Almatyda bir top adam jańa mekteptiń qazaq tilinde oqytýyn talap etti. Qalalyq Bilim basqarmasy jaǵdaıǵa pikir bildirdi, dep habarlaıdy Dalanews.kz.
Ákimdiktiń pikiri
Almaty qalasy Bilim basqarmasy redaksıa saýalyna jaýap berdi.
"Qazaqstan Respýblıkasy Konstıtýsıasynyń 7-babyna sáıkes memlekettik til - qazaq tili, bul rette memlekettik uıymdarda orys tili teń paıdalanylady. Memleket Qazaqstan halqynyń tilderin úırený úshin jaǵdaılardy qamtamasyz etedi. Qazaqstan Respýblıkasynyń "Bilim týraly" Zańynyń 9 jáne 11-baptaryna jáne "Qazaqstan Respýblıkasyndaǵy til týraly "Zańynyń 16-babyna sáıkes bilim berý uıymdarynda oqý tilin halyqtyń qajettiligin, aýdannyń demografıalyq erekshelikterin, kadrlyq jáne materıaldyq-tehnıkalyq múmkindikterin eskere otyryp, quryltaıshy (jergilikti atqarýshy organ) belgileıdi. Árbir bilim berý uıymy Memlekettik jalpyǵa mindetti bilim berý standartyna sáıkes qazaq tilin memlekettik, orys jáne bir shet tili retinde oqytýdy qamtamasyz etýge mindetti. Ata-analar (zańdy ókilder) bilim berý prosesi tıisti oqytý tilinde júrgiziletin mektepti tańdaý arqyly oqytý tilin tańdaý quqyǵyn iske asyrady", - dep jazylǵan jaýapta.
Mán-jaıy
Bul másele týraly áleýmettik jelide jýrnalıs Dıas Nuraqyn jazdy. Onyń sózinshe, ata-analar balalary oqıtyn mekteptiń qazaq tilinde bolýyn surap otyr.
"Almatydaǵy №224 mekteptiń aralas tilde bilim berýin ózimizdiń qazaqtar talap etip otyr eken ǵoı. Al búgin taza qazaqtar jınalyp tek qazaq mektebi bolsyn dep jatyr", - dedi ol.
Bul jaıt áleýmettik jelide qyzý talqylanyp, qoǵam narazylyǵyn týdyrdy.
Bıyl qyrkúıekte 2500 oqýshy ornyna arnalǵan №224 jáne №221 mektepter "Keleshek mektepteri" ulttyq jobasy aıasynda paıdalanýǵa berilgen. "Jaıly mektep" dep bastaý alǵan joba qazir Oqý-aǵartý mınıstriniń usynysymen "Keleshek mektepteri" dep atalyp keledi.
Al bul mektepter ashylǵan kezde mınıstrlik "Qazaqstandaǵy eń úlken eki mektep Almatyda salyndy", - dep súıinshi suraǵan eken. Dese de artynan osyndaı daý shyǵyp otyr.
