Qaýlyǵa sáikes oblys aýmaǵyna ózge elderden oralǵan Almaty oblysynyń turǵyndarynan basqa, sol siiaqty júk tasýshy adamdar men kólikterden, sonyń ishinde tranzittik kólikterden basqa ózge óńirdiń adamdary men kólikterine kirýge tyiym salynady.
Al Almaty oblysynyń basqa óńirlerge shyǵyp ketken turǵyndary oblys aýmaǵyna 15 sáýir kúngi saǵat 00.00-ge deiin qaityp kele alady.
Karantin engizilýine bailanysty aýdan, qalalarǵa kirý-shyǵýǵa, sol siiaqty eldi mekenderdiń ishindegi qozǵalystarǵa tyiym salynady. Bul rette turǵyndarǵa meditsinalyq uiymdarǵa, jaqyn jerdegi dúkender men dárihanaǵa kúnine bir ret qana shyǵýǵa ruqsat. Birinshi kezektegi qajet taýarlardy, azyq-túlikterdi, dári-dármek pen meditsinalyq buiymdardy, qorǵaný jáne gigienalyq quraldardy, janar-jaǵarmai materialdaryn, kólik quraldarynyń qosalqy bólshekterin, óndiristik quraldardy jáne t.b. tasymaldaityn adamdar men kólikterge tapsyrystyń bar ekenin aiǵaqtaityn qujattary bolǵan jaǵdaida ruqsat etiledi.
Karantin kezinde jumys isteitin uiymdardyń adamdary men kólikterine, qyzmetkerlerdi tasymaldaýshy adamdar men kólikterge shekteýdiń qatysy joq.
Degenmen jeńil kólikte 3 adamnan artyq otyrmaýy kerek, avtobýstar salondarynyń adam toltyrýy 40 %-dan aspaýy qajet, jolaýshylar jeke-jeke otyrýy kerek, iaǵni jolaýshylardyń ara qashyqtyǵy 1 metrden kem bolmaýy tiis.
Resmi buqaralyq aqparat quraldary qyzmetkerleriniń qolynda redaktsiialyq tapsyrmasy bolǵan jaǵdaida, qurylys jáne jol jóndeý mekemeleri qyzmetkerleriniń, memlekettik nysandar qurylysyna tartylǵan qajetti mamandardyń, sol siiaqty arnaiy inkassatorlyq qyzmet mamandary men kólikteriniń tiisti belgileri men ruqsat qujattary bolǵan jaǵdaida shekteý qoiylmaidy.
Al, meditsinalyq uiymdardyń qyzmeti, stomatologiialyq mekemeler, veterinarlyq qyzmetter, sonyń ishinde veterinarlyq jáne mal sharýashylyǵynyń jedel járdem qyzmeti; zerthananyń barlyq túri; sýpermarketter, azyq-túlik dúkenderi, sonyń ishinde saýda-oiyn-saýyq ortalyqtarynyń ishindegi azyq-túlik satatyn dúkender, kóp qabatty turǵyn úiler; dárihanalar, sol qatarda veterinarlyq dárihanalar qyzmeti ýaqytsha toqtatýǵa jatpaidy.
Oblystaǵy kommýnaldyq qyzmetter men infraqurylymdar, elektroenergetikalyq kompaniialar, telekommýnikatsiia men bailanys qyzmeti, kommýnikatsiia men tehnikalyq qoldaý júielerin basqarý ortalyǵynyń jumysshylary jumysyn jalǵastyrady.
Kýrerlik jetkizý nysandary da qyzmet kórsetedi. Eldi mekennen tys jerlerdegi janar-jaǵarmai jáne gaz toltyrý stansalary qalypty rejimde, al olardyń eldi meken ishindegileri saǵat 8.00-den 20.00-ge deiin jumys jasaidy.
Azyq-túliktik emes taýarlar, sonyń ishinde birinshi kezektegi qajetti taýarlar, qurylys materialdary men turmystyq himiia satatyn nysandar jetkizý uiymdastyrylǵan jaǵdaida jumys istei alady.
Ruqsat etilgen qyzmet túrleriniń tiziminde joq salalardyń uiymdary men kásiporyndary osy qaýly kúshinde bolatyn ýaqyt aralyǵynda qalypty rejimdegi jumysyn toqtatýǵa májbúr. Olar óz jumysyn qashyqtan isteý rejiminde, sonyń ishinde onlain rejimde jalǵastyra alady. Shekteý engizilgen ýaqyttarda jumys isteitin nysandardyń barlyǵy da sanitarlyq jáne dezinfektsiialyq rejim talaptaryn qatań saqtaýǵa tiis.
Almaty oblysy aýmaǵynda karantin engizý týraly qaýly 2020 jylǵy 14 sáýirden 15-ine qaraǵan túnde saǵat 00.00-de kúshine enedi.
Anar SABYROVA
