دەنساۋلىق ساقتاۋ ءمينيسترى اقمارال ءالنازاروۆا الماتىداعى پويىزدا گازدان ۋلانعان ادامداردىڭ جاعدايىنا قاتىستى مالىمەت بەردى، دەپ حابارلايدى Dalanews.kz.

ءمينيستردىڭ ايتۋىنشا، وقيعا ورنىنا جەدەل جاردەمنىڭ 13 بريگاداسى جۇمىلدىرىلعان.

“بارلىعى 53 ادام، ونىڭ ىشىندە بالالار زارداپ شەكتى. ولاردىڭ ءبارى دەر كەزىندە قالالىق ستاسيونارلاردىڭ قابىلداۋ بولىمدەرىنە جەتكىزىلىپ، تەكسەرۋدەن ءوتتى جانە قاجەتتى مەديسينالىق كومەك كورسەتىلدى”، — دەدى ءالنازاروۆا.

تەكسەرۋ ناتيجەسىندە 11 بالانى اۋرۋحاناعا جاتقىزۋ تۋرالى شەشىم قابىلدانعان.

“ەكى بالا جانساقتاۋ بولىمىندە جاتىر، قالعاندارى ءتيىستى پروفيلدىك بولىمشەلەردە مامانداردىڭ باقىلاۋىندا”، — دەپ ناقتىلادى مينيستر.

قالعان جولاۋشىلار تەكسەرۋدەن كەيىن امبۋلاتورلىق ەم الۋعا ۇيىنە جىبەرىلدى. ءالنازاروۆا مينيسترلىك جاعدايدى باقىلاۋدا ۇستاپ وتىرعانىن، الماتى قالاسىنداعى مەديسينالىق ۇيىمدارمەن تۇراقتى بايلانىستا ەكەنىن جەتكىزدى.

“بارلىق ناۋقاسقا تولىق كولەمدە مەديسينالىق كومەك كورسەتىلىپ جاتىر. دارىگەرلەر ولاردىڭ جاعدايىن تۇراقتى باقىلاپ وتىر. قاۋىپسىزدىك پەن وڭ ديناميكانى قامتاماسىز ەتۋ ءۇشىن بارلىق قاجەتتى رەسۋرستار تارتىلعان. زارداپ شەككەندەردىڭ تەزىرەك ساۋىعىپ كەتۋىن تىلەيمىن”، — دەدى ول.

پويىزداعى جاپپاي ۋلانۋدان كەيىن پوليسيا وقيعا بويىنشا قىلمىستىق ءىس قوزعادى.

“وسى دەرەك بويىنشا الماتى-1 ستانساسىنداعى جەلىلىك پوليسيا باسقارماسى قىلمىستىق كودەكستىڭ 156-بابى – “ەڭبەكتى قورعاۋ قاعيدالارىن بۇزۋ” فاكتىسى بويىنشا قىلمىستىق ءىس تىركەدى. ءقازىر وقيعانىڭ بارلىق ءمان-جايىن انىقتاۋ ءۇشىن قاجەتتى تەرگەۋ شارالارى جۇرگىزىلىپ جاتىر. تەرگەۋ ناتيجەسى بويىنشا زاڭعا سايكەس پروسەسسۋالدىق شەشىم قابىلدانادى. وزگە اقپارات جاريا ەتۋگە جاتپايدى”، — دەپ حابارلادى ۆەدومستۆو.

ەسكە سالايىق، 11 جەلتوقساندا الماتىدا پويىزدا 50-دەن اسا ادام گازعا ۋلانىپ قالعانى تۋرالى جازعان ەدىك.

"جولاۋشىلار تاسىمالى" اق اقپاراتىنا سۇيەنسەك، بۇل پويىز قۇرامى جەكە مەنشىك تاسىمالداۋشىعا تيەسىلى، ال ۆاگوندار كينوستۋدياعا ءتۇسىرىلىم جۇرگىزۋ ءۇشىن ۋاقىتشا بەرىلگەن.