Almatyda qala ákimi Darhan Satybaldynyń tóraǵalyǵymen Ákimdik janyndaǵy Ǵylym jáne tehnologiialar keńesiniń alǵashqy otyrysy ótti. Jiynǵa ǵylymi qaýymdastyq ókilderi, joǵary oqý oryndarynyń basshylary jáne jas ǵalymdar qatysty. Keńes Memleket basshysynyń tapsyrmasy boiynsha óńirde innovatsiialyq ekojúieni damytý maqsatynda quryldy,- dep habarlaidy Dalanews.kz.
Darhan Satybaldy Qasym-Jomart Toqaevtyń Joldaýynda aiqyndalǵan mindetterdiń ózektiligin atap ótti. Atap aitqanda, ekonomikany ártaraptandyrý, jańa salalardy damytý jáne ǵylym men tehnologiia úshin qolaily orta qalyptastyrýdyń mańyzdylyǵyna toqtaldy.
«Jahandyq ózgerister jaǵdaiynda Almatynyń básekege qabilettiligin arttyryp, onyń áleýetin barynsha tiimdi paidalaný qajet», – dedi Darhan Satybaldy.
Jiynda jasandy intellekt taqyrybyna airyqsha nazar aýdaryldy. El Prezidenti arnaiy ministrlik qurý jáne AI tehnologiialaryn ekonomikanyń barlyq salasyna keńinen engizý qajettigin atap ótken bolatyn. Darhan Satybaldynyń aitýynsha, bul bastama Almaty úshin strategiialyq mańyzǵa ie. Eldegi 254 innovatsiialyq kompaniianyń 52-si osynda ornalasqandyqtan da qala - elimizdiń jetekshi IT-haby sanalady.
«Bul Almatynyń jańa tehnologiialardy engizý men synaqtan ótkizý áleýetiniń joǵary ekenin dáleldeidi», – dedi qala ákimi.
Sondai-aq, tsifrlyq tehnologiialardyń ekonomikany jańǵyrtýǵa, memlekettik qyzmetterdiń tiimdiligin arttyrýǵa, densaýlyq saqtaý men bilim berý salalaryn damytýǵa zor múmkindik ashatyny ataldy.
Mańyzdy baǵyttardyń biri – kadr daiarlaý. Ákimniń aitýynsha, tehnikalyq jáne kásiptik bilim berý júiesin jańǵyrtý oqý baǵdarlamalaryn óndiristiń naqty suranystaryna sáikestendirýge jol ashady. Al ǵylymdy kommertsiialandyrý «eńbek ónimdiligin arttyrýǵa jáne investitsiia tartýǵa múmkindik beredi».
Almatydaǵy ǵylymi qyzmettiń negizgi baǵyttary retinde ekologiia, seismika, ziiatkerlik áleýet, infraqurylym jáne kóshi-qon úderisteri aiqyndaldy.
«Qalada jaily ári qaýipsiz orta qalyptastyrý úshin jergilikti ǵylymi institýttar men ǵalymdardyń qoldanbaly zertteýleri men ideialaryn belsendi túrde engizý mańyzdy», – dep atap ótti Darhan Satybaldy.
Jiyn bul máselelerdi júieli túrde zerttep, innovatsiialyq sheshimder ázirleýdi kózdei otyryp, álemdik ozyq tájiribeler men otandyq startaptarǵa súienedi.
«Almaty basqa qalalarǵa úlgi bolyp, jańa ideialar men úzdik tájiribelerdiń qainar kózine ainalýy tiis», – dep túiindedi qala ákimi.
