الماتىدا قالا اكىمى دارحان ساتىبالدىنىڭ توراعالىعىمەن اكىمدىك جانىنداعى عىلىم جانە تەحنولوگيالار كەڭەسىنىڭ العاشقى وتىرىسى ءوتتى. جيىنعا عىلىمي قاۋىمداستىق وكىلدەرى، جوعارى وقۋ ورىندارىنىڭ باسشىلارى جانە جاس عالىمدار قاتىستى. كەڭەس مەملەكەت باسشىسىنىڭ تاپسىرماسى بويىنشا وڭىردە يننوۆاسيالىق ەكوجۇيەنى دامىتۋ ماقساتىندا قۇرىلدى،- دەپ حابارلايدى Dalanews.kz.
دارحان ساتىبالدى قاسىم-جومارت توقايەۆتىڭ جولداۋىندا ايقىندالعان مىندەتتەردىڭ وزەكتىلىگىن اتاپ ءوتتى. اتاپ ايتقاندا، ەكونوميكانى ءارتاراپتاندىرۋ، جاڭا سالالاردى دامىتۋ جانە عىلىم مەن تەحنولوگيا ءۇشىن قولايلى ورتا قالىپتاستىرۋدىڭ ماڭىزدىلىعىنا توقتالدى.
«جاھاندىق وزگەرىستەر جاعدايىندا الماتىنىڭ باسەكەگە قابىلەتتىلىگىن ارتتىرىپ، ونىڭ الەۋەتىن بارىنشا ءتيىمدى پايدالانۋ قاجەت»، – دەدى دارحان ساتىبالدى.
جيىندا جاساندى ينتەللەكت تاقىرىبىنا ايرىقشا نازار اۋدارىلدى. ەل پرەزيدەنتى ارنايى مينيسترلىك قۇرۋ جانە AI تەحنولوگيالارىن ەكونوميكانىڭ بارلىق سالاسىنا كەڭىنەن ەنگىزۋ قاجەتتىگىن اتاپ وتكەن بولاتىن. دارحان ساتىبالدىنىڭ ايتۋىنشا، بۇل باستاما الماتى ءۇشىن ستراتەگيالىق ماڭىزعا يە. ەلدەگى 254 يننوۆاسيالىق كومپانيانىڭ 52ء-سى وسىندا ورنالاسقاندىقتان دا قالا - ەلىمىزدىڭ جەتەكشى IT-حابى سانالادى.
«بۇل الماتىنىڭ جاڭا تەحنولوگيالاردى ەنگىزۋ مەن سىناقتان وتكىزۋ الەۋەتىنىڭ جوعارى ەكەنىن دالەلدەيدى»، – دەدى قالا اكىمى.
سونداي-اق، سيفرلىق تەحنولوگيالاردىڭ ەكونوميكانى جاڭعىرتۋعا، مەملەكەتتىك قىزمەتتەردىڭ تيىمدىلىگىن ارتتىرۋعا، دەنساۋلىق ساقتاۋ مەن ءبىلىم بەرۋ سالالارىن دامىتۋعا زور مۇمكىندىك اشاتىنى اتالدى.
ماڭىزدى باعىتتاردىڭ ءبىرى – كادر دايارلاۋ. اكىمنىڭ ايتۋىنشا، تەحنيكالىق جانە كاسىپتىك ءبىلىم بەرۋ جۇيەسىن جاڭعىرتۋ وقۋ باعدارلامالارىن ءوندىرىستىڭ ناقتى سۇرانىستارىنا سايكەستەندىرۋگە جول اشادى. ال عىلىمدى كوممەرسيالاندىرۋ «ەڭبەك ونىمدىلىگىن ارتتىرۋعا جانە ينۆەستيسيا تارتۋعا مۇمكىندىك بەرەدى».
الماتىداعى عىلىمي قىزمەتتىڭ نەگىزگى باعىتتارى رەتىندە ەكولوگيا، سەيسميكا، زياتكەرلىك الەۋەت، ينفراقۇرىلىم جانە كوشى-قون ۇدەرىستەرى ايقىندالدى.
«قالادا جايلى ءارى ءقاۋىپسىز ورتا قالىپتاستىرۋ ءۇشىن جەرگىلىكتى عىلىمي ينستيتۋتتار مەن عالىمداردىڭ قولدانبالى زەرتتەۋلەرى مەن يدەيالارىن بەلسەندى تۇردە ەنگىزۋ ماڭىزدى»، – دەپ اتاپ ءوتتى دارحان ساتىبالدى.
جيىن بۇل ماسەلەلەردى جۇيەلى تۇردە زەرتتەپ، يننوۆاسيالىق شەشىمدەر ازىرلەۋدى كوزدەي وتىرىپ، الەمدىك وزىق تاجىريبەلەر مەن وتاندىق ستارتاپتارعا سۇيەنەدى.
«الماتى باسقا قالالارعا ۇلگى بولىپ، جاڭا يدەيالار مەن ۇزدىك تاجىريبەلەردىڭ قاينار كوزىنە اينالۋى ءتيىس»، – دەپ تۇيىندەدى قالا اكىمى.
