الماتى وبلىسىندا قوقىس پوليگونىنان شىققان ءورت ءۇش كۇننەن بەرى سوندىرىلگەن جوق، دەپ حابارلايدى Dalanews.kz.

اكىمدىك اۋا ساپاسى باقىلاۋدا دەپ سەندىرىپ وتىر. 

الماتى–قونايەۆ اۆتوجولىنىڭ 35-شاقىرىمىنداعى تۇرمىستىق قالدىقتار پوليگونىندا شىققان ورتكە بايلانىستى جاقىن ماڭداعى ەلدى مەكەندەردە اۋا ساپاسىنا سانيتارلىق-ەپيدەميولوگيالىق مونيتورينگ جۇرگىزىلگەن. 

15–16 قىركۇيەك كۇندەرى 288 سىناما الىنىپ، ولاردىڭ ءبىر بولىگىندە شەكتى ماننەن اسىپ كەتكەن كورسەتكىشتەر انىقتالدى. وسىعان وراي تۇرعىندارعا، اسىرەسە بالالار مەن قارتتارعا جانە تىنىس الۋ جولدارىنىڭ سوزىلمالى اۋرۋى بار ادامدارعا الدىن الۋ شارالارىن ساقتاۋ جونىندە نۇسقاۋلىق بەرىلدى.

17 قىركۇيەكتە سول نۇكتەلەردە جۇرگىزىلگەن قايتا تەكسەرۋلەر نورمالارعا ساي ناتيجەلەر كورسەتكەن. 

كتك مالىمەتىنشە،قوقىس پوليگونىنىڭ قازىرگى جاعدايى ءتىپتى كۇردەلەنە ءتۇستى – اۋماق تۇگەلدەي قالىڭ تۇتىنگە ورانعان. قالادا جاڭبىر جاۋعانىمەن، تەرەڭدىگى ون مەتردەن اساتىن جەر استىنداعى جالىن ءالى باسىلار ەمەس. كەرىسىنشە، ءتۇتىن بۇرىنعىدان دا قويۋلانىپ كەتتى.

مەكتەپتەر ونلاين وقۋعا كوشتى

قاۋىپسىزدىك ءۇشىن ماڭايداعى ءۇش مەكتەپ ءداستۇرلى وقۋدان ونلاين فورماتقا اۋىسۋعا ءماجبۇر بولدى. ءورتتىڭ سالدارى وقۋشىلاردىڭ دا كۇندەلىكتى ومىرىنە اسەر ەتىپ وتىر.

اكىم وقيعا ورنىندا

جاعدايدى باقىلاۋعا وبلىس اكىمى كەلىپ، ارنايى كوميسسيا قۇرىلدى. ساراپتاما ناتيجەسىنە قاراي توتەنشە جاعداي جاريالانۋى مۇمكىن ەكەنى دە ايتىلدى.

ءورتتى سوندىرۋگە جۇزدەگەن مامان تارتىلدى

قىزىل جالىندى اۋىزدىقتاۋ ءۇشىن 200-دەن اسا مامان مەن جۇزگە جۋىق تەحنيكا جۇمىلدىرىلعان. كەيبىرى باسقا وڭىرلەردەن شاقىرىلعان. التى ءورت ءسوندىرۋ الاڭى جاساقتالىپ، ماڭايداعى تەرەڭ-قارا وزەنىنەن ۇزدىكسىز سۋ تارتىلىپ جاتىر.

ءورت اۋماعى

ءۇش كۇن بۇرىن باستالعان ءورتتىڭ سەبەبى ازىرگە بەلگىسىز. پوليگوننىڭ جالپى كولەمى 35 گەكتار بولسا، سونىڭ 15 گەكتارى وتقا ورانعان.