الماتىدا ەر ادام تانىس ايەلى مەن ونىڭ التى جاسار قىزىن شويىن قازانمەن ۇرىپ ولتىرگەنى ءۇشىن ءومىر بويىنا باس بوستاندىعىنان ايىرىلدى، دەپ حابارلايدى Dalanews.kz.
كريمينالنىي كازاحستان telegram-ارناسىنىڭ مالىمەتىنشە، قازا بولعان ايەلدىڭ اناسى دا اۋىر جاراقات العان.
تەرگەۋ مالىمەتتەرىنە سايكەس، ولاردىڭ اراسىندا تۇرمىستىق داۋ شىققان. اشۋعا بوي بەرگەن ەر ادام قازاندى قارۋ رەتىندە قولدانىپ، ءۇش ادامدى سوققىعا جىققان.
"بالانىڭ ايقايىن ەستىگەن كورشىسى پاتەردىڭ ەسىگىن قاعىپ، نە بولىپ جاتقانىن انىقتاۋعا تىرىسقان. ءبىراق قىلمىسكەر ونى دا قازانمەن ماڭدايىنان سوعىپ، ايەل ەسىنەن تانىپ قالعان"، - دەيدى دەرەككوز.
قىلمىستان كەيىن ەر ادام قانعا بويالعان قازاندى ءبىر ءۇيدىڭ قاقپاسىنىڭ جانىندا جاسىرعان. سوتتا ول ءوز كىناسىن تولىعىمەن مويىندامادى. الايدا ساراپتاما ناتيجەسىندە قازاننان ونىڭ ساۋساق ىزدەرى تابىلدى. پاتەردە باسقا ادامداردىڭ بولۋىنا قاتىستى ايعاقتار تابىلمادى.
قىلمىسكەر ايەلدى جانە ونىڭ التى جاسار قىزىن ولتىرگەنى ءۇشىن ءومىر بويىنا باس بوستاندىعىنان ايىرىلدى. بۇعان دەيىن ول ادام ولتىرگەنى ءۇشىن جازاسىن وتەپ، مەرزىمىنەن بۇرىن بوساپ شىققان بولاتىن.
