تۇركىستان وبلىسىندا 2025 جىلدىڭ 1 ناۋرىزداعى جاعداي بويىنشا جەرگىلىكتى بيۋدجەتكە 44،6 ملرد. تەڭگە سالىقتار مەن باسقا دا تۇسىمدەر ءتۇسىپ، جوسپار 180،7%-عا ورىندالدى. قارجى سالاسىنداعى ماسەلەلەر، وبلىستىڭ وزىندىك تابىسى مەن كىرىس كوزدەرىن ۇلعايتۋ جوسپارى وبلىس اكىمى اپپاراتىنىڭ ماجىلىسىندە تالقىلاندى،- دەپ حابارلايدى Dalanews.kz
بۇل – رەسپۋبليكا دەڭگەيىندە 5ء-شى ناتيجە. تۇركىستان وبلىسىنىڭ اكىمى نۇرالحان كوشەروۆ وسى باعىتتا جۇمىستى جانداندىرا ءتۇسۋدى تاپسىردى.
"مەملەكەت باسشىسى قاسىم-جومارت كەمەل ۇلى وڭىردەگى حالىقتىڭ ءال-اۋقاتىن كوتەرۋ، تۇرمىس ساپاسىن جاقسارتۋ مىندەتىن جۇكتەدى. قارجى جانە سالىق سالاسىنداعى جۇمىستى جانداندىرا ءتۇسۋ قاجەت. كىرىس كوزدەرىن ۇلعايتىڭىزدار. اۋدان، قالا اكىمدەرى جاۋاپتى باسقارما مەن دەپارتامەنتپەن بىرلەسە جۇمىس اتقارسىن. ءبىز تۇركىستان ءوڭىرىنىڭ وزىندىك تابىسىن ارتتىرۋىمىز كەرەك"، – دەدى نۇرالحان كوشەروۆ.
ماجىلىستە تۇركىستان وبلىسىنىڭ قارجى جانە مەملەكەتتىك اكتيۆتەر باسقارماسى قايرات ەلىبايەۆتىڭ ايتۋىنشا، جوسپاردىڭ ارتىعىمەن ورىندالۋى تابىس سالىعىنان – 8،1 ملرد. تەڭگە، مەنشىك سالىعىنان – 1،7 ملرد. تەڭگە، جەر قويناۋىن پايدالانۋشىلاردىڭ اۋدارىمدارىنان – 1،7 ملرد. تەڭگە جانە وزگە دە تۇسىمدەر ەسەبىنەن ورىندالىپ وتىر. سالىقتىق تۇسىمدەر بويىنشا بيۋدجەتكە 38،5 ملرد. تەڭگە تۇسسە، سالىقتىق ەمەس تۇسىمدەر بويىنشا 4،6 ملرد. تەڭگە ءتۇسىپ، جوسپار ارتىعىمەن ورىندالدى.
ماجىلىستە وبلىستا «جايلى مەكتەپ» جوباسىنىڭ جۇزەگە اسىرىلۋى جانە حاتتامالىق تاپسىرمالاردىڭ ورىندالۋى بويىنشا دا ەسەپتەر تىڭدالىپ، جاۋاپتىلارعا ءتيىستى مىندەتتەر جۇكتەلدى.
