الماتى پروكۋراتۋراسى جەر زاڭناماسىنىڭ بۇزىلۋىن انىقتاپ، بيۋدجەتتەن 800 ملن تەڭگەدەن استام قاراجاتتىڭ نەگىزسىز جۇمسالۋىنا جول بەرمەدى، دەپ حابارلايدى Dala News.
قاداعالاۋ بارىسىندا جەرگىلىكتى اتقارۋشى ورگاننىڭ 0،5006 گەكتار جەر ۋچاسكەسىن ماجبۇرلەپ يەلىكتەن شىعارۋ تۋرالى قاۋلىسى زاڭ تالاپتارىنا قايشى ەكەنى بەلگىلى بولدى.
پروكۋراتۋرا مالىمەتىنشە، بۇل اۋماقتا قالا باس جوسپارىنا سايكەس جالپى پايدالانۋداعى نىساندار سالۋ قاراستىرىلماعان. سوعان قاراماستان، اكىمدىك جەردى ءدال وسىنداي ماقساتتا الىپ قويۋ تۋرالى شەشىم قابىلداعان.
اتالعان جەر تەلىمىنىڭ باعالاۋ قۇنى 800 ملن تەڭگەدەن اسادى.
پروكۋراتۋرانىڭ نارازىلىعىن قاراۋ ناتيجەسىندە اكىمدىكتىڭ زاڭسىز قاۋلىسىنىڭ كۇشى جويىلدى.
قابىلدانعان شارالار بيۋدجەت قاراجاتىنىڭ نەگىزسىز جۇمسالۋىنا جول بەرمەي، مەملەكەت قارجىسىن ساقتاپ قالۋعا مۇمكىندىك بەردى.
