Dalanews.kz وسى اقپاراتتىڭ اق-قاراسىن انىقتاپ، ءبىراز قىزىقتى مالىمەت تاپتى.
الياسكا اكىمدىگى تۇرعىندار شوتىنا وسى شتاتتا تۇراقتاپ قالعانى ءۇشىن العىس رەتىندە جىل سايىن اقشا اۋدارىپ وتىرادى.
1976 جىلى الياسكانىڭ سول تۇستاعى گۋبەرناتورى دجەي حامموند نەگىزىن قالاعان قور بار. الەۋمەتتىك تولەم وسى قور ارقىلى بەرىلەدى.
الياسكا شتاتىنىڭ شەنەۋنىكتەرى وسى قورعا مۇنايدان تۇسكەن تابىستىڭ 25 پايىزىن اۋدارىپ وتىرادى.
“مۇنايدان تۇسكەن قاراجاتتى ەرتەڭگە ساقتاپ نە بولماسا ماقساتسىز دۇنيەگە ءراسۋا قىلمايسىز. شتاتتاعى مۇناي وندىرەتىن كومپانيالار جەرگىلىكتى بيۋدجەتكە تولەيتىن سالىقتىڭ 25 پايىزىن وسى قورعا اۋدارىپ وتىرادى. قورداعى اقشانى تۇرعىندارعا ۇلەستىرۋ بەرۋىمىز كەرەك دەگەن شەشىم قابىلدادىق” – دەيدى دجەي حامموند (سۋرەتتە).
قور جىل سايىن اتقارعان جۇمىسىنىڭ ەسەپ-قيسابىن رەسمي سايتىندا جاريالايدى.
تولەم كولەمى نارىقتاعى احۋالعا بايلانىستى وزگەرەدى جانە ادام باسىنا شاققاندا جىلىنا ورتا ەسەپپەن 1150 دوللاردى قۇرايدى.
بۇعان دەيىنگى ەڭ قوماقتى تولەمدى الياسكالىقتار 2015 جىلى الدى. بۇ جىلى شتاتتاعى ءاربىر تۇرعىننىڭ ەسەپ-شوتىنا – 2072 دوللار اۋدارىلعان.
بۇل قاراجات تۇرعىنداردىڭ قولىنا تىكەلەي بەرىلمەيدى. ازاماتتاردىڭ بانكتەگى ەسەپ-شوتىنا اۋدارىلادى. ونى قولما-قول اقشاعا اينالدىرا المايسىز. مۇنايدان تۇسكەن وزىڭىزگە تيەسىلى ۇلەستى ناقتى كەلىسىلگەن ماقساتقا عانا جۇمساۋعا رۇقسات بەرىلەدى.
اتاپ ايتقاندا وقۋدىڭ اقشاسىن تولەۋ نەمەسە زەينەتاقى جيناعىنا اۋدارۋ، جانارماي ساتىپ الۋ نەمەسە ەل ىشىلىك ساپارعا شىققان جول-پۇلدىڭ قاجەتىن وتەۋ سەكىلدى قىزمەت تۇرىنە جۇمساي الاسىز.
مۇنداي تۇسكەن ۇلەستى الياسكاعا تابان تىرەگەن ازاماتتاردىڭ بارلىعى بىردەي الا المايدى. وسى شتاتقا ءبىرجولا قونىس اۋدارىپ، ءبىر جىلدان اسا ۋاقىت ءومىر سۇرگەن جانە حات جۇزىندە ءارى قاراي دا تۇراقتاپ قالارىن راستاعان تۇرعىندارعا عانا بەرىلەدى.
سوتتالعان، ىشىمدىككە، ەسىرتكىگە سالىنعان تۇرعىندار مۇنداي ۇلەستەن قۇرالاقان قالادى.
ىلگەرىدە ايتقانداي تولەم كولەمى دە ءارتۇرلى. الەمدىك قارجى نارىعىنىڭ احۋالىنا قاراي قۇبىلىپ تۇرادى.
مۇناي تۇسكەن تابىستى ۇلەستىرىپ بەرەتىن قور مالىمەتىنە قاراعاندا، الياسكا تۇرعىندارىنىڭ شوتىنا 2011-2015 جىلدار ارالىعىندا مۇنشاما قارجى اۋدارىلىپتى:
- 2011 جىلى — 1174 دوللار؛
• 2012 جىلى — 878 دوللار؛
• 2013 جىلى — 900 دوللار؛
• 2014 جىلى — 1884 دوللار؛
• 2015 جىلى — 2072 دوللار.
الياسكا اقش-تاعى اۋقاتتى شتاتتىڭ ءبىرى. امەريكانىڭ ستاتيستيكا بيۋروسى كەلتىرگەن مالىمەتكە اي تابىس دەڭگەيى جاعىنان الياسكا ايماقتار اراسىندا 4ء-شى ورىندا تۇر.
ايتالىق 2018 جىلى الياسكادا تۇراتىن ءبىر وتباسى ورتا ەسەپپەن 55 مىڭ دوللار تابىس تاۋىپتى. ايعا شاققاندا بۇل كورسەتكىش 4583 دوللاردى قۇرايدى.
2015 جىلى وسىنداعى ءاربىر تۇرعىنعا 2072 دوللاردان تولەنگەنىن ەسكەرسەك، الياسكالىقتاردىڭ ايلىعىنا 172 دوللار قوسىمشا تابىس قوسىلعان. البەتتە اجەپتاۋىر كومەك.
الياسكالىقتاردىڭ باسىم بولىگى الگى تولەمدى كوبىنە-كوپ جانارماي الۋعا جۇمسايدى ەكەن. شتاتتاعى جانارماي گاللونىنىڭ (3،8 ليتر) باعاسى 3،4 دوللاردىڭ شاماسىندا.
الياسكا اكىمدىگى الەۋمەتتىك كومەكتى شتاتتىڭ تارتىمدىلىعىن ارتتىرىپ، قوسىمشا جۇمىس كۇشىن تارتۋ ماقساتىندا اۋداراتىنىن جاسىرعان ەمەس.
ءدال ءازىر الياكا اقش-تاعى جەر كولەمى جاعىنان ەڭ ۇلكەن جانە حالقى از قونىستانعان ايماقتىڭ ءبىرى. 2018 جىلعى دەرەككە ساي شتاتتا 738 مىڭ ادام ءومىر سۇرەدى. ءبىر شارشى ميلگە ءبىر ادامنان كەلەدى ەكەن.
2018 جىلى قورداعى قاراجاتتىڭ جالپى كولەمى 63،9 ملرد دوللاردى قۇراعان. الياسكا تۇرعىندارى الەۋمەتتىك كومەكتى 42 جىل بويى ۇزبەي الىپ كەلەدى.
ازىرلەگەن، دۋمان بىقاي
