الماتىلىق بلوگەر كوتەرمە بازار مەن قالاداعى سۋپەرماركەتتەرىنىڭ بىرىندەگى ازىق-تۇلىك باعاسىن سالىستىرىپ كوردى. ول بۇل تۋرالى Instagram-داعى پاراقشاسىندا ۆيدەو جاريالادى، دەپ حابارلايدى Dalanews.kz.
روزىباكييەۆ كوشەسىندەگى تانىمال سۋپەرماركەتتىڭ بىرىنە باس سۇققان بلوگەر ۆلاد پريتۋلياك ەكى اراداعى باعادا كادىمگىدەي ۇلكەن ايىرما بارىن انىقتادى.
مىسالى، كوتەرمە ساۋدادا Alpen Gold شوكولادى 450 تەڭگە تۇرسا، ال سۋپەرماركەتتەگى قۇنى 1179 تەڭگە بولىپ شىقتى. باعاداعى ايىرمادا شامامەن 2،5 ەسە قىمباتشىلىق بار. تاۋىق ەتى دە بازاردا ارزانىراق ەكەن: Magnum-دا ونىڭ ءبىر كەلىسى 2275 تەڭگە تۇرسا، بازار سورەسىندەگىسى - 1750 تەڭگە. تاۋىق ەتىنىڭ باسقا تۇرلەرى بويىنشا باعا ايىرماسى كەمىندە 500 تەڭگەءنى قۇرايدى.
بازاردا جۇمىرتقانىڭ 10 داناسىن 520 تەڭگەدەن تابۋعا بولسا، دۇكەندەگىسى 895 تەڭگەدەن باستالادى. كوتەرمە ساۋدادا 6%-دىق ءسۇتتىڭ 1 ءليترى - 500 تەڭگە، سۋپەرماركەتتەگىسى - 665 تەڭگە. ماكارونداردىڭ ءبىر كەلىسى بازاردا 350-400 تەڭگە ارالىعىندا بولسا، ال ساۋدا جەلىسىندە 455-497 تەڭگەدەن ساتىلادى.
ءبىراق وسىعان ۇقساس كەرى جايتتار دا تىركەلگەن. مىسالى، 1 ليتر كۇنباعىس مايىنىڭ كوتەرمە ساۋداداعى قۇنى 810-900 تەڭگە بولسا، ساۋدا جەلىسىندە 781 تەڭگەنى قامتيدى. قانت تا سۋپەرماركەتتە الدەقايدا ارزان بولىپ شىققان: ونىڭ 1 كەلىسى بازاردا 500 تەڭگە تۇرسا، دۇكەندەگىسى - 399 تەڭگە.
بارىنەن بۇرىن كارتوپ باعاسى ەرەكشە كوزگە ءتۇستى: بازاردا بولشەك ساۋدادا ونىڭ 1 كەلىسى - 250 تەڭگە، كوتەرمە ساۋدادا — 200 تەڭگە، ال سۋپەرماركەتتەگى قۇن - 176 تەڭگە.
بۇعان دەيىن ەكونوميستتىڭ تابىسى وسكەن حالىقتىڭ جاعدايى نەگە جاقسارماي جاتقانىن سيفرلارمەن دالەلدەپ بەرگەن بولاتىن. رۋسلان سۇلتانوۆتىڭ ايتۋىنشا، 2025 جىلدىڭ II-توقسانىندا جان باسىنا شاققانداعى اقشالاي تابىس 359 638 تەڭگەگە جەتىپ، ءبىر جىلدا 8،9%-عا ارتىپتى. قاعازدا بۇل ءوسىم ءپوزيتيۆتى قارقىن رەتىندە كورسەتىلەدى. الايدا قىمباتشىلىق ۇدەپ، تۇتىنۋ باعاسى جوعارى قارقىنمەن ەكپىندەپ جاتقان ومىردە مۇنداي نومينالدى ءوسىم حالىق جاقسىراق ءومىر سۇرە باستادى دەگەندى استە بىلدىرە المايدى. تەك ولاردىڭ شىعىنى قىمباتتاي تۇسكەنى عانا ايقىندايدى.
"سونىمەن قاتار كەي ايماقتاردا قارىز بەن نەسيەنى وتەۋگە كەتەتىن شىعىن جوعارى، بۇل ۇلەس ۇلىتاۋ وبلىسىندا 12%-دان استام، قاراعاندىدا شامامەن 10%-دى قۇرايدى. بۇل بورىش جۇكتەمەسىن اۋىرلاتىپ، پايىزدىق مولشەرلەمەلەر وسكەندە نەمەسە تابىس ازايعاندا كەي وتباسىلاردى تىعىرىققا تىركەپ، كەدەيلەندىرە تۇسەدى.مۇنىڭ ءبارى نەگىزگى ماسەلەنى ايقىن كورسەتەدى: تابىس ءوسىپ جاتقانىمەن، ساتىپ الۋ قابىلەتى ارتپاي وتىر. شىنايى تابىس (ينفلياسيانى شەگەرگەندە) الدەقايدا باياۋ ءوسىپ جاتىر، كەي وڭىرلەردە مۇلدە توقىراپ قالعان. دەمەك، حالىق بۇرىنعىداي تاۋار مەن قىزمەتتىڭ سول كولەمىن عانا تۇتىنادى، تەك قىمباتتىراق باعامەن"، - دەيدى ەكونوميست.
