جايلى مەكتەپتەگى جايسىزدىق: قوعام جاڭا مەكتەپتىڭ قازاق تىلىندە وقىتۋىن تالاپ ەتتى

ساعىنىش سارداروۆا 16 قاز. 2025 16:45

الماتىداعى №224 مەكتەپتە ءتىل ماسەلەسىنە قاتىستى داۋ شىقتى، دەپ حابارلايدى Dalanews.kz.

داۋدىڭ باسى

بۇل ماسەلە تۋرالى الەۋمەتتىك جەلىدە جۋرناليست دياس نۇراقىن جازدى. ونىڭ سوزىنشە، اتا-انالار بالالارى وقيتىن مەكتەپتىڭ قازاق تىلىندە بولۋىن سۇراپ وتىر.

"الماتىداعى №224 مەكتەپتىڭ ارالاس تىلدە ءبىلىم بەرۋىن ءوزىمىزدىڭ قازاقتار تالاپ ەتىپ وتىر ەكەن عوي. ال بۇگىن تازا قازاقتار جينالىپ تەك قازاق مەكتەبى بولسىن دەپ جاتىر"، - دەدى ول.

بۇل جايت الەۋمەتتىك جەلىدە قىزۋ تالقىلانىپ، قوعام نارازىلىعىن تۋدىردى.

بيىل قىركۇيەكتە 2500 وقۋشى ورنىنا ارنالعان №224 جانە №221 مەكتەپتەر "كەلەشەك مەكتەپتەرى" ۇلتتىق جوباسى اياسىندا پايدالانۋعا بەرىلگەن. "جايلى مەكتەپ" دەپ باستاۋ العان جوبا ءقازىر وقۋ-اعارتۋ ءمينيسترىنىڭ ۇسىنىسىمەن "كەلەشەك مەكتەپتەرى" دەپ اتالىپ كەلەدى.

ال بۇل مەكتەپتەر اشىلعان كەزدە مينيسترلىك "قازاقستانداعى ەڭ ۇلكەن ەكى مەكتەپ الماتىدا سالىندى"، - دەپ ءسۇيىنشى سۇراعان ەكەن. دەسە دە ارتىنان وسىنداي داۋ شىعىپ وتىر.

مينيسترلىكتىڭ ۇستانىمى

وقۋ-اعارتۋ مينيسترلىگى جاڭا مەكتەپتەگى داۋعا قاتىستى Dalanews.kz ساۋالىنا بىلاي دەپ جاۋاپ قاتتى:

"وقىتۋ ءتىلى جەرگىلىكتى اتقارۋشى ورگانداردىڭ شەشىمىمەن بەلگىلەنەدى. وعان سول جەردەگى مەكتەپ جاسىنداعى بالالار سانى جانە اتا-انالاردىڭ سۇرانىسى نەگىز بولادى".

ال الماتى قالاسى ءبىلىم باسقارماسى ساۋالىمىزعا ازىرگە جاۋاپ بەرمەدى.

ايتا كەتەيىك، بۇل الماتىداعى ءبىرىنشى جاعداي ەمەس. بيىل قىركۇيەكتە دە ءدال وسىنداي داۋ شىعىپ، بەلسەندىلەر تالابىنان كەيىن الماتىداعى №215 مەكتەپ قازاق تىلىندە وقىتاتىن بولدى.


ۇسىنىلعان
سوڭعى جاڭالىقتار