ەكولوگيا مينيسترلىگى الماتىداعى تۇمشانىڭ باستى سەبەبى اۆتوكولىكتەر دەپ جىلدار بويى ايتىپ كەلدى. ۆەدومستۆو تاراتقان مالىمەتتەردە زياندى شىعارىندىلاردىڭ 60 پايىزى كولىككە تيەسىلى ەكەنى كورسەتىلەتىن. الايدا حالىقارالىق ساراپشىلار جۇرگىزگەن زەرتتەۋ مۇلدە باسقا ناتيجەنى كورسەتتى، دەپ حابارلايدى Dalanews.kz.
ولشەۋ قورىتىندىسىنا سايكەس، الماتىداعى PM 2.5 دەپ اتالاتىن ۇساق قاتتى بولشەكتەردىڭ دەڭگەيى دۇنيەجۇزىلىك دەنساۋلىق ساقتاۋ ۇيىمى بەلگىلەگەن نورمادان جەتى ەسەدەن استام جوعارى.
زەرتتەۋ دەرەكتەرىنە قاراعاندا، اۋانى ەڭ كوپ لاستايتىن نەگىزگى كوزدەر – جىلۋ ەلەكتر ورتالىقتارى مەن كومىر جاعاتىن جەكە سەكتور. ولاردىڭ جيىنتىق ۇلەسى 34 پايىزدى قۇرايدى. بۇدان كەيىنگى ءىرى فاكتور – جول بويىنان كوتەرىلەتىن شاڭ. ونىڭ ۇلەسى 32 پايىزعا جەتەدى.
ساراپشىلاردىڭ ايتۋىنشا، لاستانۋدىڭ تاعى 20 پايىزى قالانىڭ قازانشۇڭقىردا ورنالاسۋىنا بايلانىستى جينالىپ قالاتىن اۋا ماسسالارىنىڭ اسەرىنەن بولادى. ال اۆتوكولىك شىعارىندىلارىنىڭ ناقتى ۇلەسى نەبارى 14 پايىز بولىپ شىققان.
وسىلايشا، زەرتتەۋ ناتيجەسى جاپپاي ەلەكتروموبيلگە كوشۋ الماتىداعى لاس اۋا ماسەلەسىن تولىق شەشپەيتىنىن كورسەتتى.
