الماتىدا ءبىر توپ ادام جاڭا مەكتەپتىڭ قازاق تىلىندە وقىتۋىن تالاپ ەتتى. قالالىق ءبىلىم باسقارماسى جاعدايعا پىكىر ءبىلدىردى، دەپ حابارلايدى Dalanews.kz.

اكىمدىكتىڭ پىكىرى

الماتى قالاسى ءبىلىم باسقارماسى رەداكسيا ساۋالىنا جاۋاپ بەردى. 

"قازاقستان رەسپۋبليكاسى كونستيتۋسياسىنىڭ 7-بابىنا سايكەس مەملەكەتتىك ءتىل - قازاق ءتىلى، بۇل رەتتە مەملەكەتتىك ۇيىمداردا ورىس ءتىلى تەڭ پايدالانىلادى. مەملەكەت قازاقستان حالقىنىڭ تىلدەرiن ۇيرەنۋ ءۇشىن جاعدايلاردى قامتاماسىز ەتەدi. قازاقستان رەسپۋبليكاسىنىڭ "ءبىلىم تۋرالى" زاڭىنىڭ 9 جانە 11-باپتارىنا جانە "قازاقستان رەسپۋبليكاسىنداعى ءتىل تۋرالى "زاڭىنىڭ 16-بابىنا سايكەس ءبىلىم بەرۋ ۇيىمدارىندا وقۋ ءتىلىن حالىقتىڭ قاجەتتىلىگىن، اۋداننىڭ دەموگرافيالىق ەرەكشەلىكتەرىن، كادرلىق جانە ماتەريالدىق-تەحنيكالىق مۇمكىندىكتەرىن ەسكەرە وتىرىپ، قۇرىلتايشى (جەرگىلىكتى اتقارۋشى ورگان) بەلگىلەيدى. ءاربىر ءبىلىم بەرۋ ۇيىمى مەملەكەتتىك جالپىعا مىندەتتى ءبىلىم بەرۋ ستاندارتىنا سايكەس قازاق ءتىلىن مەملەكەتتىك، ورىس جانە ءبىر شەت ءتىلى رەتىندە وقىتۋدى قامتاماسىز ەتۋگە مىندەتتى. اتا-انالار (زاڭدى وكىلدەر) ءبىلىم بەرۋ پروسەسى ءتيىستى وقىتۋ تىلىندە جۇرگىزىلەتىن مەكتەپتى تاڭداۋ ارقىلى وقىتۋ ءتىلىن تاڭداۋ قۇقىعىن ىسكە اسىرادى"، - دەپ جازىلعان جاۋاپتا.

ءمان-جايى

بۇل ماسەلە تۋرالى الەۋمەتتىك جەلىدە جۋرناليست دياس نۇراقىن جازدى. ونىڭ سوزىنشە، اتا-انالار بالالارى وقيتىن مەكتەپتىڭ قازاق تىلىندە بولۋىن سۇراپ وتىر.

"الماتىداعى №224 مەكتەپتىڭ ارالاس تىلدە ءبىلىم بەرۋىن ءوزىمىزدىڭ قازاقتار تالاپ ەتىپ وتىر ەكەن عوي. ال بۇگىن تازا قازاقتار جينالىپ تەك قازاق مەكتەبى بولسىن دەپ جاتىر"، - دەدى ول.

بۇل جايت الەۋمەتتىك جەلىدە قىزۋ تالقىلانىپ، قوعام نارازىلىعىن تۋدىردى.

بيىل قىركۇيەكتە 2500 وقۋشى ورنىنا ارنالعان №224 جانە №221 مەكتەپتەر "كەلەشەك مەكتەپتەرى" ۇلتتىق جوباسى اياسىندا پايدالانۋعا بەرىلگەن. "جايلى مەكتەپ" دەپ باستاۋ العان جوبا ءقازىر وقۋ-اعارتۋ ءمينيسترىنىڭ ۇسىنىسىمەن "كەلەشەك مەكتەپتەرى" دەپ اتالىپ كەلەدى.

ال بۇل مەكتەپتەر اشىلعان كەزدە مينيسترلىك "قازاقستانداعى ەڭ ۇلكەن ەكى مەكتەپ الماتىدا سالىندى"، - دەپ ءسۇيىنشى سۇراعان ەكەن. دەسە دە ارتىنان وسىنداي داۋ شىعىپ وتىر.