بلوگەرلەر ەربولات ءجانابىلوۆ پەن ەلميرا تولەگەنوۆاعا قاتىستى قىلمىستىق ءىس قوزعالدى، ولارعا ەكى جىلعا دەيىن باس بوستاندىعىنان ايىرىلۋ ءقاۋپى ءتونىپ تۇر. الايدا، قارجى مونيتورينگى اگەنتتىگىنىڭ مالىمەتىنشە، بۇل جاعدايدىڭ الدىن الۋعا بولار ەدى، دەپ حابارلايدى Dalanews.kz.
بۇعان دەيىن قارجى مونيتورينگى اگەنتتىگى 37- دەن استام بلوگەرگە قاتىستى ماتەريالداردى اكىمشىلىك جاۋاپكەرشىلىككە تارتۋ ءۇشىن ۋاكىلەتتى ورگاندارعا جولداعان بولاتىن. سەناتتاعى بريفينگ بارىسىندا جۋرناليستەر قما ءتوراعاسىنىڭ ورىنباسارى جەڭىس ەلەمەسوۆتەن ءجانابىلوۆتار ءىسىنىڭ سوتقا دەيىن جەتپەي، قىلمىستىق سيپات الۋىنىڭ الدىن الۋعا بولار- بولماسىن سۇرادى. سەبەبى سوت كەيىن ماتەريالداردان قىلمىستىق قۇقىقبۇزۋشىلىق بەلگىلەرىن كورىپ، ءىستى ەكونوميكالىق تەرگەۋ دەپارتامەنتىنە جولداعان ەدى.
جەڭىس ەلەمەسوۆتىڭ ايتۋىنشا، بۇل- تىكەلەي تاراپتاردىڭ ۇستانىمىنا بايلانىستى. ەگەر ازامات اكىمشىلىك جازاعا كەلىسپەي، قارسى ارىز (حوداتايستۆو) تۇسىرسە، ءىس سوتقا جىبەرىلەدى. جانابىلوۆتاردىڭ جاعدايىندا ءدال وسىلاي بولعان.
بۇگىن قارجى مونيتورينگى اگەنتتىگى ءجانابىلوۆتار بلوگەرلەرىنە قاتىستى قىلمىستىق كودەكستىڭ 214- بابىنىڭ 1-بولىگى بويىنشا قىلمىستىق ءىس قوزعاعانى بەلگىلى بولدى.
ايتا كەتەتىن بولساق، بۇل باپ بويىنشا جازا: 2000 ايلىق ەسەپتىك كورسەتكىشكە دەيىن ايىپپۇل سالۋ، نە وسى مولشەردە تۇزەتۋ جۇمىستارى، نە 600 ساعاتقا دەيىن قوعامدىق جۇمىسقا تارتۋ، نە 2 جىلعا دەيىن باس بوستاندىعىن شەكتەۋ نەمەسە سول مەرزىمگە باس بوستاندىعىنان ايىرۋ، مۇلىكتى تاركىلەۋمەن نەمەسە ونسىز.
