شارانىڭ باستى ماقساتى- تاريحتى ۇمىتپاۋ، ەرلىكتى دارىپتەۋ
تاريحتى تەك وقۋلىقتان ەمەس، وسىنداي تاعىلىمدى كەزدەسۋلەر ارقىلى سانامىزعا ءسىڭىرۋ- بۇگىنگى بۋىن ءۇشىن اسا ماڭىزدى. شارانىڭ باستى ماقساتى- جاس ۇرپاققا راقىمجان قوشقاربايەۆتىڭ ەرلىگىن ۇلگى ەتىپ كورسەتۋ، وتانعا دەگەن سۇيىسپەنشىلىكتى وياتۋ.
ءىس- شارا اياسىندا:
مەملەكەتتىك ورگاندار وكىلدەرى، ارداگەرلەر، قوعام قايراتكەرلەرى ءسوز سويلەپ، باتىردىڭ ءومىرى مەن ەرلىگى جايلى تاعىلىمدى ويلارىمەن ءبولىسىپ ءوتتى؛
مەكتەپ الاڭىندا ورنالاسقان راقىمجان قوشقاربايەۆتىڭ مەموريالدىق تاقتاسىنا گۇل شوقتارى قويىلىپ، ۇنسىزدىك مينۋتى جاريالاندى؛
وقۋشىلار مەن قوناقتارعا ارنالعان كونسەرتتىك باعدارلاما، پاتريوتتىق اندەر، ساحنالىق قويىلىمدار ۇسىنىلدى.
راقىمجان قوشقاربايەۆتىڭ ەسىمى- ۇرپاق ساناسىندا ماڭگىلىك ساقتالاتىن رۋح سيمۆولى. ونىڭ رەيحستاگقا تىككەن تۋى- بۇگىندە ازات قازاقستاننىڭ جارقىن بولاشاعىنا جول اشقان جەڭىس تۋى.
