الماتى قوعامدىق كولىگىنىڭ جۇرگىزۋشىلەرى جولاۋشىلارمەن سىپايى قارىم-قاتىناس جاساۋ كۋرستارىنان وتەدى، – دەپ حابارلايدى Dalanews.kz الماتى قالاسى اكىمىنىڭ باسپا ءسوز قىزمەتىنە سىلتەمە جاساپ.

بۇل تۋرالى جەتىسۋ اۋدانىنىڭ تۇرعىندارىمەن كەزدەسۋ بارىسىندا الماتى اكىمى ەربولات دوسايەۆ قالالىق تاسىمالداۋشىلار ۇسىناتىن قىزمەتتەردىڭ ساپاسى تۋرالى سۇراققا جاۋاپ بەردى.

«قوعامدىق كولىكتە قىزمەت كورسەتۋ ساپاسىن ارتتىرۋ ماڭعىزدى مالەلەنىڭ ءبىرى بولىپ تابىلادى ءبىز بۇل باعىتتا جۇمىستى جەكە تاسىمالداۋشىلارمەن دە، «الماتىەلەكتروترانسپەن» دە تۇراقتى نەگىزدە جۇرگىزىپ جاتىرمىز. وڭ وزگەرىستەر بار، ءبىز مۇنى Open Almaty-دەگى وتىنىشتەردىڭ قۇرىلىمى بويىنشا كورەمىز. قالادا جىلجىمالى قۇرام جاڭارتىلدى، ءبىراق جۇرگىزۋشىلەر بويىنشا سۇراقتار بار»، - دەدى ەربولات دوسايەۆ.

مەگاپوليس اكىمى بۇگىندە كاسىپورىنداردى جۇرگىزۋشىلەر سانى مەن ولاردىڭ اۋىسىمى بويىنشا نورماتيۆتىك قامتاماسىز ەتۋگە بايلانىستى ماسەلە تولىق شەشىلمەگەنىن، بۇل جۇمىستى جانداندىرۋعا قاتىستى ەكەنىن اتاپ ءوتتى.

«ءبىز جۇرگىزۋشىلەردىڭ جالاقىسىن تاعى دا كوتەردىك جانە قوعامدىق كولىك جۇرگىزۋشىسىنىڭ جۇمىسى بەدەلدى بولۋى ءۇشىن مۇنى جالعاستىرۋعا نيەتتىمىز. سونداي-اق، مەن كوللەدجدەرمەن جۇرگىزۋشىلەردى دايارلاۋ ماسەلەسىن، ونىڭ ىشىندە جولاۋشىلارمەن قارىم-قاتىناس مادەنيەتى تۇرعىسىنان پىسىقتاۋدى تاپسىردىم. بىلىكتىلىكتى ارتتىرۋ كۋرستارىنان وتكەندەر جالاقىعا ۇستەمەاقى الادى. ءبىز ماتەريالدىق ىنتالاندىرۋ ارقىلى جۇمىس ساپاسىن جاقسارتۋعا ءمان بەرەمىز، جىل سوڭىنا دەيىن وسى ماسەلەلەردىڭ ءبىر بولىگى جۇزەگە اساتىن بولادى»، - دەپ اتاپ ءوتتى الماتى اكىمى.  

ايتا كەتۋ كەرەك، بيىل قالادا جۇرگىزۋشى قۇرامى ءۇشىن دەمالىس بولمەلەرىمەن جابدىقتالعان 10 دەمالۋ  پۋنكتى سالىنادى.