قاۋلىعا سايكەس وبلىس اۋماعىنا وزگە ەلدەردەن ورالعان الماتى وبلىسىنىڭ تۇرعىندارىنان باسقا، سول سياقتى جۇك تاسۋشى ادامدار مەن كولىكتەردەن، سونىڭ ىشىندە ترانزيتتىك كولىكتەردەن باسقا وزگە ءوڭىردىڭ ادامدارى مەن كولىكتەرىنە كىرۋگە تىيىم سالىنادى.
ال الماتى وبلىسىنىڭ باسقا وڭىرلەرگە شىعىپ كەتكەن تۇرعىندارى وبلىس اۋماعىنا 15 ءساۋىر كۇنگى ساعات 00.00-گە دەيىن قايتىپ كەلە الادى.
كارانتين ەنگىزىلۋىنە بايلانىستى اۋدان، قالالارعا كىرۋ-شىعۋعا، سول سياقتى ەلدى مەكەندەردىڭ ىشىندەگى قوزعالىستارعا تىيىم سالىنادى. بۇل رەتتە تۇرعىندارعا مەديسينالىق ۇيىمدارعا، جاقىن جەردەگى دۇكەندەر مەن ءدارىحاناعا كۇنىنە ءبىر رەت قانا شىعۋعا رۇقسات. ءبىرىنشى كەزەكتەگى قاجەت تاۋارلاردى، ازىق-تۇلىكتەردى، دارى-دارمەك پەن مەديسينالىق بۇيىمداردى، قورعانۋ جانە گيگيەنالىق قۇرالداردى، جانار-جاعارماي ماتەريالدارىن، كولىك قۇرالدارىنىڭ قوسالقى بولشەكتەرىن، وندىرىستىك قۇرالداردى جانە ت.ب. تاسىمالدايتىن ادامدار مەن كولىكتەرگە تاپسىرىستىڭ بار ەكەنىن ايعاقتايتىن قۇجاتتارى بولعان جاعدايدا رۇقسات ەتىلەدى.
كارانتين كەزىندە جۇمىس ىستەيتىن ۇيىمداردىڭ ادامدارى مەن كولىكتەرىنە، قىزمەتكەرلەردى تاسىمالداۋشى ادامدار مەن كولىكتەرگە شەكتەۋدىڭ قاتىسى جوق.
دەگەنمەن جەڭىل كولىكتە 3 ادامنان ارتىق وتىرماۋى كەرەك، اۆتوبۋستار سالوندارىنىڭ ادام تولتىرۋى 40 %-دان اسپاۋى قاجەت، جولاۋشىلار جەكە-جەكە وتىرۋى كەرەك، ياعني جولاۋشىلاردىڭ ارا قاشىقتىعى 1 مەتردەن كەم بولماۋى ءتيىس.
رەسمي بۇقارالىق اقپارات قۇرالدارى قىزمەتكەرلەرىنىڭ قولىندا رەداكسيالىق تاپسىرماسى بولعان جاعدايدا، قۇرىلىس جانە جول جوندەۋ مەكەمەلەرى قىزمەتكەرلەرىنىڭ، مەملەكەتتىك نىساندار قۇرىلىسىنا تارتىلعان قاجەتتى مامانداردىڭ، سول سياقتى ارنايى ينكاسساتورلىق قىزمەت ماماندارى مەن كولىكتەرىنىڭ ءتيىستى بەلگىلەرى مەن رۇقسات قۇجاتتارى بولعان جاعدايدا شەكتەۋ قويىلمايدى.
ال، مەديسينالىق ۇيىمداردىڭ قىزمەتى، ستوماتولوگيالىق مەكەمەلەر، ۆەتەرينارلىق قىزمەتتەر، سونىڭ ىشىندە ۆەتەرينارلىق جانە مال شارۋاشىلىعىنىڭ جەدەل جاردەم قىزمەتى؛ زەرتحانانىڭ بارلىق ءتۇرى؛ سۋپەرماركەتتەر، ازىق-تۇلىك دۇكەندەرى، سونىڭ ىشىندە ساۋدا-ويىن-ساۋىق ورتالىقتارىنىڭ ىشىندەگى ازىق-تۇلىك ساتاتىن دۇكەندەر، كوپ قاباتتى تۇرعىن ۇيلەر؛ ءدارىحانالار، سول قاتاردا ۆەتەرينارلىق ءدارىحانالار قىزمەتى ۋاقىتشا توقتاتۋعا جاتپايدى.
وبلىستاعى كوممۋنالدىق قىزمەتتەر مەن ينفراقۇرىلىمدار، ەلەكتروەنەرگەتيكالىق كومپانيالار، تەلەكوممۋنيكاسيا مەن بايلانىس قىزمەتى، كوممۋنيكاسيا مەن تەحنيكالىق قولداۋ جۇيەلەرىن باسقارۋ ورتالىعىنىڭ جۇمىسشىلارى جۇمىسىن جالعاستىرادى.
كۋرەرلىك جەتكىزۋ نىساندارى دا قىزمەت كورسەتەدى. ەلدى مەكەننەن تىس جەرلەردەگى جانار-جاعارماي جانە گاز تولتىرۋ ستانسالارى قالىپتى رەجيمدە، ال ولاردىڭ ەلدى مەكەن ىشىندەگىلەرى ساعات 8.00-دەن 20.00-گە دەيىن جۇمىس جاسايدى.
ازىق-تۇلىكتىك ەمەس تاۋارلار، سونىڭ ىشىندە ءبىرىنشى كەزەكتەگى قاجەتتى تاۋارلار، قۇرىلىس ماتەريالدارى مەن تۇرمىستىق حيميا ساتاتىن نىساندار جەتكىزۋ ۇيىمداستىرىلعان جاعدايدا جۇمىس ىستەي الادى.
رۇقسات ەتىلگەن قىزمەت تۇرلەرىنىڭ تىزىمىندە جوق سالالاردىڭ ۇيىمدارى مەن كاسىپورىندارى وسى قاۋلى كۇشىندە بولاتىن ۋاقىت ارالىعىندا قالىپتى رەجيمدەگى جۇمىسىن توقتاتۋعا ءماجبۇر. ولار ءوز جۇمىسىن قاشىقتان ىستەۋ رەجيمىندە، سونىڭ ىشىندە ونلاين رەجيمدە جالعاستىرا الادى. شەكتەۋ ەنگىزىلگەن ۋاقىتتاردا جۇمىس ىستەيتىن نىسانداردىڭ بارلىعى دا سانيتارلىق جانە دەزينفەكسيالىق رەجيم تالاپتارىن قاتاڭ ساقتاۋعا ءتيىس.
الماتى وبلىسى اۋماعىندا كارانتين ەنگىزۋ تۋرالى قاۋلى 2020 جىلعى 14 ساۋىردەن 15-ىنە قاراعان تۇندە ساعات 00.00-دە كۇشىنە ەنەدى.
انار سابىروۆا
