حوككەيدەن “بارىس” كلۋبىنىڭ باس باپكەرى ميحايل كراۆەس قازاق ءتىلىن ۇيرەنۋ ويىندا جوق ەكەنىن مالىمدەدى، دەپ حابارلايدى Dalanews.kz.
ماچتان كەيىنگى باسپا ءسوز جيىنىندا Caravan.kz ءجۋرناليسى باپكەردەن:
"استاناعا كەلگەنىڭىزگە بىرنەشە اي بولدى، قازاق ءتىلىن ۇيرەنىپ ءجۇرسىز بە؟" — دەپ سۇراق قويادى.
الايدا باپكەردىڭ جاۋابى كوپشىلىكتى تاڭعالدىردى.
“مۇندا ءبارى ورىسشا سويلەيدى، اعىلشىن ءتىلى دە بار. مەن ۇلگەرمەيمىن. وندا جۇڭگو ءتىلىن دە ۇيرەنۋىم كەرەك شىعار. ورىس جانە اعىلشىن تىلدەرى جەتكىلىكتى دەپ ويلايمىن، ءبارى تۇسىنەدى عوي”، — دەدى ميحايل كراۆەس.
باپكەردىڭ بۇل ءسوزى الەۋمەتتىك جەلىدە قىزۋ تالقى تۋدىردى. اسىرەسە Threads جەلىسىندە قازاقستاندىقتار ونى سىنعا العان جازبالار بىرىنەن سوڭ ءبىرى جاريالاندى.
ءبىرى شەتەلدىك ماماندى قازاق ءتىلىن ۇيرەنگىسى كەلمەگەنى ءۇشىن جۇمىستان بوساتۋدى ۇسىنسا، ەندى ءبىرى كراۆەس ەلگە ءتىل ۇيرەنۋ ءۇشىن ەمەس، كاسىبي مىندەتىن ورىنداۋ ءۇشىن كەلگەنىن ايتادى.
